ទឹកចិត្តផលិតករភាពយន្តខ្នាតធំខ្មែរ ចំណាយខ្ទង់ម៉ឺនដុល្លារ មិនខ្លាចខាតបង់ព្រោះតែហេតុផលមួយ

2018-10-18 04:52:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតករខ្មែរជាច្រើនតែងលើកពីការខាតបង់ក្នុងវិស័យភាពយន្ត ដោយសារការហូរចូលភាពយន្តបរទេស និងបញ្ហាជាច្រើនផ្សេងៗទៀត ខណៈនៅមានផលិតករមួយចំនួនទៀត ទោះមើលឃើញពីភ្យុះភ្លៀងបែបណាក៏មិនដកថយ។

លោក ឆាយ បូរ៉ា

ក្នុងនោះតួយ៉ាងលោក ឆាយ បូរ៉ា ផលិតករភាពយន្តពីផលិតកម្មដើមត្នោត ធ្លាប់ប្រាប់ Sabay ថាគោលបំណងរបស់លោក គឺចង់ឱ្យភាពយន្តខ្មែរនៅមានជីវិត គិតខ្មាសប្រទេសជិតខាងដែលភាពយន្តគេកំពុងរីកចម្រើន ស្របពេលប្រទេសមានសន្តិភាពដូចគ្នា។

លោក សុខ វិសាល

ក្រៅពីលោក ឆាយ បូរ៉ា នៅមានលោក សុខ វិសាល ម្ចាស់ផលិតកម្ម Klap ya Handz លោក សែម វិសាល ម្ចាស់ផលិតកម្ម Wonder Film និងផលិតករខ្មែរជាច្រើនរូបទៀត ក៏កំពុងបន្តការងារផលិតស្នាដៃរបស់ខ្លួនក្នុងស្ថានភាពធ្វើក៏ខាតមិនធ្វើក៏ខាត តែចំណេញជាតិ ដូចនេះត្រូវតែផលិតភាពយន្តខ្មែរ តាមសម្ថភាព ទោះជាបានតិច ក៏ប្រសើរជាងមិនធ្វើសោះដែរ។

លោក សែម វិសាល

ក្នុងដំណើរការផលិតភាពយន្តមួយឱ្យបានជាវីដេអូ ចំណាយពេលវេលាមិនតិចជាង កន្លះឆ្នាំ ទៅ១ ឬក៏២ឆ្នាំនោះទេ ដើម្បីតែសរសេរសាច់រឿង និងត្រៀមថត។ ធនធានជាច្រើនបានប្រើប្រាស់សម្រាប់ផលិតជាស្នាដៃមួយ ពិសេសការចំណាយជាថវិកាយ៉ាងច្រើនលើការផលិតខ្សែភាពយន្តចាប់ពី នាទីទី ១ រហូតដល់នាទីទី ៦០ ឬ ទី ១២០ សុទ្ធតែជាទឹកលុយ ទឹកចិត្តរបស់ក្រុមអ្នកផលិត នេះបើតាមការលើកឡើងរបស់លោក ឆាយ បូរ៉ា។

លោក សៅ សុខនី នាយកគ្រប់គ្រងរោងភាពយន្ត Major Cineplex by Smart

លោក សៅ សុខនី នាយកគ្រប់គ្រងរោងភាពយន្ត Major Cineplex by Smart បានប្រាប់ឱ្យដឹងថា ភាពយន្តខ្មែរជាចលករជំរុញឱ្យរោងភាពយន្តមានដំណើរការ និងរីកចម្រើនមកដល់សព្វថ្ងៃ។ លើសពីនោះទៀត ភាពយន្តខ្មែរក៏កាន់តែរីកចម្រើន និងមានគុណភាពតាមស្តង់ដាររោងភាពយន្តទំនើប នៅសល់ត្រឹមតែការពង្រឹងគុណភាពសាច់រឿង និងការបង្កើតថ្មីឱ្យស្របតាមការចង់បានរបស់ទស្សនិកជនដែលមកទស្សនាភាពយន្តនៅក្នុងរោងភាពយន្តតែប៉ុណ្ណោះ។

រូបភាពពេលផលិតករត្រៀមផលិតភាពយន្ត

យ៉ាងណាមិញ រូបលោកក៏មើលឃើញពីការខាតបង់ និងផលវិបាករបស់ផលិតករភាពយន្តខ្មែរដូចគ្នា ដូចនេះហើយទើបរោងភាពយន្តក៏នៅតែបន្តលើកទឹកចិត្តគាំទ្រស្នាដៃភាពយន្តខ្មែរ ថែមទាំងព្យាយាមជួយផ្សព្វផ្សាយភាពយន្តខ្មែរ និងទទួលភាពយន្តទោះក្នុងគុណភាពមិនទាន់ប្រសើរ ឱ្យតែមានទិដ្ឋាការពីនាយកដ្ឋានភាពយន្ត និងផ្សព្វផ្សាយវប្បធម៌។ លោក បន្តថា គ្រប់គ្នាក្នុងឧស្សាហកម្មភាពយន្តខ្មែរ ចង់ឃើញតែភាពរីកចម្រើនរបស់ភាពយន្តខ្មែរ ដែលយើងគ្រប់គ្នាគួរតែព្យាយាមបង្កើនសមត្ថភាពរបស់ខ្លួន ឱ្យតាមការចង់បានភាពរីកចម្រើននោះដែរ៕