បើកសង្វៀនថ្មីទី៥ របស់ CNC បង្ហាញមុខសុទ្ធតែអ្នកប្រដាល់ជួរមុខ

2018-10-26 08:49:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិធីបើកសម្ពោធសង្វៀនទី៥ របស់ស្ថានីយទូរទស្សន៍ CNC នាព្រឹកមិញនេះ បង្ហាញមុខសុទ្ធតែអ្នកប្រដាល់ជើងខ្លាំងក្នុងប្រទេសកម្ពុជា រួមមាន ឃីម ឌីម៉ា ផល សោភ័ណ្ឌ មឿន សុខហ៊ុច ផាន់ គ្រាន់ ឡុង សំណាង ជាដើម។

ទិដ្ឋភាពព្រឹកមិញ

លោក ស៊ីថូ ណាថាន់ ប្រធានផ្នែកកីឡារបស់ CNC បានប្រាប់ឲ្យដឹងថា ដើម្បីជាការអបអរក្នុងពិធីសន្និសីទសារព័ត៌មានស្ដីពីការបើកសង្វៀនទី៥ សមរភូមិអធិរាជអ្នកប្រយុទ្ធគុនខ្មែរអន្តរជាតិគ្រូនសាន្ត នេះខាងក្រុមការងារបានអញ្ជើញកីឡាករជួរមុខខាងប៉ុន្មាននាក់នេះជាភ្ញៀវកិត្តិយសផងដែរ។ ការបង្ហាញមុខនេះទៀតសោត មិនមែនពួកគេត្រូវវ៉ៃខ្សែក្រវាត់ ឬពានរង្វាន់អ្វីនោះឡើយ ប៉ុន្តែកីឡាករជួរមុខទាំងនេះ នឹងឡើងប្រកួតក្នុងកម្មវិធីនេះជាបន្តបន្ទាប់ទៅតាមការរៀបចំរបស់កម្មវិធី។

ទិដ្ឋភាពព្រឹកមិញ

លោក ហួរ រតនៈ ប្រធានទីផ្សារ CNC បានឲ្យដឹងថា សង្វៀនថ្មីខាងលើនេះ គឺជាការសហការគ្នារវាងស្ថានីយរបស់លោក និងភេសជ្ជៈគ្រូនសាន្ត រួមទាំងបានការជួយយ៉ាងពេញទំហឹងពីសំណាក់សហព័ន្ធប្រដាល់គុនខ្មែរ។ ប្រធានផ្នែកខាងលើនេះ ក៏សន្យាថានឹងធ្វើឲ្យកម្មវិធីប្រដាល់មួយនេះមានដំណើរយ៉ាងរលូន និងល្អមើលជារៀងរាល់សប្ដាហ៍ផងដែរ។

ទិដ្ឋភាពព្រឹកមិញ

រំលឹកដែរថា កម្មវិធីប្រដាល់ សមរភូមិអធិរាជអ្នកប្រយុទ្ធគុនខ្មែរអន្តរជាតិគ្រូនសាន្ត នេះនឹងធ្វើចាប់ផ្ដើមប្រកួតជារៀងរាល់ល្ងាចម៉ោង៥ រៀងរាល់ថ្ងៃសុក្រ ហើយចាប់ផ្ដើមប្រកួតពីថ្ងៃទី២ ខែវិច្ឆិកា ២០១៨ នេះហើយ។ នេះជាសង្វៀនទី៥ហើយរបស់ CNC បន្ទាប់សង្វៀន៤សព្វថ្ងៃកំពុងដំណើរនាពេលបច្ចុប្បន្ន៕

អត្ថបទ៖ នួន ស៊ីណា