ការសិក្សាថ្មី រកឃើញថា វិស្វករលុយខាប់ តែពិបាករកនារីយល់ចិត្ត ដោយសារ ៤រឿងនេះ
- 2018-10-22 01:00:00
- ចំនួនមតិ 0 | ចំនួនចែករំលែក 0
ការសិក្សាថ្មី រកឃើញថា វិស្វករលុយខាប់ តែពិបាករកនារីយល់ចិត្ត ដោយសារ ៤រឿងនេះ
ចន្លោះមិនឃើញ
ជំនាញវិស្វកម្ម ដែលមានវិស្វករតាមផ្នែកនីមួយៗ គឺជាការងារមួយល្អបំផុត ហើយក៏សំបូរទីផ្សារ ដែលគេច្រើននិយាយថា អ្នករៀនផ្នែកនេះ គឺត្រូវប៉ាន់ខ្លាំង បើបានជាគូរហើយ ដឹងតែមិនបាច់ខ្វល់រឿងអត់លុយចាយ។
តាមការសិក្សារបស់ក្រសួងដែនដី នគរូបនីយកម្ម និងសំណង់ នៃប្រទេសកម្ពុជា ក្នុងរយៈពេល៩ខែ ឆ្នាំ២០១៨នេះ តម្លៃពលកម្ម ចំពោះវិស្វករ ស្ថាបត្យករ និងអ្នកជំនាញផ្សេងទៀត ក្នុង១ខែអាចទទួលបានប្រាក់បៀវត្សពី ៤០០ដុល្លារ ទៅ ២៥០០ដុល្លារ។
ក្រៅពីមានប្រាក់ខែច្រើន ដែលអំណោយផលដល់ជីវភាព វិស្វករ១ក្រុម សូមចែករំលែករឿងពិត ៤ចំណុច មកកាន់ Sabay ដែលខ្លួនបានជួបប្រទះ ក្នុងជីវភាពរស់នៅ ពិសេសជីវិតស្នេហាតែម្តង។
វិស្វករប្រុសៗទាំងនោះបញ្ជាក់ថា ពេលខ្លះ ពិតជាធ្វើឲ្យឈឺក្បាលជាងការគូសប្លង់អគារ ឬ គូស Autocad Drawings (ឈ្មោះកម្មវិធីសម្រាប់គូសប្លង់) ទៅទៀត រឿងមិត្តស្រីខឹង ដោយសារតែការងាររវល់។
ម្យ៉ាងវិញទៀត វារឹតតែពិបាក រឿងរកអ្នកចេះយោគយល់ពីការងារផ្នែកនេះ ដោយសារប្រុសៗវិស្វករ តែងមាន ៤ចំណុចនេះ។
១.គ្មានពេលវេលាទំនេរ
ជាការពិតក្រុមវិស្វករគឺភាគច្រើនបំផុតមានការងាររវល់ខ្លាំងតាមការទទួលខុសត្រូវ មិនថាតូច ឬធំនៅតាមការដ្ឋាននីមួយៗ គ្មានយប់ ឬថ្ងៃ។ ជួនកាលថ្ងៃឈប់សម្រាក ក៏មិនសូវទំនេរ ដូចអ្នកធ្វើការការិយាល័យដែរ ព្រោះតែកិច្ចសន្យា ដែលត្រូវបញ្ចប់ការងារឲ្យគេតាមកំណត់ ចៀសវាងសងលុយគេ។
ចំណុចនេះហើយ ជាហេតុផល ដែលអ្នកធ្វើការវិស្វករ អត់មានពេលឲ្យដៃគូ។ ពួកគេ ចង់បាននារីដែលឯករាជ្យ មិនសូវពិបាកផ្គាប់ចិត្ត ដូចជាជូនទៅញ៉ាំអីជាមួយគ្នា បែបលំហែអារម្មណ៍ ឬមើលកុនជាដើម។ បើនិយាយឲ្យចំ ពេលទំនេរប្រុសៗជាវិស្វករ សុខចិត្តនៅផ្ទះដេកតែម្ដង មិនសូវចង់ចេញក្រៅទេ។
២. ការបង្ហាញភាពផ្អែមល្ហែម
