ទៅលេងខេត្តសៀមរាប កុំភ្លេចតំបន់ទេសចរណ៍១ ប្រមូលផ្តុំកន្លែងកម្សាន្តស្អាតបែបធម្មជាតិ
- 2018-10-20 03:00:00
- ចំនួនមតិ 0 | ចំនួនចែករំលែក 0
ទៅលេងខេត្តសៀមរាប កុំភ្លេចតំបន់ទេសចរណ៍១ ប្រមូលផ្តុំកន្លែងកម្សាន្តស្អាតបែបធម្មជាតិ
ចន្លោះមិនឃើញ
សហគមន៍ទេសចរណ៍បែបធម្មជាតិត្រាវកុដ្ឋ កំពុងក្លាយជាតំបន់ទេសចរណ៍ដ៏ទាក់ទាញ និងពេញនិយមមួយ នៅក្នុងខេត្តសៀមរាប។ សហគមន៍មានទីតាំងស្ថិតក្នុងឃុំបល្ល័ង្ក ស្រុកប្រាសាទបាគង ដែលមានចម្ងាយប្រមាណ ២៤គីឡូម៉ែត្រ ពីក្រុងសៀមរាប នៃខេត្តសៀមរាប។
លោក អ៊ូ បញ្ញា ប្រធានសហគមន៍ទេសចរណ៍ធម្មជាតិត្រាវកុដ្ឋ ធ្លាប់បានលើកឡើងថាសហគមន៍នេះ គឺមានបឹងធម្មជាតិត្រាវកុដ្ឋ ដែលមានសក្ដានុពលស្រាប់ អមដោយទេសភាពស្អាត ដែលអាចមើលទៅផ្ទៃទឹកឃើញជាប់ជើងភ្នំមានពណ៌ខៀវស្រងាត់។
លោកបានបន្តថា ដើម្បីឱ្យបឹងនេះកាន់តែមានភាពស្រស់ស្អាត សហគមន៍ទេសចរណ៍ ធម្មជាតិត្រាវកុដ្ឋ បានសហការជាមួយដៃគូអភិវឌ្ឍន៍ ដោយបានរៀបចំ ឱ្យមានភោជនីយដ្ឋាន និងបូទិចនៅជុំវិញបឹង និងបានកែលម្អ តុបតែងដោយផ្កាផ្សេងៗ ឲ្យកាន់តែមានភាពទាក់ទាញ។
បច្ចុប្បន្ននេះ សហគមន៍ទេសចរណ៍ធម្មជាតិត្រាវកុដ្ឋ មានកន្លែងកម្សាន្តជាច្រើនដូចជា ការជិះទូកកម្សាន្ត ការជិះកង់លើអាកាស និង ការអង្គុយទទួលទានអាហារនៅមាត់ទឹក និងស្របខ្យល់បរិសុទ្ធ។
ចំណែកលោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាបបានឱ្យដឹងថា លោកគំាទ្រចំពោះការរៀបចំសហគមន៍មួយនេះឱ្យកាន់តែមានភាពទាក់ទាញ និងពេញនិយម ដើម្បីឱ្យប្រជាពលរដ្ឋនៅតាមសហគមន៍ទទួលបានចំណូលដោយផ្ទាល់ពីវិស័យទេសចរណ៍។
សូមបញ្ជាក់ថា ជាមធ្យមសហគមន៍ទេសចរណ៍ធម្មជាតិត្រាវកុដ្ឋ បានទាក់ទាញភ្ញៀវទេសចរប្រមាណពី ៥០០ទៅ ១០០០នាក់ក្នុងមួយថ្ងៃ។ នេះបើតាមប្រភព ពីប្រធានសហគមន៍ទេសចរណ៍ធម្មជាតិត្រាវកុដ្ឋ។
ប្រភពៈ ក្រសួងព័ត៌មាន