ឲ្យឆាប់តិច! ពិនិត្យមហារីកអត់គិតលុយ ត្រឹមថ្ងៃនេះនៅកោះពេជ្រ
- 2018-10-20 07:03:14
- ចំនួនមតិ 0 | ចំនួនចែករំលែក 0
ឲ្យឆាប់តិច! ពិនិត្យមហារីកអត់គិតលុយ ត្រឹមថ្ងៃនេះនៅកោះពេជ្រ
ចន្លោះមិនឃើញ
ចាប់ពីពេលនេះ រហូតដល់ម៉ោង ៦ល្ងាច ក្រុមហ៊ុនធានារ៉ាប់រង AIA កំពុងតែរៀបចំកម្មវិធីពិនិត្យមហារីកសុដន់ពីគ្រូពេទ្យជំនាញ នៅកោះពេជ្រ ដោយមិនមានគិតប្រាក់កាសអ្វីឡើយ។
ក្រៅពីការពិនិត្យស្វែងរកជំងឺមហារីកសុដន់ ក្រុមគ្រូពេទ្យជំនាញក៏បានបង្រៀនឲ្យអ្នកមកចូលរួមទាំងអស់ ពីវិធីពិនិត្យមើលជំងឺនេះដោយខ្លួនឯង ការពិគ្រោះយោបល់ និងណែនាំឲ្យអ្នកមិនទាន់ពិនិត្យទាំងប្រុសទាំងស្រី ចូលរួមទាំងអស់គ្នា។
លោក Richard Bates អគ្គនាយកក្រុមហ៊ុន AIA Cambodia បាននិយាយថា លោករៀបចំយុទ្ធនាការ FIT FOR HOPE by AIA នេះឡើង ដើម្បីឲ្យប្រជាជនខ្មែរទាំងអស់ ងាកមកការពារខ្លួនពីជំងឺមហារីកឲ្យបានច្រើន ជាពិសេសគឺមហារីកសុដន់ ដែលជាជំងឺអាចព្យាបាលបាន បើសិនដឹងពីស្ថានភាពជំងឺទាន់ពេលវេលា។
មនុស្សភាគច្រើនដែលលោកបានស្គាល់ ហើយកំពុងតែរងទុក្ខពីជំងឺមហារីកសុដន់នេះ ភាគច្រើនកើតឡើងដោយសារភាពអៀនខ្មាស មិនបានទៅពិនិត្យពីគ្រូពេទ្យ ដែលជាហេតុលោកជំរុញឲ្យមនុស្សទាំងអស់ មិនថាប្រុស ឬស្រី ចូលរួមកម្មវិធីថ្ងៃនេះ។ លោក Richard បន្ថែម។
FIT FOR HOPE by AIA ក៏មាន Pink Walk ដែលចាប់ផ្ដើមនារសៀលនេះ ដោយអ្នកចូលរួមត្រូវដើរចម្ងាយ ១,៨គីឡូម៉ែត្រ ឆ្លងកាត់កម្មវិធីសប្បាយៗជាច្រើន។ ដើម្បីចូលរួម Pink Walk អ្នកគ្រាន់តែបរិច្ចាគ ៥ដុល្លារ ទៅឲ្យមន្ទីរពេទ្យព្រះសីហនុ មណ្ឌលនៃក្ដីសង្ឃឹម ដែលបានព្យាបាលជំងឺមហារីកសុដន់ដោយឥតគិតថ្លៃ ហើយអ្នកនឹងទទួលបានអាវយឺត និងឆត្រពណ៌ផ្កាឈូកផងដែរ។
ក្រៅពីកម្មវិធីដើរ ដើម្បីយល់ដឹង និងកាត់បន្ថយជំងឺមហារីកខាងលើហើយនោះ AIA ក៏មានកម្មវិធីរាំហ្សាំបារ និងការប្រគំតន្ត្រីនៅពេលល្ងាចពី កញ្ញា ពេជ្រ សោភា កញ្ញា ទេព បូព្រឹក ក្រុមក្មេងខ្មែរ កញ្ញា Laura Mam និងតារាល្បីៗជាច្រើនទៀត។
សម្រាប់ព័ត៌មានបន្ថែម ចូលទៅផេកហ្វេសប៊ុក AIA Cambodia ៕