ទិដ្ឋភាពកន្លែងថតរឿង «ចងពៀរ» គួរឱ្យខ្លាច ធ្វើឱ្យតួប្រុសមិនហ៊ានសម្រាកក្នុងបន្ទប់ម្នាក់ឯង

2018-09-26 05:09:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តខ្មែរ បែបភ័យរន្ធត់ថ្មីផលិតដោយផលិតករ ឥណ្ឌា លោក Amit Dubey បានទៅផ្ដិតយកទេសភាពយ៉ាងស្រស់ស្រាយពីទឹកដីខេត្តកែប ក្នុងផ្ទះសម្រាកកម្សាន្តចុងឆ្នាំរបស់គ្រួសារមួយដែលមានទីតាំងនៅជើងភ្នំក្នុងព្រៃស្ងាត់ជ្រងំ។

រូបភាពផ្ទះវិឡា ថតរឿង «ចងពៀរ»

ភាពយន្តថ្មីមួយនេះ នឹងជាប់ទាក់ទងនឹងការលងបន្លាច ការចងពៀរពីខ្មោចស្រីម្នាក់ ដែលការលងបន្លាចម្តងនេះជារបៀបលងរបស់ខ្មោចទឹក នេះបើតាមការបញ្ជាក់របស់ផលិតករ អ្នកដឹកនាំរឿង Amit Dubey។ រឿង «ចងពៀរ» នេះផងដែរ ក៏មានបង្ហាញពីមន្តអាគម និងរឿងរ៉ាវ ដែលជាជំនឿររបស់ខ្មែរដែលមានតាមតំបន់ ជាមួយសាច់រឿង បែបអប់រំសម្រាប់ជីវិតស្នេហាយុវវ័យ និងគ្រួសារជាស្នូលផងដែរ។ លោក Amit Dubey បន្ថែម។

រូបភាពពីរឿង «ចងពៀរ» ឈុតខ្មោចទឹកទាញជើង

ក្នុងបទសម្ភាសជាមួយ Sabay កាលពីថ្មីៗនេះដែរ អ្នកនាង ស្វែង សុជាតា ដែលជាតួអង្គសំខាន់ក្នុងរឿងនេះផងដែរ ប្រាប់ឱ្យដឹងថា ទិដ្ឋភាពក្នុងវិឡាក្បែរភ្នំនោះពិតជាគួរឱ្យខ្លាចមែន ព្រោះវាស្ងាត់ពេក ហើយវិឡានោះត្រូវបានម្ចាស់ផ្ទះទុកចោលសម្រាប់ជួលឱ្យបរទេសមកស្នាក់នៅកម្សាន្តបែបឯកជនមិនច្រើនដងទេក្នុងមួយឆ្នាំៗ។

អ្នកនាង ស្វែង សុជាតា

លើសពីនេះទៅខណៈពេលថតរឿង បែបរន្ធត់ រឿងខ្មោចបែបនេះទៀត ពិតជាធ្វើឱ្យក្រុមការងារមានអារម្មណ៍ស្រៀវព្រឺរោមម្តងម្កាលមែន ព្រោះភាគច្រើនថតនៅពេលយប់បាត់ពន្លឺ។ អ្នកនាង ស្វែង សុជាតា បន្តថា តួប្រុសក្នុងរឿងនេះ ក៏មានបញ្ហាខ្លះៗដែរពេលថត ព្រោះគាត់មានអារម្មណ៍ដូចជាមានគេមកមើលគាត់ ក្បែរៗគាត់មានអារម្មណ៍ថា មានវត្តមានអ្វីម្យ៉ាងសង្កេតមើល ធ្វើឱ្យគាត់លែងហ៊ានសម្រាកម្នាក់ឯងក្នុងបន្ទប់ ហើយក៏រត់ចេញមកសម្រាកជុំៗគ្នាជាមួយក្រុមការងារវិញ៕

រូបភាពដោយ៖ samjamphoto.com

អត្ថបទ៖ Sunny