អាចលង់ខ្លួនគ្មានពាក្យតវ៉ា បើទៅខ្ចីប្រាក់ពីធនាគារទិញផ្ទះ ឬរកស៊ី មិនដឹងរឿងទាំង៣នេះ
- 2018-10-18 04:40:47
- ចំនួនមតិ 0 | ចំនួនចែករំលែក 0
អាចលង់ខ្លួនគ្មានពាក្យតវ៉ា បើទៅខ្ចីប្រាក់ពីធនាគារទិញផ្ទះ ឬរកស៊ី មិនដឹងរឿងទាំង៣នេះ
ចន្លោះមិនឃើញ
និយាយពីរឿងខ្ចីប្រាក់ពីធនាគារ ឬមីក្រូហិរញ្ញវត្ថុ ថ្ងៃនេះ Sabay សូមចែករំលែកចំណេះដឹងទាក់ទិននឹងការផ្ដល់ប្រាក់កម្ចីរបស់ស្ថាប័នហិរញ្ញវត្ថុ តាមរយៈបុគ្គលិកធនាគារម្នាក់ លោក គង់ រីរៈ ដែលលោកបានបង្ហើបនូវចំណុច៣ សំខាន់ មុននឹងសម្រេចចិត្តខ្ចីប្រាក់ អ្នកទាំងអស់គ្នា ពិសេសអ្នកថ្មីថ្មោង ដែលចង់ខ្ចីប្រាក់សម្រាប់ធ្វើការរកស៊ី និងទិញអចលនវត្ថុជាដើម។
ដំបូងអ្នកត្រូវដឹងថា ធនាគារ មីក្រូហិរញ្ញវត្ថុ នៅកម្ពុជា រីកដុះដាលដូចផ្សិត ហើយគេមើលឃើញការប្រកួតប្រជែងគ្នាក៏ខ្លាំងសំបើមដែរ ដោយគេអូសទាញអតិថិជនតាមរយៈ ផ្ដល់អត្រាការប្រាក់ទាប ប្រម៉ូសិន លក្ខខណ្ឌខ្ចី ឯកសារតម្រូវងាយស្រួល...ល។ យ៉ាងណាក្ដី ប្រិយមិត្តសូម កុំវង្វេងនឹងកម្មវិធីប្រូម៉ូសិនទាំងនោះច្រើន ប៉ុន្តែត្រូវដឹងឲ្យច្បាស់ពី ៣ ចំណុច ខាងក្រោមនេះ៖
១. អត្រាការប្រាក់
ចំនួនអត្រាការប្រាក់ គឺរឿងដំបូងគេ អ្នកត្រូវសិក្សា និងសាកសួរពីធនាគារ ឬមីក្រូហិរញ្ញវត្ថុណាមួយដែលអ្នកជឿជាក់ ប៉ុន្តែគួរស្វែងរកយ៉ាងហោចណាស់ឲ្យបាន៣។ មានន័យថា អ្នកអាចប្រៀបផ្ទឹមពីអត្រាការប្រាក់ពីគ្រឹះស្ថានហិរញ្ញវត្ថុទាំងនោះ ដោយខ្លួនឯង។ ឧទាហរណ៍. អ្នកចង់ខ្ចីចំនួន ១០ ០០០ដុល្លារ ធនាគារ (ក) បានផ្ដល់អត្រាការប្រាក់ដល់អ្នក ១,១% ក្នុងមួយខែ។ ដោយឡែកធនាគារ(ខ) ផ្ដល់អត្រាការប្រាក់ ០.៩% ក្នុងមួយខែ។ ក្រោយគណនា បើលោកអ្នកខ្ចីធនាគារ (ខ) អ្នកនឹងចំណេញ ២០ដុល្លារ ក្នុងមួយខែ។
២. រយៈពេលសង
ធនាគារមួយចំនួន ផ្ដល់អត្រាការប្រាក់ទាបក៏ពិតមែន ប៉ុន្តែរយៈពេលក្នុងសងត្រឡប់គឺយូរ តួយ៉ាង ផ្ដល់កម្ចីចាប់ពី ១០ ០០០ដុល្លារ ក្នុងអត្រាការប្រាក់ ០.៩%/ខែ រយៈពេល ១៥ឆ្នាំ បើអ្នកគុណគូអត្រាការប្រាក់ទៅ គឺលើសប្រាក់កម្ចីដើមជិត២ដងឯណោះ។ រីឯធនាគារខ្លះទៀត មានផ្ដល់ប្រាក់កម្ចីច្រើន ក្នុងអត្រាការប្រាក់ទាបជាងគេ ប៉ុន្តែលក្ខខណ្ឌ និងឯកសារតម្រូវទាមទារតឹងតែង។ ដើម្បីជៀសវាងកើតមានបញ្ហាថ្ងៃមុខ អ្នកមិនគួរដាក់សំណើកម្ចី ទាំងដែលមិនទាន់យល់ច្បាស់ពីលក្ខខណ្ឌ ព្រោះអ្នកអាចនឹងមិនទទួលបានការអនុម័ត និងខាតពេលវេលា។ ជាយោបល់ល្អសម្រាប់អ្នកមិនចង់ស្មុគស្មាញច្រើន គួរស្វែងរកធនាគារ ឬមីក្រូហិរញ្ញវត្ថុណាដែលមានលក្ខខណ្ឌ ឯកសារងាយស្រួល ស្របទៅតាមលក្ខខណ្ឌរបស់អ្នក។
៣. តម្លៃសេវារដ្ឋបាល
ក្រសួងសេដ្ឋកិច្ច និង ហរិញ្ញវត្ថុ កន្លងទៅ បានប្រកាសឲ្យធនាគារ និង មីក្រូហិរញ្ញវត្ថុទាំងអស់ កំណត់អត្រាការប្រាក់កម្ចីមិនលើសពី ១៨% ក្នុងមួយឆ្នាំ ឬ ក្រោម ១,៥% ក្នុងមួយខែ។ ការកំណត់នេះ ធ្វើឲ្យខាងធនាគារ និងមីក្រូមួយចំនួន ចាំបាច់ត្រូវដំឡើងថ្លៃសេវារដ្ឋបាលជាមួយអតិថិជន។ សេវារដ្ឋបាលនេះ សំដៅដល់ថ្លៃសេវារៀបចំឯកសារ និង ការគ្រប់គ្រងឯកសារផ្សេងៗ។ ដូច្នេះ មុននឹងលោកអ្នកដាក់សំណើកម្ចី ត្រូវសួរឲ្យបានច្បាស់លាស់ពីសេវារដ្ឋបាល និង សេវាផ្សេងៗទៀត ដែលធនាគារ និង មីក្រូ អាចទាញផ្ដល់ចំនេញពីអ្នកក្នុងរូបភាពផ្សេងៗ។