តួចិនល្បី Chow Yun Fat សុខចិត្តបរិច្ចាគទឹកប្រាក់ផ្ទាល់ខ្លួន ៧១៤លានដុល្លារ ថាមិនមែនជាទ្រព្យសម្បត្តិលោក

2018-10-16 03:05:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចិនដ៏ល្បី Chow Yun Fat ដែលយើងបានស្គាល់លោកតាមរយៈការសម្ដែងក្នុងរឿង ជើងកន្ដ្រៃហោះ "Crouching Tiger, Hidden Dragon” កាលពីទសវត្សរ៍៩០ ពេលនេះបានបង្ហាញពីគម្រោងកេរមរតក ធ្វើឲ្យពិភពលោកភ្ញាក់ផ្អើល។ តារាសម្ដែងវ័យ៦៣ឆ្នាំរូបនេះ ប្រាប់ទស្សនាវដ្ដី Jayne Stars ក្នុងកិច្ចសម្ភាសន៍ថ្មីៗនេះថា លោកមានគម្រោងបរិច្ចាគទឹកប្រាក់ទាំងអស់ ៧១៤លានដុល្លាររបស់ខ្លួន ឲ្យទៅសប្បុរសធម៌។

“សុបិនរបស់ខ្ញុំគឺដើម្បីរស់នៅដោយសប្បាយចិត្ត តាមបែបជាមនុស្សធម្មតាមួយរួប។" លោកបានថ្លែងប្រាប់ សារព័ត៌មានដដែលនេះថាដូច្នេះ។ លោកបន្ថែមថា "អ្វីដែលលំបាកបំផុតនោះ គឺមិនមែនពីចំនួនទឹកប្រាក់ដែលអ្នករកបាននោះទេ ប៉ុន្តែគឺការធ្វើឲ្យអារម្មណ៍របស់អ្នកមានភាពស្ងប់សុខ និងមិនខ្វល់ខ្វាយទៅវិញទេ ដែលពិបាកធ្វើនោះ។"

មិនត្រឹមតែប៉ុណ្ណោះតួល្បីរូបនេះ បញ្ជាក់ថាខ្លួនចំណាយទឹកប្រាក់តែ ១០២ដុល្លារប៉ុណ្ណោះក្នុងមួយខែ ដើម្បីរស់នៅដោយខ្លួនឯង។ លោកបានប្រើប្រាស់ទូរស័ព្ទ Nokia យ៉ាងកញ្ចាស់អស់រយៈពេល ១៧ឆ្នាំ រហូតដល់វាខូច ហើយក៏សម្រេចចិត្តទិញ Smartphone ប្រើប្រាស់កាលពី២ឆ្នាំមុន។

ចំពោះមួលហេតុនៃការបរិច្ចាគទឹកប្រាក់មហាសាលបែបនេះ Chow និយាយថាទឹកប្រាក់នេះ មិនមែនជារបស់លោកទេ លោកគ្រាន់តែរក្សាទុកវាប៉ុណ្ណោះ។ លោកគិតថាទឹកប្រាក់នេះ គួរតែប្រើប្រាស់ឲ្យមានប្រយោជន៍នឹងជាជំនួយដល់អ្នកខ្វះខាតក្នុងជីវិត៕