អ្នកធាត់ៗ មិនបាច់ទៅ Gym នាំហត់! ដើរ១ម៉ោងក្នុង១ថ្ងៃ ជួយឲ្យស្រកគីឡូបាន

2018-10-01 09:19:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ចង់ស្រកគីឡូ ហាត់ប្រាណជារឿងត្រូវធ្វើខានមិនបាន។ ដើរ ក៏ជាលំហាត់ប្រាណដែរ តែល្មមជួយឲ្យស្រកគីឡូបានដែរអត់?

ចម្លើយ គឺអាច! ការពិតទៅ ដើរ ជាលំហាត់ប្រាណដ៏សាមញ្ញល្អបំផុតមួយដែលមនុស្សស្ទើរតែគ្រប់គ្នាធ្វើ ប៉ុន្តែបើចង់ឲ្យស្រកគីឡូមែននោះ អ្នកត្រូវការធ្វើរឿងមួយបន្ថែមទៀត គឺរបបអាហារ។

“ដើរ ឬលំហាត់ប្រាណណាមួយ គ្រាន់តែផ្នែកមួយប៉ុណ្ណោះ។ របបអាហារសំខាន់ដូចគ្នា។ ការស្រាវជ្រាវបង្ហាញថា របបអាហារមានតុល្យភាព និងលំហាត់ប្រាណ ដូចជា ដើរ គឺជាគន្លឹះសំខាន់ទប់មិនឲ្យឡើងគីឡូ និងស្រកគីឡូ"។ នេះបើយោងតាមអ្នកស្រី Liz Sanders ប្រធានស្រាវជ្រាវនៅមូលនិធិក្រុមប្រឹក្សាព័ត៌មានម្ហូបអាហារអន្តរជាតិរបស់អាមេរិក (IFIC)។

គួរដើរចម្ងាយប៉ុណ្ណាទើបឲ្យស្រកគីឡូបាន?

មជ្ឈមណ្ឌលគ្រប់គ្រង និងការពារជំងឺអាមេរិក (CDC) បានណែនាំថា ដើម្បីសុខភាព អ្នកត្រូវចំណាយពេល ២ ម៉ោង កន្លះក្នុងមួយសប្ដាហ៍ ហាត់ប្រាណជាមួយនឹងសកម្មភាពល្មមៗ។ តែបើលំហាត់ប្រាណត្រូវប្រើកម្លាំងកាយខ្លាំង អ្នកគួរហាត់ត្រឹម ១ ម៉ោង ១៥ នាទីក្នុងមួយសប្ដាហ៍។

ប៉ុន្តែ បើចង់ស្រកគីឡូ អ្នកត្រូវដើរច្រើនជាងនេះ។ "គ្រាន់តែដើរ ១៥ ទៅ ៣០ នាទីក្នុងមួយថ្ងៃ មិនអាចជួយឲ្យស្រកគីឡូបានទេ"។ នេះបើតាមការអះអាងរបស់វេជ្ជបណ្ឌិត James O. Hill ប្រធានមជ្ឈមណ្ឌលចំណីអាហារមនុស្សនៃសាកលវិទ្យាល័យ Colorado ។ លោកថា ត្រូវហាត់ប្រាណ ឬដើររយៈពេល ១ ម៉ោង បើសិនអ្នកចង់ស្រកគីឡូ។

អត្ថប្រយោជន៍នៃការដើរ

ទម្ងន់រាងកាយ កើតពីខ្លាញ់ និងសាច់ដុំ។ ការដើរ មានប្រយោជន៍ដល់សុខភាព ព្រោះវាអាចរំលាយខ្លាញ់ និងរក្សាម៉ាសសាច់ដុំ។ ការស្រាវជ្រាវនៅក្នុងទស្សនាវដ្ដីរបស់សមាគមវេជ្ជសាស្ត្រអាមេរិករកឃើញថា នៅពេលបុរសកាត់បន្ថយការដើរក្នុងរយៈពេល ២ សប្ដាហ៍ ពួកគេបាត់បង់ម៉ាសសាច់ដុំនៅក្នុងជើងពួកគេ ហើយឡើងខ្លាញ់។ ការដើរ ក៏ជួយផងដែរដល់តុល្យភាពស្ករក្នុងឈាម និងគ្រប់គ្រងសម្ពាធឈាម រក្សាម៉ាសឆ្អឹង ជួយឲ្យអារម្មណ៍ល្អ ការពារបេះដូង និងកាត់បន្ថយឱកាសកើតមហារីក។

ហេតុអីគ្រាន់តែដើរសោះ អាចជួយឲ្យស្រកគីឡូបាន?

ការដើរ អាចជួយអ្នកឲ្យស្រកគីឡូ លុះត្រាតែអ្នកមានរបបអាហារដែលមានសុខភាពល្អទន្ទឹមគ្នាដែរ។ ដើររយៈពេល ១ ម៉ោង ក្នុងមួយថ្ងៃ មិនអាចកាត់បន្ថយទម្ងន់បានច្រើននោះទេ។ បើអ្នកចង់ស្រកបន្ថែមទៀត គួរបន្ថែមរយៈពេលដើរឲ្យបានច្រើនជាងនេះ៕

អត្ថបទ៖ សុផាត