«ចង់ច្នៃគំនិតជំនួញឲ្យចំណេញយូរអង្វែង ត្រូវតែរៀន»សម្តីចាក់ដោតក្នុងសន្និសីទរៀនធ្វើជំនួញឆ្នាំនេះ

2018-09-27 03:42:11
ចំនួនមតិ 0 | ចំនួនចែករំលែក 0

ចន្លោះមិនឃើញ

«យើងធ្លាប់ឮគេនិយាយថា មានគំនិត គឺមានលុយ តែតាមពិតដើម្បីច្នៃគំនិតមួយឲ្យទៅជាជំនួញបានលុយវាមិនមែនគ្រាន់តែគិតឃើញមួយព្រាវ ប្រមូលលុយទៅរកស៊ី ហើយរំពឹងថាចំណេញភ្លាមនោះទេ។ ការពិតទៅវាត្រូវការជំនាញច្បាស់លាស់ ការរៀនសូត្រ បង្កើតមូលដ្ឋានឲ្យរឹងមាំអីមួយដើម្បីឲ្យចេញជាលទ្ធផល និងឲ្យអាជីវកម្មមាននិរន្តភាព»។ នេះជាការពន្យល់របស់លោក សេង ពិសិដ្ឋ នាយកក្រុមហ៊ុនអនុស្សារ ថ្លែងក្នុងសន្និសីទរៀនធ្វើជំនួញលើកទី ៣ ប្រធានបទ "ត្រៀមសម្រាប់ដំណើរដ៏វែងឆ្ងាយ” កាលពីថ្ងៃអាទិត្យ ទី២៣ កញ្ញា ២០១៨ ឯមជ្ឈមណ្ឌលសហប្រតិបត្តការកម្ពុជាកូរ៉េ CKCC ។

«សន្និសីទរៀនធ្វើជំនួញលើកទី១ របស់យើងកាលពី ២០១៦ មានគោលដៅជំរុញគំនិតសហគ្រិនភាព ចង់ឲ្យទាំងអស់គ្នាចាប់អារម្មណ៍ពីការធ្វើជំនួញ ហើយសន្និសីទលើកទី២ និងទី៣ យើងចាប់ផ្តើមបំបែកការចាប់អារម្មណ៍ មកពង្រឹកបង្កើនមូលដ្ឋានជំនួញឲ្យបានរឹកមាំជាងមុន ដូច្នេះហើយទើបឆ្នាំនេះយើងដាក់ចេញប្រធានបទ“ត្រៀមសម្រាប់ដំណើរដ៏វែងឆ្ងាយ” »។ លោកបញ្ជាក់បន្ថែម។

សន្និសីទជំនួញរយៈពេល ៨ម៉ោង ពោលគេចាប់ផ្តើមតាំងពីម៉ោង ៨ព្រឹក ដល់៥ រសៀល មានអ្នកចូលរួមប្រមាណ ២០០នាក់ ភាគច្រើនជាម្ចាស់អាជីវកម្ម អ្នកមានគម្រោងចង់ប្រឡូក និងអ្នកដែលស្រលាញ់ផ្នែកជំនួញ បានចូលរួមស្តាប់ ដោះដូរយោបល់ និងសួរសំណួរដោយផ្ទាល់ទៅកាន់វាគ្មិនជំនាញចំនួន ៦រូបរបស់កម្មវិធី ដែលជាម្ចាស់ជំនួញល្បីៗមកពីវិស័យផ្សេងៗគ្នា ចែករំលែកបទពិសោធន៍ជំនួញ និងគន្លឹះអាជីវកម្ម ជជែកវែកញែកពីវិធីសាស្រ្តសំខាន់ៗក្នុងការចាប់ផ្ដើម កាត់បន្ថយហានិភ័យ និងធ្វើម៉េចឲ្យឈរជើងក្នុងបរិបទនៃទីផ្សារប្រកួតប្រជែង។

សន្និសីទរៀនធ្វើជំនួញនេះជាផ្នែកមួយនៃគម្រោង ស្តីពី រដូវកាលអាជីវកម្ម និងជំនួញខ្នាតតូច និងមធ្យម ២០១៨ «SME & Start up Show ២០១៨» រៀបចំឡើងដោយក្រុមហ៊ុនអនុស្សារ សហការឧបត្ថម្ភដោយក្រុមហ៊ុនថ្នាំពណ៌ជាតិ Cam-Paint និងក្រុមហ៊ុន Berocca ដែលមានកម្មវិធី ៣ធំៗ ដូចជា ទី១ គឺការតាំងបង្ហាញពីអាជីវកម្មរយៈពេល ២ថ្ងៃនៅកោះពេជ្រ ថ្ងៃទី១ និងទី២ កញ្ញាកន្លងទៅ , ទី២ គឺ សន្និសីទពីការរៀនធ្វើជំនួញ (Investment Pitch) ,និងនៅថ្ងៃទី២៣ កញ្ញាខាងមុខនេះ គឺជាបទបង្ហាញអំពីជំនួញ និងអាជីវកម្មខ្នាតតូច និងមធ្យមចាប់ផ្តើមថ្មី (Business Startup Conference) ដើម្បីចែករំលែក និងដោះដូរបទពិសោធន៍អាជីវកម្មពីបុគ្គលជោគជ័យមួយចំនួន៕