៩ហេតុផលនេះ ជួយអ្នកច្បាស់ក្នុងចិត្ត មុនហុចលុយឲ្យអ្នកស្គាល់គ្នាខ្ចី
- 2018-10-19 09:00:00
- ចំនួនមតិ 0 | ចំនួនចែករំលែក 0
៩ហេតុផលនេះ ជួយអ្នកច្បាស់ក្នុងចិត្ត មុនហុចលុយឲ្យអ្នកស្គាល់គ្នាខ្ចី
ចន្លោះមិនឃើញ
បច្ចុប្បន្នការផ្ដល់លុយឲ្យគ្នាខ្ចីទទេដោយគ្មានលក្ខខណ្ឌ ឬជាថ្នូរនឹងការប្រាក់សមល្មម ឬលើសលប់ កំពុងពេញនិយមពីសំណាក់ប្រជាពលរដ្ឋមួយចំនួន។ ចំពោះអ្នកមិនមានអាជីពជាអ្នកចងការប្រាក់ឆ្អិនឆ្អៅ ឬមិនមែនជាតំណាងគ្រឹះស្ថានផ្ដល់កម្ចី តែងប្រឈមនឹងបញ្ហាមួយចំនួន។
ជារឿយៗ អ្នកមានលុយល្មមៗមួយចំនួន ស្បថលែងចង់ឲ្យគ្នាឯងពាក់ព័ន្ធរឿងលុយ ព្រោះតែពិបាកទាវិញ ដូចអូសឫស្សីបញ្ច្រាសចុង។ មានន័យថា ទាំងដើម ទាំងការ ឬអ្នកខ្ចីខ្លះស៊ីដាច់ទាំងអស់ ដែលស្របទៅនឹងសុភាសិតខ្មែរ “ ប្រាក់ក៏បង់ ថង់ក៏ដាច់ ”។
បន្ថែមពីសុភាសិតខាងលើ បើតាមគេហទំព័រ Money Crashers ក៏បានពន្យល់ប្រាប់ហេតុផលនានា ដែលកាន់តែឆ្លុះបញ្ចាំងច្បាស់ ថាការផ្ដល់លុយឲ្យមិត្តភ័ក្ដិ ឬសាច់ញាតិ គ្រួសារ គឺមិនមានស្ថានភាពល្អទេ ព្រោះវាតែងនាំទៅដល់ក៏បាត់បង់លុយកាក់ ហើយមិត្តភាពក៏ប្រេះស្រាំ។
១. ពិបាកកំណត់រយៈពេលឲ្យគេខ្ចីលុយ
ទាំងអ្នកខ្ចី និងម្ចាស់លុយ សុទ្ធតែជាអ្នកស្គាល់គ្នា ដូចនេះភាគច្រើនបំផុត គឺយោគយល់គ្នា និងគ្មានឯកសារតម្រូវដូចទៅខ្ចីធនាគារ។ ជាការពិតមុនមកខ្ចីលុយគេ កូនបំណុលខ្លះនិយាយអង្វរ ឬលន់តួគេ និយាយរួមធ្វើម៉េចក៏បាន សំខាន់ឲ្យតែគេឲ្យខ្ចី ហ៊ានសន្យាសងវិញ ដូចជាគ្នាសុំឆក់តែមួយភ្លែតទេ ១អាទិត្យ ឬយ៉ាងយូរ១ខែអី នឹងសងវិញគ្រប់ចំនួន ឬហ៊ានឲ្យការប្រាក់ចំណេញច្រើនក៏មាន។
ប៉ុន្តែក្រោយបានលុយដល់ដៃហើយ រហូតដល់ពេលកំណត់ទៀត ទៅជាធ្វើដូចភ្លេចៗ លើកពេលម្ដងជាពីរដង ឬស៊ីដាច់លុយគ្នាក៏មាន។ ម្ចាស់លុយខ្លះ ដោយសារទើសទាល់ពេក អត់ហ៊ានទារ ដល់ថ្នាក់ហួសចិត្តពេកសុខចិត្តគេចៗមុខកូនបំណុល ខ្ជិលជួបនាំក្ដៅក្រហាយ។
