តាមឲ្យកៀក បានដឹងថាប៉ុន្មានឆ្នាំមកនេះ ស្មាតហ្វូន Android និង iPhone ចម្លងគ្នាទៅវិញទៅមកទេ

2018-10-18 12:11:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការវិវត្តបច្ចេកវិទ្យានិងរចនាតួខ្លួនលើស្មាតហ្វូនសេរ៊ីក្រោយ ក្រុមហ៊ុនយក្សធំៗដូចជា Apple, Samsung, Huawei និង Oppo បានសម្រិតសម្រាំងយ៉ាងយកចិត្តទុកដាក់ រហូតមានមុខងារនិងការកែច្នៃខ្លះក៏ត្រូវបានគេដឹងថាមានការចម្លងតាមគ្នា។

+៤ ចំណុចធំ iPhone ចម្លងតាម Android:

១.អេក្រង់ OLED:

ជាអេក្រង់ធុនថ្លៃមានបំពាក់លើ iPhone X នាចុងឆ្នាំ ២០១៧ ប៉ុន្តែបើត្រលប់ទៅកាលពីឆ្នាំ ២០១០ ក្រុមហ៊ុនកូរ៉េខាងត្បូង SAMSUNG ជាអ្នកណែនាំនូវបច្ចេកវិទ្យានេះមុនគេបង្អស់ ដោយសឹងគ្រប់ត្រកូល Galaxy របស់ខ្លួនសុទ្ធសឹងបំពាក់នូវអេក្រង់ OLED។ អត្ថប្រយោជន៍នៃអេក្រង់ធុននេះ ក្រៅពីការបង្ហាញកម្រិតរូបភាពច្បាស់ដិតល្អ ទៀតសោតក៏ជួយសន្សំសំចៃថាមពលប្រើប្រាស់មួយផ្នែកធំបើធៀបនឹងបន្ទះអេក្រង់ LCD។

២.Wireless Charge:

ជំនាន់ iPhone 8/8 Plus ក្រុមហ៊ុន Appleបានរចនាស្រោបតួខ្លួនក្រោយដោយកញ្ចក់ ផ្លាស់ពីការប្រើសារធាតុអាលុយមីញ៉ូម ដើម្បីអាចឲ្យឧបករណ៍គាំទ្រមុខងារសាកថ្មឥតខ្សែ។ វិលទៅឆ្នាំ ២០១២ ស្មាតហ្វូន Nexus 4 បានបង្ហាញនូវបច្ចេកវិទ្យានេះដំបូងគេបង្អស់ ផ្តល់ភាពងាយស្រួលសម្រាប់អ្នកប្រើប្រាស់ធុញនឹងការដកដោតខ្សែសាកច្រើនលើកច្រើនសារ។

៣.Raise To Wake:

ក្នុងកំណែ iOS 10 ក្រុមហ៊ុនរបស់លោក Tim Cook ក៏ប្រកាសនូវមុខងារគោះអេក្រង់ដើម្បីងើប ដោយជាញឹកញយនរណាក៏ដឹងម៉ូឌែល Android ជាច្រើនមានប្រើប្រាស់ជាហូរហែ។ ប៉ុន្តែបើជីកឲ្យដល់ដើមកំណើតនៃមុខងារ Raise To Wake មានប្រើដំបូងលើស្មាតហ្វូន Moto X នៃក្រុមហ៊ុន Motorola។

៤.អាវក្រោះការពារទឹក:

Water Resistance ជាមុខងារការពារជម្រាបទឹកដែល Sony បានដាក់បង្ហាញមុនក្រុមហ៊ុនណាៗទាំងអស់ លុះក្រោយមកចូលដល់ឆ្នាំ ២០១៤ ត្រកូល Galaxy S របស់ SAMSUNG ក៏បន្តលេចចេញមុខងារនេះដូចគ្នា។ ប៉ុន្តែមានការភ័ន្តច្រឡំពីមតិមួយចំនួនថាជំនាន់ iPhone 7/7 Plus ប្រកាសឆ្នាំ ២០១៦ ជាអ្នករំលេចអាវក្រោះការពារទឹកដំបូងគេក្នុងលោក។

+២ ចំណុចធំ Android ចម្លងតាម iPhone:

១.ការដករន្ធដោតកាស:

នៅឆ្នាំ ២០១៦ ម៉ូឌែល iPhone 7/7 Plus ជាស្មាតហ្វូនដំបូងក្នុងលោករចនាតួខ្លួនគ្មានរន្ធកាសទំហំ ៣,៥ ម.ម ដោយជំនួសប្រើភ្ជាប់ជាមួយខ្សែសាក Lightning ធម្មតាវិញ។ ចាប់តាំងពីពេលនោះមករួមបញ្ចូលទាំងក្រុមហ៊ុន Google ក៏ចាប់ដករន្ធដោតកាសចេញពី Pixel 2 និង Pixel 2 XL នាឆ្នាំ ២០១៧ ដូចគ្នា។

២.Face Unlock និង Animoji:

បំបាត់មុខងារស្កេនខ្ចៅដៃធ្លាប់មានលើ iPhone 5S សេរ៊ីឆ្នាំ ២០១៣ មកទល់ឆ្នាំ ២០១៨ ក្រុមហ៊ុន Apple បានណែនាំនូវមុខងារស្កេនផ្ទៃមុខ Face ID លើ iPhone គម្រប់ខួបដប់ឆ្នាំ។ មុខងារនេះជំនួយពីបច្ចេកវិទ្យាកាមេរ៉ា True Depth ខុសពីស្មាតហ្វូន Android ធុនកណ្តាលមួយចំនួនដែលចម្លងតាមបន្តកន្ទុយគ្នា ឆ្លងកាត់ត្រឹម Sensor កាមេរ៉ាមុខធម្មតា ពោលធ្វើឲ្យគ្មានសុវត្ថិភាព និងមិនអាចដំណើរការបានល្អនៅទីតាំងខ្សោយពន្លឺនោះទេ។ ចំណែកឯមុខងារ Animoji ក៏ត្រូវបានក្រុមហ៊ុន Samsung ចម្លងយកទៅប្រើប្រាស់លើ Galaxy S9/S9 Plus សេរ៊ីឆ្នាំ ២០១៨ ដោយប្រើឈ្មោះ AR Emoji។

ប្រភព: https://www.themobileindian.com/news/most-copied-features-of-apples-iphone-by-android-smartphone-manufactures-21543

https://www.mensxp.com/technology/smartphones/44822-6-iphone-features-that-were-copied-by-apple-from-android-smartphones.html