Samsung ធ្លោយដៃ បង្ហាញខ្ទេចរូបរាងទូរសព្ទមានកាមេរ៉ា ៤ គ្រាប់មុនគេក្នុងលោក

2018-10-11 03:18:56
ចំនួនមតិ 0 | ចំនួនចែករំលែក 0

ចន្លោះមិនឃើញ

Galaxy A9 (2018) ដែលជាស្មាតហ្វូនកាមេរ៉ា ៤ គ្រាប់ដំបូងគេក្នុងលោករបស់ Samsung នឹងត្រូវប្រកាសចេញជាផ្លូវការនៅថ្ងៃទី ១១ ខែតុលានេះ។ មុនការប្រកាសចេញនេះដែរ Samsung បានធ្វេសប្រហែសបង្ហាញខ្ទេចពីរូបរាងរបស់ A9 ប៉ុន្តែមិនបាននិយាយពីលក្ខណៈសម្បត្តិនោះទេ។

តាមរូបភាពបានបង្ហាញថា A9 មានប្រើប្រាស់អេក្រង់ Infinity Display ដែលជាអេក្រង់លាតសន្ធឹងមានគែមអេក្រង់ស្ដើង។ ផ្នែកខាងក្រោយមានបំពាក់កាមេរ៉ា ៤ គ្រាប់ជាលក្ខណៈបញ្ឈរ, មានទ្រនាប់ស្កេនម្រាមដៃ និងមានប្រើប្រាស់រចនាបថរំលេចពីរពណ៌។

កន្លងមកលក្ខណៈសម្បត្តិទាក់ទងនឹងកាមេរ៉ាទាំង ៤ គ្រាប់ក៏ត្រូវបានលេចធ្លាយផងដែរ។ កាមេរ៉ាទី ១ ជាប្រភេទ Ultra Wide អាចថតរូបបានក្នុងទំហំ ១២០ ដឺក្រេ, ទី ២ ជាកាមេរ៉ា Telephoto អាចធ្វើការ Zoom បែប Optical បានពីរដង, ទី ៣ ជាកាមេរ៉ាមេមាន Aperture f/1.7 និងទី ៤ ជាកាមេរ៉ាវាស់ជម្រៅប្រើសម្រាប់ផលិតរូបភាព Bokeh។

ទាក់ទងនឹងលក្ខណៈសម្បត្តិគ្រឿងក្នុងវិញគឺមានប្រើនូវបន្ទះឈីប Snapdragon 660 គួបផ្សំនឹង RAM ទំហំ ៦ GB និងអង្គផ្ទុកទំហំ ១២៨ GB។ ស្មាតហ្វូននេះក៏នឹងមានថ្មទំហំ ៣៧២០ mAh និងដើរដោយប្រព័ន្ធប្រតិបត្តិការ Android 8.1 Oreo៕