ម្ដងនេះ បូព្រឹក្សទម្លាយអារម្មណ៍ខ្ទេចគ្មានសល់ ពេលបទចម្រៀងស្ងាត់នៅហង្សមាស

2018-10-18 02:34:22
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា ទេព បូព្រឹក្ស បានរៀបរាប់ពីការមិនសប្បាយចិត្ត ដែលអស់ពេលកន្លះឆ្នាំមកហើយ គ្មានបទចម្រៀងថ្មីនៅផលិតកម្មហង្សមាស ហើយចង់ផលិតបទថ្មីក៏មិនបានថែមទៀត។ បញ្ហាស្មុគស្មាញរយៈពេលប៉ុន្មានខែចុងក្រោយនេះ ធ្វើឲ្យបូព្រឹក្ស មានអារម្មណ៍មិនសូវល្អនោះទេ រហូតពេលខ្លះឈឺក្បាល ស្រ្តេស គេងមិនលក់ជាដើម។

វីដេអូក្នុង IG របស់ម្ចាស់បទ " My សង្សារ" ក៏បានទម្លាយមូលហេតុថា ដោយសារផលិតកម្មនេះធំ មានតារាចម្រៀងច្រើន ដូច្នេះបទចម្រៀងត្រូវរៀបចំតាមលំដាប់លំដោយ។ ម្យ៉ាងទៀត បទចម្រៀងថ្មីរបស់គូស្នេហ៍ G-Devith តែងមានអ្នកចូលមកបញ្ចេញមតិមិនសូវល្អថែមទៀត ជាហេតុធ្វើឲ្យផលិតកម្មមិនសូវផ្ដល់ឱកាសឲ្យទទួលបានបទថ្មីច្រៀងនោះទេ។

ចំណែកបទចម្រៀងផលិតយកទៅបង្ហោះតាម Youtube គឺមិនអាចទៀតដែរ ព្រោះកញ្ញា ជាតារាចម្រៀងមានកុងត្រានៅផលិតកម្ម ដូច្នេះរាល់បទចម្រៀងផ្សេងៗត្រូវឆ្លងកាត់ផលិតកម្ម។ ប៉ុន្តែកញ្ញា និយាយថា បទចម្រៀងខ្លះផលិតរួច ឲ្យផលិតកម្មចេញឲ្យ ត្រូវប្រើរយៈពេលយូរថែមទៀត។

ទោះជាបទចម្រៀងរបស់ខ្លួនស្ងប់ស្ងាត់ក៏ដោយ តែបូព្រឹក្ស បានបញ្ជាក់ក្នុងវីដេអូនោះថា ខ្លួនមិនចាកចោលផលិតកម្មជាទីស្រលាញ់មួយនេះទេ ព្រោះទម្រាំបានចូលច្រៀងនៅទីនេះ តារាអាយុ២៥ឆ្នាំ តស៊ូលំបាកច្រើនណាស់។ ចំណែកគូស្នេហ៍របស់នាងវិញ នៅពេលអ្នកគាំទ្រសួរថា តើ Devith អាចវិលមកហង្សមាសវិញឬទេ? បូព្រឹក្ស និយាយថា Devith មិនត្រលប់មកវិញទេ ហើយលោកទំនងជាទៅកន្លែងផ្សេង៕

អត្ថបទ៖ លឹម សុនា