ក្រូអាតស្មើអង់គ្លេស ០-០ តែត្រូវប្រកួតគ្នាក្នុងកីឡដ្ឋានទទេដែលគ្មានអ្នកទស្សនា (វីដេអូ)

2018-10-13 03:37:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រូអាតនិងអង់គ្លេសត្រូវតែជម្នះនឹងបរិយាកាសចម្លែកក្នុងការប្រឈមមុខដាក់គ្នានៅក្នុងកីឡដ្ឋានដោយគ្មានអ្នកគាំទ្រក្នុងការប្រកួតក្របខ័ណ្ឌ UEFA Nations League កាលពីថ្ងៃសុក្រនៅ Rijeka ប្រទេសក្រូអាត។

ក្រុមម្ចាស់ផ្ទះក្រូអាតត្រូវលេងក្រោមការពិន័យរបស់ UEFA ក្រោយពេលទង់និមិត្តសញ្ញារបស់ជនផ្ដាច់ការណាស៊ី ហ៊ីត្លែរ ដែលត្រូវបានគេគូសក្នុងទីលានមុនពេលប្រកួតជម្រុះ Euro ២០១៦ ជាមួយអ៊ីតាលី។

ការប្រកួតម្សិលមិញ រវាងក្រូអាតនិងអង់គ្លេសគឺជាការប្រកួតបិទទ្វារ ហើយ អ្នកដែលអាចចូលទៅបានមានតែ មន្ត្រីរៀបចំការប្រកួត ភ្ញៀវ VIP មកពីសមាគមកីឡាបាល់ទាត់របស់ប្រទេសទាំង២ បុគ្គលិកបច្ចេកទេសរបស់ក្រុមនីមួយៗ អ្នកសារព័ត៌មាន និង ក្រុមប៉ូលីសរក្សាសន្តិសុខប៉ុណ្ណោះ ដែលមានវត្តមានក្នុងទីលានដ៏តូចចង្អៀតដែលអាចផ្ទុកប្រិយមិត្តបានត្រឹម ៨ ០០០ នាក់។

Luka Modric បានសារភាពថា "វាជាបរិយាកាសចម្លែកមួយសម្រាប់ក្រុមទាំង២ដែលលេងនៅពីមុខកីឡដ្ឋានទទេ"។ ប៉ុន្តែពួកគេត្រូវតែជម្នះឲ្យបាន។

លោក Gareth Southgate គ្រូបង្វឹកអង់គ្លេសបាននិយាយថា លោកក៏បានឲ្យវីដេអូជំនួបបិទទ្វារគ្នារវាង Barcelona និង Las Palmas នៅកីឡដ្ឋាន Nou Camp កាលពីរដូវកាលមុនឲ្យកូនក្រុមលោកមើលដើម្បីឲ្យកីឡាករមានអារម្មណ៍ថាទទួលបទពិសោធន៍បែបនោះ។

មុននេះបន្តិច អង់គ្លេស និង ក្រូអាតប៉ះគ្នានៅវគ្គពាក់កណ្ដាលផ្ដាច់ព្រ័ត្រ World Cup នៅកីឡដ្ឋាន Luzhniki ប្រទេសរុស្ស៊ីមានអ្នកគាំទ្រដល់ទៅ ៧៨ ០០០ នាក់៕