ពិតទេ Liying និង Shaofeng ក្លាយជាប្ដីប្រពន្ធស្របច្បាប់ ក្រោយចុះសំបុត្ររៀបការស្ងាត់ៗ?

2018-10-11 02:06:29
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ មហាជនចិនជាច្រើនបានកំពុងចាប់អារម្មណ៍ខ្លាំងទៅលើព័ត៌មានដែលថា តារាសម្ដែង Zhao Liying និង Feng Shaofeng បានទៅចុះសំបុត្រអាពាហ៍ពិពាហ៍ជាមួយគ្នាដោយស្ងាត់ៗ។ ជាមួយនឹងព័ត៌មានដែលកំពុងទទួលបានការចាប់អារម្មណ៍នេះដែរ អ្នកលេងបណ្ដាញសង្គមម្នាក់បានបង្ហោះរូបភាពសំបុត្រអាពាហ៍ពិពាហ៍ ដែលអមជាមួយរូបនោះដែរ អ្នកលេងបណ្ដាញសង្គមរូបនោះ បានបញ្ជាក់ឈ្មោះតារាទាំង២រូបនោះមកជាមួយផងដែរ។

មិនត្រឹមតែប៉ុណ្ណឹងនោះទេ ខាងសារព័ត៌មាន Hong Kong ក៏បានបញ្ជាក់ដែរថា តារាសម្ដែង Zhao Liying បានរៀបការជាមួយតារាសម្ដែង Feng Shaofeng រួចមកហើយ កាលពីថ្ងៃទី ០១ ខែកញ្ញា នៅឯខាងរដ្ឋបាលស៊ីវិលក្រុងសៀងហៃ។ តារាសម្ដែង Feng Shaofeng គឺមកពីក្រុងសៀងហៃ ដូច្នេះហើយ ក្រោយចុះសំបុត្រអាពាហ៍ពិពាហ៍រួច លោកនិង Zhao Liying បានទៅទីក្រុង Hong Kong ដើម្បីទៅក្រេបទឹកឃ្មុំ។

អ្វីដែលអ្នកគាំទ្រចាប់អារម្មណ៍សាជាថ្មីនោះ នៅកាលដើមខែកញ្ញានោះ ពួកគេបានប្រទះឃើញគូស្នេហ៍តារាមួយគូនេះ បានដើរផ្សាទិញទំនិញនៅទីក្រុង Hong Kong ប៉ុន្តែនៅពេលនោះអ្នកគាំទ្រគិតថា ពួកគេគ្រាន់តែដើរលេងជាមួយគ្នាជាធម្មតាតែប៉ុណ្ណោះ។

ទោះជាយ៉ាងណាក៏ដោយ បច្ចុប្បន្ន តារាសម្ដែងទាំង២រូបនេះ នៅមិនទាន់ចេញមុខមកបកស្រាយពីទំនាក់ទំនងរបស់ពួកគេនៅឡើយទេ ខណៈអ្នកគាំទ្រជាច្រើនបានជឿជាក់ថា ដំណឹងល្អរបស់តារាទាំង២រូបនេះ នឹងត្រូវបានទម្លាយដោយពួកគេផ្ទាល់ក្នុងពេលឆាប់ៗខាងមុខនេះ៕

ប្រភព៖ Kenh14 ប្រែសម្រួល៖ អន សុភក្ត្រា