Valencia ចេញមុខបកស្រាយ ក្រោយចុច Like លើរូបទាមទារចង់ដេញ Mourinho

2018-10-03 13:08:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែការពារស្លាប Antonio Valencia ក្នុងថ្ងៃនេះ បានចេញមុខបកស្រាយ ក្រោយកីឡាករបានចុចលើការបង្ហោះមួយក្នុង Instagram ដែលទាមទារឲ្យមានការបញ្ចប់តំណែងលោក Jose Mourinho។

ក្នុងទំព័រ Twitter ផ្លូវការរបស់ខ្លួន កីឡាករអេក្វាឌ័រ Valencia បានសរសេរថា៖ "កាលពីម្សិលមិញ ខ្ញុំបានចុច Like លើរូបមួយដោយមិនបានមើលបណ្ដាអក្សរសរសេរនៅពីក្រោមរូបនោះ។ អត្ថន័យនៃការបង្ហោះនោះ មិនមែនជាការយល់ឃើញរបស់ខ្ញុំឡើយ ហើយខ្ញុំសុំទោសចំពោះការចុច Like នេះ"។

ខ្សែការពារស្លាប បានបន្ត៖ "ខ្ញុំគាំទ្រទាំងស្រុងនូវអ្នកចាត់ការ និងមិត្តរួមក្រុមរបស់ខ្ញុំ។ ពួកយើងនឹងខិតខំគ្រប់យ៉ាង ដើម្បីលេងឲ្យបានលទ្ធផលល្អជាងនេះ"។

នៅក្រោយប្រកួតស្មើជាមួយក្លឹបអេស្ប៉ាញ Valencia ក្នុងលទ្ធផល ០ ទល់នឹង ០ កីឡាករអេក្វាឌ័រ Antonio Valencia ត្រូវបានប្រទះឃើញថា បានចុច Like លើការបង្ហោះមួយក្នុង Instagram ដែលទាមទារឲ្យលោក Mourinho ចាកចេញពីក្លឹប Manchester United។

ការបង្ហោះក្នុង Instagram ដែល Valencia បានចុច Like (ការបង្ហោះមួយនេះត្រូវបានលុបចោលបាត់ហើយនៅពេលនេះ)

Manchester United បានបង្ហាញទម្រង់លេងមិនសូវបានល្អឡើយ ក្នុងដើមរដូវកាល ២០១៨/១៩។ ក្លឹបទើបត្រូវបានទម្លាក់ចេញពីកម្មវិធី League Cup ដោយក្លឹប Derby County ហើយកំពុងឈរលេខ ១០ ក្នុងតារាង Premier League មាន ១០ ពិន្ទុ (ឃ្លាត ៩ ពិន្ទុពីក្លឹប Manchester City ដែលកំពុងឈរកំពូលតារាង)។ ក្នុង ៤ ប្រកួតចុងក្រោយ ក្លឹបបិសាចក្រហមមិនស្គាល់ឡើយពាក្យថាឈ្នះ៕

ប្រភព៖ BBC | Twitter ប្រែសម្រួល៖ ហ៊ីម រស្មី