ហេតុអ្វី​បានជាមាន​ការ​ទិញ​លក់ភាគ​ហ៊ុន របស់​ក្រុម​ហ៊ុន​ល្បីៗ​នៅ​កម្ពុជា?​

  • 2018-10-22 04:46:39
  • ចំនួនមតិ 0 | ចំនួនចែករំលែក 4

ចន្លោះមិនឃើញ

អ្នក​ធ្វើ​ការ​លើ​វិស័យ​មូល​បត្រ​នៅ​កម្ពុជា​លើក​ឡើង​ថា​ការ​ទិញ​ភាគ​ហ៊ុន​ជា​ឱកាស​មួយ​សម្រាប់​ប្រ​ជា​ពល​រដ្ឋ​ទូទៅ​អាច​ចូល​រួម​វិនិយោគ​ជាមួយ​ក្រុម​ហ៊ុន​មាន​កេរ្តិ៍ឈ្មោះ​នៅ​កម្ពុជា​ដោយ​មិន​បាច់​ចំណាយ​ពេល​វេលា​ចាត់​ចែង​កិច្ច​ការ​ដោយ​ខ្លួន​ឯង បើ​ទោះ​បីជា​មាន​ចំណុច​ហានិភ័យ​មួយ​ចំនួន​ក៏ដោយ។

(បុរស​ម្នាក់​កំពុង​ជិះ​ម៉ូតូចេញ​ពី​គណៈកម្មការ​មូល​បត្រ​កម្ពុជា)​

គណៈកម្មការ​មូល​បត្រ​កម្ពុជាកាលពី​​ថ្ងៃទី១៩ ខែតុលា ឆ្នាំ២០១៨ បាន​រៀប​ចំវគ្គបណ្តុះ​បណ្តាល​ស្តីពី​បច្ចុបន្ន​ភាព​ទីផ្សារ​មូល​បត្រ​នៅ​កម្ពុជា។ ​

​លោកស្រី គីម សុផានីតា ប្រ​ធាន​ស្តីទី​នាយក​ដ្ឋាន​ប្រតិបត្តិការ​ទីផ្សារ​នៃក្រុម​ហ៊ុន​ផ្សារ​មូល​បត្រ​កម្ពុជា ថ្លែង​ក្នុង​កម្មវិធី​នេះ​ថា​ការ​វិនិយោគលើ​ការទិញ​ភាគ​ហ៊ុន​អាច​ងាយស្រួល​ជាង​ការ​បង្កើត​អាជីវកម្ម​ដោយ​ខ្លួនឯង។ ត្រង់​ចំណុចនេះ​លោក​ស្រី​បញ្ជាក់ថា​ការ​បង្កើត​អាជីវកម្ម​ដោយ​ខ្លួន​ឯង​ត្រូវការ​ទុន​វិនិ​យោគច្រើន និង​ជំនាញ​ ខណៈ​ទិញ​ភាគ​ហ៊ុន អាច​ចំណេញ​ពេល​ភាគ​ហ៊ុន​ឡើង​ថ្លៃ និង​បាន​ទទួល​ភាគ​លាភ​ពី​ក្រុម​ហ៊ុន​ដែល​ខ្លួន​បាន​ទិញ​។

អ្នកស្រី​បន្ថែមថា៖ «យើង​ចង់ធ្វើអាជីវកម្ម​ខ្លួន​ឯ​ងពិបាក ត្រូវ​ការ​ដើ​ម​ទុន​ច្រើន យើង​ត្រូវ​ការ​គ្រប់គ្រង​ធន​ធាន​មនុស្ស ត្រូវការ​បច្ចេកទេស បើ​យើង​វិនិយោគ​លើ​ក្រុម​ហ៊ុនៗគេល្អ​ស្រាប់ មាន​ស្តង់ដារ មាន​គណៈគ្រប់​គ្រង​អី​ត្រឹម​ត្រូវ​យើង​អង្គុយ​ធ្វើការ​ងារ​របស់​យើង ហើយ​គេ​រក​ស៊ី​ឲ្យ​យើង»។​

