ក្រោយ Cech របួស អ្នកចាំទីចំណូលថ្មីចង់ក្ដោបឱកាសឲ្យបាន

2018-10-01 11:15:25
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាំទីចំណូលថ្មីរបស់ Arsenal កីឡាករ Bernd Leno ក្នុងថ្ងៃនេះ ថា អវត្តមានរបស់ Petr Cech ធ្វើឲ្យខ្លួនមាន "ឱកាស"។

កីឡាករបាននិយាយថា៖ "នៅពេលនេះ Petr រងរបួសហើយ ខ្ញុំមិនដឹងថាគេនឹងរងរបួសយូរប៉ុណ្ណាទេ។ ការណ៍នេះបើកផ្លូវឲ្យខ្ញុំមានឱកាសក្នុងការលេងបានច្រើនប្រកួតជាងមុន ហើយបង្ហាញសមត្ថភាពរបស់ខ្ញុំឲ្យអ្នកចាត់ការឃើញ។ ដូច្នេះនេះគឺជាឱកាសធំណាស់សម្រាប់ខ្ញុំ"។

អ្នកចាំទី Leno បានបន្ត៖ "វាមិនមែនបានន័យថា ខ្ញុំសប្បាយចិត្តនៅពេលឃើញ Cech របួសនោះទេ។ ខ្ញុំមានអារម្មណ៍មិនល្អឡើយពេលឃើញគេរបួសបែបនេះ។ ទោះជាយ៉ាងណា អវត្តមានរបស់ Cech ធ្វើឲ្យខ្ញុំមានឱកាសច្រើនជាងមុន ហើយខ្ញុំនឹងយកចិត្តទុកដាក់ចាប់យកឱកាសទាំងនេះ"។

កាលពីថ្ងៃសៅរ៍កន្លងទៅ ក្នុងប្រកួតប៉ះ Watford នៅវគ្គទី ២ កីឡាករ Leno បានបង្ហាញខ្លួនលើកដំបូង ក្នុងប្រកួត Premier League របស់ខ្លួន ក្រោយត្រូវបានផ្លាស់ចូលជំនួស Cech ដែលរងរបួសសរសៃពួរ។ កីឡាករត្រូវបានគេមើលឃើញបានបង្ហាញទម្រង់លេងល្អក្នុងប្រកួតនោះ។

តាំងពីចូលរួមជាមួយ Arsenal កាលពីអំឡុងទីផ្សារដោះដូរកន្លងទៅ អ្នកចាំទី Leno មានតួនាទីត្រឹមអ្នកចាំទីដៃទី ២ របស់ក្លឹប ខណៈតំណែងអ្នកចាំទី ១ នៅបន្តស្ថិតនៅកណ្ដាប់ដៃ Cech។ មុនបង្ហាញខ្លួនក្នុងប្រកួតប៉ះ Watford កីឡាករបានលេងក្នុងប្រកួតផ្លូវការតែ ២ លើកប៉ុណ្ណោះ មួយក្នុង Europa League ហើយមួយទៀតនៅក្នុង League Cup៕

ប្រភព៖ Goal ប្រែសម្រួល៖ ហ៊ីម រស្មី