ទើបភ្ជុំហើយ ពិធីករ រ៉ាស៊ី ទម្លាក់រាប់ម៉ឺនដុល្លារបន្ថែម វិនិយោគលើមុខជំនួញមានស្រាប់
- 2018-10-16 04:07:25
- ចំនួនមតិ 0 | ចំនួនចែករំលែក 0
ទើបភ្ជុំហើយ ពិធីករ រ៉ាស៊ី ទម្លាក់រាប់ម៉ឺនដុល្លារបន្ថែម វិនិយោគលើមុខជំនួញមានស្រាប់
ចន្លោះមិនឃើញ
ទើបផុតរដូវភ្ជុំប៉ុន្មានថ្ងៃ ពិធីករទូរទស្សន៍ លី រ៉ាស៊ី បានវិនិយោគបន្ថែមលើជំនួញមានស្រាប់របស់ខ្លួន ប្រមាណជាង ៣ម៉ឺនដុល្លារបន្ថែមទៀត ខណៈរដូវការខិតជិតមកដល់។ នេះបើតាមការអះអាងរបស់សាមីខ្លួន។
ពិធីករទូរទស្សន៍ លោក រ៉ាស៊ី បានហក់ទៅរកស៊ី ខាងផ្គត់ផ្គង់ ឧបករណ៍តន្ត្រីសម្រាប់ពិធីនានា ដូចជាជប់លៀង បុណ្យ មង្គលការ ខួបកំណើត ជាដើម ដែលមានផ្គត់ផ្គង់ Sound System , Stage និងប្រព័ន្ធភ្លើង (Lighting)។។ មុខរបរនេះ បានដំណើរការអស់រយៈពេលប្រមាណជិត ១០ឆ្នាំមកហើយ ដោយលោកបានចាប់ផ្ដើមដំបូងតាំងពីឆ្នាំ ២០១១ ហើយបានបន្តរីកចម្រើនរហូតមក។
សរុបទុនវិនិយោគកន្លងមក ប្អូនប្រុសលោក អៀង ចេនឡា បញ្ជាក់ថា មានប្រមាណជា ៦ម៉ឺនដុល្លារអាមេរិក។ តួលេខនេះ គឺជាការសរុបតួលេខវិនិយោគជាដំណាក់ៗ។ "អឹម...កប់ដើមអស់ច្រើនដែរ...អីចឹងស្មានអត់ដឹងទេបងអើយ ព្រោះសន្សំតិចម្ដងបន្តិចៗ ព្រោះចេះទិញបន្ថែមបន្តបន្ទាប់ ម្ដងបន្តិចៗ...សន្សំបានបន្តិច ទិញបន្តិច...តែបើឲ្យស្មានទៅ ខ្ទង់ជាង ៦ម៉ឺនដុល្លារអីហ្នឹង!”។
ជាមួយនឹងការអះអាងខាងលើ គេឃើញលោក រ៉ាស៊ី បង្ហាញឧបករណ៍ទំនើបៗ ថ្មីៗទៀត បម្រើឲ្យកម្មវិធីពិធីការនានា ដែលទើបនាំមកដល់ប៉ុន្មានថ្ងៃមុន។ លោកអះអាងថា បានទម្លាក់លុយអស់ ៣៥ ០០០ដុល្លារ បន្ថែមទៀត ដើម្បីពង្រីកមុខជំនាញឲ្យកាន់តែធំ កាន់តែឆ្លើយតបបានល្អទៅនឹងតម្រូវការទីផ្សារ ក៏ដូចជាតម្រូវការអតិថិជន។
ចំពោះការវិនិយោគបន្ថែមនេះ គឺជាទម្លាប់ដែលលោកធ្វើរាល់ឆ្នាំ។ "និយាយទៅខ្ញុំទិញរាល់ឆ្នាំបង ឲ្យតែជិតដល់រដូវការ គឺខ្ញុំទិញថែមហើយ ជាក់ស្ដែង ឲ្យតែដល់ខែ ១២ គឺមានតម្រូវការច្រើនហើយ ហើយមុនដល់ គឺខ្ញុំទិញបន្ថែមរាល់ៗឆ្នាំ!"។ រ៉ាស៊ី មិនបានបញ្ចេញតួលេខពីចំណូលប្រចាំខែ ពីរបរនេះឡើយ ប៉ុន្តែលោកអះអាងថា រយៈពេលកន្លងមក គឺដំណើរការល្អ។
ទទួលផ្លែផ្កាពីអាជីពសិល្បៈ និងមុខជំនួញផ្គត់ផ្គង់ប្រព័ន្ធភ្លើង សំឡេង និងឆាកតន្ត្រី ពិធីករទូរទស្សន៍ រ៉ាស៊ី ក៏ត្រូវបានគេដឹងថា ជាវិនិយោគដីឡូតិ៍ផងដែរ ដោយថ្មីៗនេះ លោកបានហក់ទៅវិនិយោគពុះដីឡូតិ៍លក់នៅខេត្តបាត់ដំបង៕