ទឹម វ៉ាយុ ថាចូលប្រឡូកសិល្បៈលើកដំបូងមានតែ ឯម រៀម ម្នាក់គត់ដែលយល់ចិត្តខ្លួន

2018-10-18 04:10:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះបីពេលនេះតារាសម្ដែងនិង បង្ហាញម៉ូដ ទឹម វ៉ាយុ មានកេរ្តិ៍ឈ្មោះបោះសំឡេងក្នុងវិស័យសិល្បៈក្ដីលោកនៅតែចង់ចាំមិនភ្លេច ចំពោះទង្វើ និងសកម្មភាពល្អនាពេលកន្លងមកដែលបណ្ឌិតច្នៃម៉ូដ ឯម រៀម ធ្វើដាក់ខ្លួន។

វ៉ាយុ ថា មុនក្លាយជាតារាសម្ដែងមានពុកម៉ែបងប្អូនស្គាល់ដូចសព្វថ្ងៃនេះលោក ចូលប្រឡូកសិល្បៈមុនដំបូងនៅក្រុមហ៊ុនដើរម៉ូដមួយក្រោមការជ្រោមជ្រែង និងជួយណែនាំពីលោក ឯម រៀម ។ ហេតុដូច្នេះហើយទើបលោកមិនភ្លេចគុណបណ្ឌិតច្នៃម៉ូដរូបនេះ។ សូម្បីតែពិធីសម្ពោធដាក់បញ្ចាំងជាផ្លូវការនូវខ្សែភាពយន្តខ្នាតធំដែលខ្លួនសម្ដែងកាលពីពេលថ្មីៗនេះ លោក ឯម រៀម ក៏បានទៅចូលរួមលើកទឹកចិត្តផងដែរ។

“ខ្ញុំស្រឡាញ់ចូលចិត្ត និងគោរពបង ឯម រៀម ព្រោះគាត់ជាមនុស្សម្នាក់ដែលយល់ពីចិត្តខ្ញុំដែលស្រឡាញ់សិល្បៈដូចគ្នា។ ពេលជួបគាត់លើកដំបូងខ្ញុំបានប្រាប់ទៅគាត់ថា ខ្ញុំស្រឡាញ់ផ្នែកដើរម៉ូដ ពេលហ្នឹងគាត់ក៏យកទៅខ្ញុំទៅផ្ញើនៅក្រុមដើរម៉ូដមួយ"។កំលោះសង្ហា ទឹម វ៉ាយុ បន្ថែម។

ក្រោយពីចប់កម្មវិធីដើរម៉ូដរួចមក វ៉ាយុ ត្រូវបានផលិតកម្មក្នុងស្រុកជាច្រើនបានទាក់ទងឲ្យសម្ដែងខ្សែភាពយន្តភាគជាបន្តបន្ទាប់មានដូចជារឿង"ផ្ទះចិញ្ចឹមខ្មោច" “ថតកុន" “ម្ចាស់ចម្ការ" “កាហ្វេឡាតេ" និងជាច្រើនរឿងទៀត។

គ្រប់រឿងដែលលោក សម្ដែងភាគច្រើនផលិតករតម្រូវឲ្យដើរតួអង្គម្នាក់ដែលមានចរិតលក្ខណៈខូចខិល តែមានស្នេហ៍ស្មោះ ដែលផ្ទុយស្រឡះពីចិត្តខ្លួនចង់សម្ដែងជាតួអង្គបែបសុភាពបុរស។ ទឹម វ៉ាយុ ជាកូនអ្នកភ្នំពេញ ចូលប្រឡូកសិល្បៈមុនដំបូងតាមរយៈការដើរម៉ូដក្នុងឆ្នាំ២០១៥៕