សឿន ផានផាភួង ខ្លោចចិត្តអាណិតកូនស្រីដួលសន្លប់តាមផ្លូវតែម្នាក់ឯង ខណៈខ្លួនជាម្ដាយមិនបាននៅកន្លែងកើតហេតុ

2018-09-25 01:51:03
ចំនួនមតិ 0 | ចំនួនចែករំលែក 0

ចន្លោះមិនឃើញ

នាមជាម្ដាយ សឿន ផានផាភួង បានសម្ដែងអារម្មណ៍ខ្លោចចិត្តអាណិតកូនស្រីដួលសន្លប់នៅតាមដងផ្លូវម្នាក់ឯង កុំតែបានអ្នកធ្វើដំណើរក្បែរនោះឃើញម្ល៉េះមិនដឹងកូនស្រីនាង ទៅជាយ៉ាងណានោះទេ។

សឿន ផានផាភួង ថា កាលពីរសៀលម្សិលមិញកូនស្រីខ្លួនបានដើរចេញពីផ្ទះទៅទិញអាហារញាំ នៅខាងក្រៅពេលត្រឡប់មកវិញមិនទាន់ដល់ផ្ទះផងក៏ដួលសន្លប់នៅតាមផ្លូវតែម្ដង កុំតែបានអ្នកធ្វើដំណើរនៅទីនោះឃើញមិនដឹងថាមានរឿងអ្វីកើតឡើងចំពោះកូនស្រីឡើយ។

មូលហេតុដែលធ្វើឲ្យនាងតូច អាង សុជាតា ហៅឈូឈូ ដួលសន្លប់នេះត្រូវបានអ្នកនាង សឿន ផានផាភួង ត្រូវជាម្ដាយ និងតារាសម្ដែងអះអាងថា មកពីមួយរយៈនេះកូនស្រីខ្លួនហត់ខ្លាំងពេកជាមួយការងារសិក្សា សម្ដែងខ្សែភាពយន្ត និងថតស្ប៉តជាច្រើន ទើបគ្មានពេលវេលាសម្រាកគ្រប់គ្រាន់។

អ្នកម្ដាយរូបនេះថា៖" គាត់ហត់ខ្លាំងណាស់អូនអើយ ព្រឹកគាត់រៀនថ្ងៃគាត់ទៅថតរឿង មានថ្ងៃខ្លះថតទល់ភ្លឺក៏មានដែរអូន។ បងអត់មានដឹងទេពេលគាត់ដួលសន្លប់ហ្នឹង ព្រោះបងជាប់ថតហើយគេអត់ហ៊ានប្រាប់បងទេ ទាល់តែកូនបងដឹងខ្លួនទើបគេខលប្រាប់បងភ័យ និងអាណិតកូនខ្លាំងណាស់"។

បន្ទាប់ពីយកទៅដល់មន្ទីរពេទ្យពេលនេះអាការៈកូនស្រីនាង បានប្រសើរហើយក្រោមការមើលថែយកចិត្តទុកដាក់ពីសំណាក់ក្រុមគ្រូពេទ្យ។ ដោយលោកគ្រូ ពេទ្យមានប្រសាសន៍ថា កូនស្រីខ្លួនខ្វះជាតិស្ករ ជាតិទឹក និងឈាមមិនគ្រប់ដូច្នេះត្រូវសម្រាកព្យាបាលមួយរយៈសិន។ សឿន ផានផាភួង បញ្ជាក់៕