រវល់តែចម្លង iPhone ក្រុមហ៊ុនស្មាតហ្វូន Android បាត់បង់ឱកាសមាស

2018-10-16 03:49:59
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីឆ្នាំទៅ Apple បានប្រកាសចេញ iPhone ដែលមានរូបរាងខុសប្លែកពីស្មាតហ្វូនលើទីផ្សារ នោះគឺ iPhone X ដែលមានក្បាលឆក។ ប៉ុន្មានខែក្រោយមករចនាបថនេះបានលេចចេញជាហូរហែរលើស្មាតហ្វូន Android មានចាប់តាំងពី OnePlus 6, LG G7 ThinQ, Huawei P20 Pro និង Pixel 3 XL ជាដើម។

តាមពិតទៅក្បាលឆកនេះបានលេចមុខក្នុងទីផ្សារសកលដំបូងគេលើ Essential Phone ជាស្មាតហ្វូនផលិតដោយក្រុមហ៊ុនរបស់លោក Andy Rubin ដែលជាស្ថាបនិកប្រព័ន្ធប្រតិបត្តិការ Android។ ទោះយ៉ាងណារចនាបថនេះទទួលបានភាពល្បីល្បាញក្រោយពី Apple ប្រកាសចេញ iPhone X។

តាមការលើកឡើងរបស់ Business Insider រចនាបថរបស់ Apple បានជះឥទ្ធិពលដល់សហគ្រាសស្មាតហ្វូនទាំងមូល។ ជាច្រើនឆ្នាំមកហើយ មានក្រុមហ៊ុនច្រើនបានព្យាយាមដើរតាមទំនោរដែល Apple បង្កើតឡើង។ តួយ៉ាងទ្រនាប់ស្កេនម្រាមដៃ និងជំនួយការសិប្បនិម្មិតមិនសូវទទួលបានការចាប់អារម្មណ៍ខ្លាំង រហូតដល់ពេល Apple បំពាក់វាលើ iPhone របស់ខ្លួន។

ការដើរតាមទំនោរ Apple នេះនៅតែបន្តកើតមានពេលដែល iPhone X បានបង្ហាញខ្លួន។ ក្រុមហ៊ុនជាច្រើនបានផលិតស្មាតហ្វូនមានក្បាលឆក និងមានអេក្រង់លាតពេញផ្ទៃដូចគ្នានឹង iPhone X។

ប៉ុន្តែពេលកំពុងដើរតាម Apple នេះ ក្រុមហ៊ុនផលិតស្មាតហ្វូន Android បានភ្លេចគិតថាពួកគេមិនបានបង្កើតអ្វីថ្មីនោះទេ។ នេះមានន័យថាពួកគេបានខកខានឱកាសមាសបង្កើតអ្វីថ្មី ដើម្បីអាចនាំមុខ Apple។

មានក្រុមហ៊ុនដទៃទៀតបានព្យាយាមគេចចេញពីរចនាបថក្បាលឆក ដោយបង្កើតរចនាបថថ្មីផ្ទាល់ខ្លួន ដូចជា Oppo និង Vivo បានរិះរកវិធីសាស្ត្របង្កប់កាមេរ៉ាក្នុងតួខ្លួនជាដើម។ ខណៈដែល Samsung នៅតែមានជំនឿជឿជាក់លើរចនាបថ Infinity Display របស់ខ្លួន។ ទោះយ៉ាងណាក្រុមហ៊ុនដទៃទៀតរួមមាន Google ស្ម័គ្រចិត្តទទួលយករចនាបថក្បាលឆកដោយមិនប្រកួតប្រជែង ឬ ធ្វើឲ្យក្បាលឆកនេះប្រសើរជាងមុននោះទេ។

តាមការលើកឡើងរបស់អ្នកជំនាញខាងផ្នែកបច្ចេកវិទ្យា ក្រុមហ៊ុនផលិតស្មាតហ្វូនមួយចំនួនយល់ថាពេលដែលមានក្បាលឆក ធ្វើឲ្យស្មាតហ្វូនរបស់ពួកគេហាក់ដូចជាកំពុងប្រកួតប្រជែងជាមួយ Apple។ យ៉ាងណាក្ដីពេលដែល iPhone លែងប្រើប្រាស់ក្បាលឆកនៅថ្ងៃណាមួយ ក្រុមហ៊ុនទាំងនោះនឹងប្រឈមមុខបញ្ហាថ្មី ដោយគួរប្រើរចនាបថក្បាលឆកតទៀត ឬ ផ្លាស់ប្ដូរទៅតាមទំនោរថ្មីដែល Apple បង្កើតឡើង៕

ប្រភព៖ vnexpress ប្រែសម្រួល៖ សុខហេង