២. កម្ចីក្លាយជារឿងមិនអាទិភាព (តាមចិត្តអ្នកខ្ចី)
រឿងកម្ចីនៃអ្នកស្គាល់គ្នា គឺមិនមានលក្ខខណ្ឌចង ហើយពេលវេលាសងវិញ ក៏អត់មានច្បាស់លាស់។ ហេតុនេះទើបអ្នកខ្ចីខ្លះ មិនសូវខ្វល់ ឬអាចនិយាយថាគ្មានការទទួលខុសត្រូវ ចង់សង ឬមិនសងក៏បាន។ ដោយគ្មានថ្ងៃផុតកំណត់ច្បាស់ផង ការសងបំណុល តែងក្លាយជាអាទិភាពចុងក្រោយបំផុត របស់កូនបំណុល ទៅម្ចាស់លុយ។
៣. ពិបាកហាមាត់ទារលុយ ព្រោះនៅយោគយល់មុខ
អ្នកខ្ចីខ្លះគឺមិនខ្វល់ ហើយគេមិនយល់អារម្មណ៍នេះ អស់ពីរកលេសនេះ លេសនោះ គឺចុងក្រោយ កូនបំណុលដាក់១ម៉ាត់មក ម្ចាស់លុយអាចឆ្អែតចិត្ត គឺថា មានពេលណា គេសងពេលនឹង។ ចំណុចនេះ ភាគច្រើនអ្នកមានលុយឲ្យគេខ្ចីតែងរៀងចាល ព្រោះតែកូនបំណុលលេងមួយក្បាច់ៗ សឹងតែខ្យល់ចាប់ ព្រោះម្ចាស់លុយ ពិតជាហត់រឿងសុំឲ្យគេសង។
៤. ពេលជួបជុំគ្នាល្អតែរូបភាពក្រៅ តែក្នុងចិត្តដូចបាយពុះ
គូរបដិបក្ខ រឿងលុយនេះគឺពិតជាមានអារម្មណ៍មិនស្រួលទេជួនកាល ទៅកម្មវិធីជាមួយគ្នាមែន តែកុំថាឡើយមុខ មើលគ្នា សូម្បីតែសម្ដី ក៏មិនអាចនិយាយរកគ្នាដែរ។ មិនថាអ្នកជាមិត្តភ័ក្ដិ ឬសមាជិកគ្រួសារទេ កាលបើមានជាប់ពាក់ព័ទ្ធនឹងបញ្ហាលុយកាក់នេះហើយ គឺយ៉ាប់ចិត្តតែម្ដង។
៥. សម្របសម្រួលដល់ទីបញ្ចប់
ក្រោយទំនាក់ទំនងចាប់ផ្ដើមដើរទៅរកភាពប្រេះឆា អ្នកខ្ចីលុយខ្លះ ក្រៅតែគេចពីការទទួលខុសត្រូវហើយ គឺនៅមកបង្ហាញអារម្មណ៍តាមបណ្ដាញសង្គម នានា ថាខ្លួនគឺជាអ្នកបម្រើគេ ដូចកញ្ជះគេ ខ្វះខាតតិចតួចរកគេ ត្រូវគេមើលងាយ។ ក្នុងនាមជាអ្នកផ្ដល់លុយឲ្យគេខ្ចី គឺក្រៅពីហត់រឿងទារលុយមិនសងហើយ គឺត្រូវមកគិតរឿងសម្របសម្រួលអារម្មណ៍គ្នាដោយសារ តែរឿងចិត្តមិនដាច់ព្រោះធ្លាប់ជាពួកម៉ាក និងជាសាច់ញាតិ និងដើម្បីចៀសវាងរឿងធំដុំ សុខចិត្តសម្របសម្រួល។