​ប្រ​ហាក់​ប្រហែល​គ្នានេះ​ដែរ លោក កែម សុភ័ក្រ្តា ប្រ​ធាន​ផ្នែក​សាជីវកកម្ម​​ហិរញ្ញវត្ថុនៃក្រុម​ហ៊ុន​ អ អេចប៊ី ឥណ្ឌូឆៃណា ស៊ីឃ្យូរីធី ថ្លែង​ឲ្យ​ដឹង​ដែរថា​ការទិញ​ភាគហ៊ុន​គឺ ជា​ឱកាស​របស់​ប្រ​ជា​ពល​រដ្ឋ​ក្នុង​ការ​ធ្វើជា​ម្ចាស់កម្មសិទ្ធិ​​ឬភាគហ៊ុន​លើ​ក្រុម​ហ៊ុន​ល្បីៗ។

(លោក កែម សុភ័ក្រ្តា ពេល​ឆ្លើយ​សំណួរ​របស់​អ្នក​ចូល​រួម​កម្មវិធី)

លោក​បន្តថា៖ «នៅពេល​រដ្ឋាករទឹក​ឡើង​ផ្សារ​ហ៊ុន គ្រប់​គ្នា​ក៏អាច​មាន​លទ្ធភាព​ទៅ​កាន់​កាប់​ភាគហ៊ុន​របស់​រដ្ឋាករទឹក​បាន​ដែរ យើងអាចមាន​សិទ្ធិ​លើ​កម្មសិទ្ធិភាគ​ហ៊ុន យើង​អង្គុយ​ធ្វើតែការងារ​របស់​យើង យើង​សរសេរ​កាសែត ចុះយក​ព័ត៌មាន​យើង​ធ្វើការ​ងារ​របស់​យើង តែ​រដ្ឋាករ​ទឹក​នោះ បូមទឹក​លក់ បាន​ចំណេញចែកភាគលាភ​ឲ្យ​យើ​ង ភាគ​ហ៊ុន ឡើង​ថ្ងៃ​យើង​ចំណេញ​ពីភាគ​ហ៊ុន​ទៀត យើង​មែន ទៅ​បូម​ទឹក​ខ្លួន​ឯង​ឯណា ត្រូវទេ គេធ្វើឲ្យ​ទាំងអស់»។

សម្តេច​ ហ៊ុន សែន បាន​ប្រ​កាសពី​ការ​បង្កើត​គម្រោង​ផ្សារ​មូល​បត្រ​កម្ពុជា​កាលពី​ខែ​តុលា ឆ្នាំ២០០៧ និង​រហូត​ដល់​ឆ្នាំ២០១២ ការចុះបញ្ជី និង​ជួយញ​ដូរ​មូល​បត្រ​កម្មសិទ្ធិ​ដំបូង​ត្រូវបាន​ធ្វើ​ឡើង​។

រហូត​មក​ទល់​ពេល​នេះ​​ក្រុម​ហ៊ុន​ចុះ​បញ្ជី​ក្នុងផ្សារ​មូល​បត្រ​កម្ពុជា​មាន​ចំនួន​ប្រាំ គឺ​រដ្ឋាករ​ទឹក​ស្វយ័ត​កម្ពុជា ក្រុម​ហ៊ុន​ហ្គ្រេន​ធ្វីន អ៊ិនធើណេសិនណល (ខេមបូឌា)ភីអិល​ស៊ី កំពង់​ផែស្វយ័ត​ភ្នំពេញ ភ្នំពេញ​អេសអ៊ី​ហ្សិត ភីអិលស៊ី(ភីភីអេសភី) និង​កំពង់​ផែ​ស្វយ័ត​ក្រុង​ភ្នំពេញ​។

