បើកឆាកសប្ដាហ៍ដំបូង ឡុង ជិន សន្លប់ ខណៈ វណ្ណថង ឈ្នះប្រផឹតប្រផើយ
- 2018-10-11 02:09:14
- ចំនួនមតិ 0 | ចំនួនចែករំលែក 0
បើកឆាកសប្ដាហ៍ដំបូង ឡុង ជិន សន្លប់ ខណៈ វណ្ណថង ឈ្នះប្រផឹតប្រផើយ
ចន្លោះមិនឃើញ
បើកឆាកសប្ដាហ៍ដំបូងពានរង្វាន់ ISI ទម្ងន់ ៥៧គីឡូក្រាម របស់សង្វៀន CNC អាទិត្យមុននេះ ឡុង ជិន ភ្លាត់ស្នៀតសន្លប់ទឹកទី៤ ខណៈជើងខ្លាំងមកពីខេត្តបាត់ដំបង ឈុត សេរីវណ្ណថង ឈ្នះថៃប្រផឹតប្រផើយ។
ឈុត សេរីវណ្ណថង ប្រាប់ឲ្យដឹងថា ប្រកួតដំបូងរបស់ខ្លួនក្នុងកម្មវិធីពានរង្វាន់ខាងលើនេះ ពិបាកគួរសមដែរ ព្រោះអីត្រូវប៉ះដៃគូមានកម្ពស់ខ្ពស់ជាង ហើយស្នៀតប្រយុទ្ធក៏ល្អ។ Photakvan គេល្អធាក់ ជាហេតុធ្វើខ្លួនពិបាកចូល ចំណែកស្នៀតចាប់ក៏ពូកែផងដែរ។ ម្ចាស់មេដាយប្រាក់កីឡាជាតិខាងលើបន្ថែមថា ប្រកួតនេះដែរកត្តាលំបាកមួយទៀតនោះ គឺទម្លាក់ទម្ងន់ច្រើនពេករហូតដល់ទៅ៤-៥គីឡូឯណោះ ជាហេតុធ្លាក់កម្លាំងវ៉ៃមិនសូវមានទម្ងន់។
លោក សាមិត្ត វឌ្ឍនៈឧត្តម តំណាងខាង ISI លើកឡើងក្នុងកម្មវិធីបើកឆាកខាងលើនេះដែរថា ពានរង្វាន់មួយនេះ ជាការរួមសហការគ្នាជាមួយខាងទូរទស្សន៍ CNC ដើម្បីលើកស្ទួយ និងអភិរក្សវិស័យកីឡាក្បាច់ខ្មែរបុរាណ និងជាការបម្រើអារម្មណ៍អ្នកនិយមទស្សនាប្រដាល់ផងដែរ។ តំណាងម្ចាស់ពានរង្វាន់រូបនេះលើក ក៏ថ្លែងអំណរគុណដល់សហព័ន្ធដែលតែងតែសហការគ្នាយ៉ាងស្អិតល្មួតក្នុងការបង្កើតឲ្យមានកម្មវិធីនានាផងដែរ។
បញ្ជាក់ដែរថា ពានរង្វាន់ ISI រដូវកាលទី៣ ទម្ងន់ ៥៧គីឡូក្រាម បានចាប់ផ្ដើមកាលពីថ្ងៃអាទិត្យទី៧ ខែតុលា ឆ្នាំ២០១៨ សប្ដាហ៍មុននេះហើយ ដោយ ឈុត សេរីវណ្ណថង ឈ្នះពិន្ទុថៃ Photakvan រីឯ ឡុង ជិន ចាញ់សន្លប់ទឹកទី៤ កីឡាករ Phutbunmi។ សុខ ធី និង ធន់ មករា នឹងត្រូវប្រកួតសប្ដាហ៍ដំបូងរបស់គេថ្ងៃអាទិត្យ ទី១៤ តុលា ២០១៨ នេះហើយ៕
វីដេអូប្រកួត ឈុត សេរីវណ្ណថង៖
វីដេអូប្រកួត ឡុង ជិន៖