មានស្នេហ៍ពិតមិនគួររំលង ភ្នំថ្មី១ នៃខេត្តភាគឦសាន ទាំងស័ក្ដិសិទ្ធិ ហើយទេសភាពក៏ស្អាត

2018-09-25 04:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មណ្ឌលគិរី ជាទឹកដីដែលសំបូរទេសភាពព្រៃ ភ្នំ ក្រំ ថ្ម ដ៏ស្រស់ស្អាត ដែលជាទីកន្លែងសម្រាប់អ្នកនិយមទេសចរណ៍បែបធម្មជាតិ។ សម្រាប់អ្នកដែលចង់បានអារម្មណ៍រីករាយ ថតរូបលើវាលស្មៅបៃតងខ្ចី មិនបាច់ពិបាកធ្វើដំណើរឆ្លងប្រទេស អាចក្រឡេកមកមើលទិដ្ឋភាព នៃទឹកដីខេត្តភូមិភាគឦសានមួយនេះ។

អ្វីដែលប្លែក គឺអ្នកខេត្តមណ្ឌលគិរីដែលមានជំនឿ តែងនិយមនាំគ្នាទៅលេងភ្នំអណ្ដូងស្នេហ៍ ដែលជាទីកន្លែងទេសចរណ៍ថ្មី១ នៃខេត្តនេះ។ ភ្នំអណ្ដូងស្នេហ៍ មានទីតាំងនៅក្នុងភូមិដាក់ដាំ ឃុំដាក់ដាំ ស្រុកអូរាំង ខេត្តមណ្ឌលគិរី។

ប្រភពពីហ្វេសប៊ុកខេត្តមណ្ឌលគិរី បានសរសេរថា បើតាមចាស់ៗបានប្រាប់តគ្នា ថាទាល់តែអ្នកមានស្នេហ៍ពិតទើបអាចរកអណ្ដូងនោះឃើញ។ អ្នកស្រុកមានជំនឿថា ទីនេះជាកន្លែងស័ក្ដិសិទ្ធិ បើអ្នកមិនទាន់មានស្នេហ៍ស្មោះទេ គឺច្បាស់ជារកអណ្ដូងនោះមិនឃើញឡើយ។

ស្របនឹងអាកាសធាតុចុះត្រជាក់បែបនេះ សម្រាប់អ្នកដែលគម្រោងដើរកម្សាន្ត អាចចំណាយពេលមកកម្សាន្តពីទីតាំងទេសចរណ៍ ដ៏ស្រស់ស្អាត បែបធម្មជាតិ និងបង្កប់នូវអត្ថន័យ ជំនឿតាមតំបន់ នៃភ្នំអណ្ដូងស្នេហ៍ ក្នុងទឹកដីភូមិភាគឦសាន ខេត្តមណ្ឌលគិរី ។ សូមទស្សនាកម្រងរូបភាពត្រជាក់ភ្នែកដូចខាងក្រោម។

ប្រភពរូបថត Sopheak

ខេត្តមណ្ឌលគិរី មានព្រំប្រទល់ខាងកើតជាប់នឹង ប្រទេស វៀតណាម ខាងជើងជាប់នឹង ខេត្តរតនគីរី ខាងជើងឈាងខាងលិចជាប់នឹង ខេត្តស្ទឹងត្រែង ខាងលិចជាប់នឹងខេត្តក្រចេះ។

ខេត្តនេះ មានចំងាយ ៣៨០គីឡូម៉ែត្រ ពីរាជធានីភ្នំពេញ ដោយធ្វើដំណើរ តាមផ្លូវជាតិលេខ៨ ៧ និង៧៦ដោយឆ្លងកាត់តាមខេត្តកណ្ដាល ព្រៃវែង ត្បូងឃ្មុំ កំពង់ចាម និងខេត្តក្រចេះ។

អត្ថបទ៖ ពៅ រក្សា