​​លោក កែម សុភ័ក្រ្តា ឲ្យ​ដឹង​ដែរ​ថា​ក្រុម​ហ៊ុន​ដែល​ប្រកាស​លក់​ភាគហ៊ុន​របស់​ខ្លួន​គឺ​ដើម្បី​ប្រ​មូល​ប្រ​ភព​ទុន​ដើម្បី​ពង្រីកអាជីវកម្ម បង្វិល​ទុន និង​គោល​ដៅ​អាជីវកម្ម​ផ្សេងៗ​​ជាដើម។​

​ក្រៅពី​ផលប្រយោជន៍​ក៏មាន​ដែរ​ហានិភ័យ​មួយ​ចំនួន​សម្រាប់​អ្នក​វិនិយោគ​លើ​ភាគ ហ៊ុន​នេះ​ផង​ដែរ។ លោក ហោ ស៊ីម៉េត នាយក​ប្រតិ​បត្តិការ និង​ហិរញ្ញវត្ថុ​នៃ​ក្រុម​ហ៊ុន​អេស៊ីលីដា ស៊ីឃ្យូរីធី ភីអិល​ស៊ី លើក​ឡើងថា​ហានិភ័យ​អត្រាប្តូប្រាក់ ដោយអ្នកវិនិយោគត្រូវ​ប្តូរ​ប្រាក់​ដុល្លារ​ ទៅជាប្រាក់រៀល​ដើម្បី​ជួញដូរ​មូលបត្រ​ក្នុង​ផ្សារ​មូល​បត្រ។

លោក​បន្តថា​ចំណុច​មួយ​ទៀត​គឺ​អ្នក​វិនិយោគ​អាច​ពិបាក​លក់​ភាគ​ហ៊ុន​របស់​ខ្លួន​វិញដោយ​ហេតុ​ថា​ផ្សារ​មូល​បត្រ​កម្ពុជា​នៅ​មាន​ទំហំតូច​នៅ​ឡើយ ហើយ​ពុំទាន់​មានទំនុក​ចិត្ត​ទាំងស្រុង​ពី​សាធារណជន​នៅឡើយ។ មួយ​វិញ​ទៀត​លោក​ថា​អ្នក​ទិញ​ភាគ​ហ៊ុន​អាច​នឹង​មិន​មាន​ឥទ្ធិ​ពល​លើ​ដំណើរ​ការ​អាជីវកម្ម​ឬសេចក្តី​សម្រេច​ចិត្ត​សំខាន់ៗ​នានា​របស់​ក្រុម​ហ៊ុន ដោយ​ថា​មាន​សំឡេង​តូច​បើ​ធៀប​ទៅ​នឹង​ម្ចាស់​ភាគ​ហ៊ុន​ផ្សេងៗ​ទៀត។ ​

សម្រាប់​ដំណោះស្រាយ​លើ​ហានិភ័យ​មួយ​ចំនួន​ដែល​អាច​នឹង​កើត​ឡើង​លោក គុយ បញ្ញា អនុប្រ​ធាន​ការិយាល័យ​ត្រួត​ពិនិត្យ​សេ​វារក្សា​ទុក​មូល​បត្រ​នៃ​គណៈកម្មការ​មូល​បត្រ​កម្ពុជា លើក​ឡើង​ថាអ្នក​ទិញ ឬមាន​បំណង​ទិញ​ភាគហ៊ុន​​ទិញ​ហ៊ុន គួរ​ទិញ​ភាគ​ហ៊ុន​ពី​ក្រុម​ហ៊ុន​លើស​ពី​មួយ​។ លោក​បញ្ជាក់ថាធ្វើ​ដូចនេះ​ដើម្បី​កាត់​បន្ថយហានីភ័យដែលអាច​កើត​មាន ដោយ​ទំនង​ជាមានន័យ​ថា​​ពេល​ក្រុម​ហ៊ុន​មួយ​មាន​បញ្ហា​ នៅ​មាន​ក្រុម​ហ៊ុន​ផ្សេង​មួយ​ទៀត​ដែល​ខ្លួន​មាន​ភាគ​ហ៊ុន​អាច​ជួយ​ទប់​ទល់​គ្នា​បាន៕​​


អត្ថបទ៖ ទូច សុខា