កីឡដ្ឋាន Spurs ថ្មីឈានដល់ដំណាក់កាលក្រាលស្មៅ

2018-10-03 08:19:49
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡដ្ឋានថ្មីរបស់ Tottenham Hotspur ដែលមានទីតាំងនៅទីក្រុងឡុងភាគខាងជើងក្បែរគ្នានឹងកីឡដ្ឋានចាស់នោះ បានឈានដល់ដំណាក់កាលក្រាលស្មៅហើយ និងរំពឹងថាអាចបញ្ចប់ការសាងសង់នាពេលឆាប់ៗខាងមុខនេះ។

តាមផែនការកីឡដ្ឋានខាងលើត្រូវបញ្ចប់តាំងពីថ្ងៃទី១៥ ខែកញ្ញា មកម្ល៉េះប៉ុន្តែត្រូវពន្យារពេលរហូតដល់បច្ចុប្បន្នដោយសារបញ្ហាបច្ចេកទេសមួយចំនួនមានការយឺតយ៉ាវ។ កីឡដ្ឋាន White Hart Lane ថ្មីបានចំណាយការសាងសង់ជិត១ពាន់លានផោន គឺប្រមាណ ៨៥០លានផោន។

Spurs មិនទាន់ប្រាកដថានឹងប្រើប្រាស់កីឡដ្ឋាននេះ នៅថ្ងៃណាឲ្យច្បាស់នៅឡើយទេ តែតាមការប៉ាន់ស្មានគឺយ៉ាងហោចណាស់ក៏ត្រូវរង់ចាំដល់ខែមករាដែរ ដូច្នេះមុនឆ្នាំថ្មីមកដល់ក្លឹបត្រូវយក Wembley ធ្វើជាទឹកដីបណ្ដោះអាសន្នតទៅទៀត។

គួរបញ្ជាក់ថាកីឡដ្ឋានថ្មីរបស់ Spurs អាចរំកិលទីលាន២ផ្សេងគ្នាបានដោយមួយជាទីលានបាល់ទាត់ ហើយមួយទៀតគឺជាទីលានបាល់ឱប។ ការប្រកួតកម្មវិធី NFL ដ៏ធំរបស់បាល់ឱបនឹងប្រើប្រាស់កីឡដ្ឋាននេះរៀបចំការប្រកួត៕