ចំណុចនេះមិនមែនមានន័យថាបុរសធ្វើការផ្នែកនេះ មិនផ្អែមល្ហែមទេ តែចង់សំដៅដល់ការបង្ហាញជាសាធារណ គឺប្រុសៗក្រុមនេះ មិនសូវនិយម។ បើជ្រុល ក្រុមវិស្វករសម្រុករកលុយ រួចហើយទិញរបស់ឲ្យនារីជាគូស្នេហ៍ ឬប្រពន្ធ នូវកាដូធំៗ ដូចជា ឡាន ផ្ទះ ឬគ្រឿងអលង្ការ ឲ្យស្ងាត់ៗទៅវិញ អត់ចង់សំញែងគេឯងសោះតែម្ដង។
បើដឹងចំណុចនេះហើយ នារីៗ តិចនៅច្រឡំខឹងសម្បារ ឬអន់ចិត្តប្រៀបធៀប ថាហេតុអ្វី គូស្នេហ៍ខ្លួន មិនផ្អែមល្ហែមដូចគេ មិនធ្វើកម្មវិធីភ្ញាក់ផ្អើលថ្ងៃខួបកំណើត ឬនាំទៅនេះ ទៅនោះ? តាមការពិត ភាពរវល់វក់វីការងារច្រើនដូចភ្នំ រកពេលដេកសឹងមិនបានទាំងនេះ ក៏ដើម្បីមនុស្សដែលខ្លួនស្រលាញ់តែប៉ុណ្ណោះ។
៣. ចូលចិត្តភាពស្ងប់ស្ងាត់ Privacy
មិនបាច់មើលអីច្រើនទេ មើលតែហ្វេសប៊ុក ទៅដឹងហើយ អ្នករៀនវិស្វករភាគច្រើនចាស់មុនអាយុ។ ដូច្នេះ ការលេងបណ្ដាញសង្គម គឺខុសពីក្មេងស្ទាវដាច់ កម្រ Post Status ណាស់។ មិនថានារីជាគូស្នេហ៍ចង់ Tag ឬ Mention អីបែកមេដៃ ឲ្យទៀត ក៏គេមិនងាយរវល់ឡើយ។ តាមពិតឃើញទាំងអស់តែសំខាន់ ពួកគាត់មិនសូវចូលចិត្តឆ្លើយឆ្លង តាម Comment លេងសើចអីហ្នឹងទេ។
តែបើ Group ការងារវិញឆ្លើយសារទៅមកដូចទឹកបាក់ទំនប់ ព្រោះខ្លាចនាំបញ្ហា ដាច់សាច់រឿងការងារ អំពល់ទុក្ខសងលុយគេ។ ក្រុមវិស្វករនិយាយរួម គឺមិនសូវមានដុងរឿងសម្ដែង ឬបង្ហាញអារម្មណ៍ ឬបង្ហោះសារ តាមហ្វេសប៊ុកតែម្តង។
៤. របៀបតុបតែងខ្លួន
តិចច្រឡំថាក្រុមនេះមិនចង់លេងខ្លួន ឬអត់លុយ។ តាមការពិតនិយាយដល់ចំណុចនេះ សឹងតែ១០ លើ១០នាក់ហើយ ប្រុសៗធ្វើការផ្នែកនេះ គឺខ្សត់រឿង Style តែងខ្លួនណាស់។
ព្រោះរវល់នឹងការងារ ហើយបរិយាកាសទៀតសោត ក៏មិនសូវអំណោយផលឲ្យស្លៀកពាក់ ដូចបុគ្គលិកក្នុងការិយាល័យ ពាក់ស្បែកជើង ប៊ូល ឬដាក់អាវក្រវាត់ ក អីណាស់។
ខោអាវ ដែលពេញនិយម បំផុតគឺ អាវការដ្ឋានមានចំណាំងប្លាតដូចប៉ូលិសចរាចរណ៍ ឬស្បែកជើងសុវត្ថិភាព ក្រាស់ៗ បាំងអស់ភាពសង្ហារនៃធម្មជាតិបុរស។ បើប៉ះគូស្នេហ៍ យល់ចិត្ត គឺជួយរៀបចំឲ្យទៅមិនសូវអីទេ តែបើប៉ះខាងស្រី អ្នកពូកែខឹងទៀត គឺចប់ ព្រោះក្រុមប្រុសៗវិស្វករ មិនចេះលួងទៅទៀត។