៦. សុំខ្ចីបន្ថែមរហូតបំណុលវន្ត ក
នៅពេលដែលអ្នកបានផ្ដល់ប្រាក់កម្ចីដល់មិត្តភ័ក្ដិ ឬសមាជិកគ្រួសារម្ដង ជាពីរដងហើយ ច្បាស់ណាស់ គេនឹងអាងលើអ្នក ព្រោះសុំពេលណាក៏បាន និងងាយៗ មិនដូចទៅខ្ចីធនាគារ។
ដូច្នេះហើយ គេអាចវិលត្រលប់មករកអ្នកទៀត នៅពេលដែលគាត់ត្រូវការប្រាក់មិនថាតិច ឬច្រើន។ លើសពីនេះមិត្តភ័ក្ដិនិងសមាជិកគ្រួសារផ្សេងទៀត ក៏អាចស្នើសុំខ្ចីប្រាក់កាន់តែច្រើនទៅៗ ផងដែរយកល្អ កុំមិនគួរក្លាយជាអ្នកផ្ដល់ប្រាក់កម្ចីក្នុងរង្វង់គ្រួសារ និងមិត្តភ័ក្ដិទេ។
៧. គ្មានចំណេញការប្រាក់
វាពិតជាករណីដ៏កម្រ ដែលអាចទទួលបានចំណេញការប្រាក់ ពីកម្ចីជាមួយគ្នាឯង។ ព្រោះតែរឿងនៅអាណិត ឬយោគយល់មុខគ្នា និងគ្មានលក្ខខណ្ឌកំណត់ច្បាស់លាស់។ ជួនកាល ក្រៅតែគ្មានបានការប្រាក់សូម្បី១រៀលហើយ គ្នាឯងខ្លះច្រើនតែបោកគ្នា ឬស៊ីដាច់លុយគ្នាក៏មាន។
៨. ដល់ពេលចាំបាច់លុយខ្លួនឯងទៅជាពិបាក
មិនមែនជារឿងលេងសើចទេ រឿងគ្នាឯងខ្ចីលុយ មិនដែលទុំនេះ គឺមានន័យថាខ្ចីមិនចេះសង ឬស៊ីដាច់តែម្ដង។ នេះគឺជាហេតុផលមួយ រហូតដល់វេនខ្លួនឯង បន្ទាន់ត្រូវការលុយបំផុត គឺពិតជាពិបាក ព្រោះធ្លាប់តែគេមកហាសុំខ្ចីបានៗ ប៉ុន្តែដល់វេនខ្លួនឯងគឺចប់ មិនដឹងទៅរកអ្នកណា។ រហូតម្ចាស់លុយខ្លះ បែរជាទៅចងការធនាគារវិញក៏មាន។
៩. បាត់ទាំងលុយ បាត់ទាំងមិត្តភាព
តាមបទពិសោធរាប់មិនអស់ តាមរយៈការចែករំលែកតាមបណ្ដាញសង្គមឌឺដង លែបខាយដាក់គ្នារឿងខ្ចីលុយគ្នានេះ កន្លងទៅ វាជាចំណុច គួរពិចារណាមួយឲ្យច្បាស់ មុនសម្រេចចិត្តផ្ដល់កម្ចីដល់គ្នាឯង។
រឿងលុយកាក់នេះ អាចគឺធ្វើឲ្យមនុស្សដែលធ្លាប់តែស្រលាញ់ រាប់អានគ្នា ចុងបញ្ចប់ គឺភាគច្រើន គឺលទ្ធផលមិនសូវល្អទេ។ ទីបំផុតទៅ គឺលុយក៏បាត់ មនុស្សធ្លាប់តែល្អ ក៏ក្លាយជាសត្រូវនឹងគ្នាមួយរំពេច។