ស្ថាបនិកថាពុំស្តាយក្រោយទេ ទោះសព្វថ្ងៃ Instagram ឡើងថ្លៃខ្ពស់ជាងមុន ១០០ ដង

2018-09-26 12:31:20
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកត្រួសត្រាយបង្កើតបណ្ដាញសង្គម Instagram លោក Kevin Systrom បានប្រាប់សារព័ត៌មាន WSJ យ៉ាងប្រាកដប្រជាថាលោកគ្មានការស្ដាយក្រោយអ្វីទាំងអស់ ថ្វីបើសម្រេចចិត្តលក់ឲ្យ Facebook កាលពីឆ្នាំ ២០១២ ថ្លៃ ១ ពាន់លានដុល្លារ ខណៈសព្វថ្ងៃមានតម្លៃខ្ពស់ជាងមុន ១០០ ដងក៏ដោយ។

រូបតំណាងលោក Kevin Systrom

បុរសវ័យ ៣៤ ឆ្នាំបញ្ជាក់ប្រាប់មុនថ្ងៃប្រកាសដើរចេញពីក្រុមហ៊ុនយ៉ាងដូច្នោះថា៖ "ខ្ញុំគិតថាការដែលយើងមកដល់ចំណុចនេះ យើងបានធ្វើការសម្រេចចិត្តដ៏ល្អបំផុតមួយ ដោយគំនិតនៃការចូលរួមជាមួយ Facebook ធ្វើឲ្យយើងអាចដើរលឿនជាងការដែលនៅតែម្នាក់ឯង បែបនេះហើយបើវាជាគោលដៅអ្នក ខ្ញុំគិតថាយើងគួរតែយល់ស្រប ប៉ុន្តែបើយើងមានគោលដៅផ្សេង ដោយមិនចង់បាន ១ ពាន់លានដុល្លារ តែចង់បាន ២ ពាន់ ៣ ពាន់ ៤ ពាន់លានឬលើសពីនេះ នោះក៏ត្រូវរកផ្លូវដើរមួយផ្សេងទៀត ប៉ុន្តែនោះពុំមែនជាអ្វីដែលធ្វើឲ្យអ្នករីករាយក្នុងជីវិតឡើយ"។

រំឭកថា Facebook បានទិញយក Instagram កាលពីឆ្នាំ ២០១២ ក្នុងតម្លៃ ១ ពាន់លានដុល្លារ មុនបោះជំហានប្រលូកចាប់យក WhatsApp នៅពីរឆ្នាំបន្ទាប់ចំណាយខ្ទង់ ២០ ពាន់លានដុល្លារ ប៉ុន្តែលោក Systrom ក៏សង្កត់ធ្ងន់ថា៖ "Instagram ពិតជាមានភាពខុសប្លែកគ្នាដាច់ស្រឡះធៀបនឹង WhatsApp ជាហេតុពុំដែលធ្វើឲ្យខ្ញុំមានការគិតខុសឆ្គងអ្វីឡើយ"។ បច្ចុប្បន្នតាមការប៉ាន់ប្រមាណពី Bloomberg បណ្តាញសង្គមយក្ស Instagram មានតម្លៃថ្លៃជាង ១០០ ពាន់លានដុល្លារ។