សុខ ធី តវ៉ារឿងចាញ់ បើមិនបានលទ្ធផល អាចចាកចេញពីកម្មវិធី
- 2018-10-28 07:53:14
- ចំនួនមតិ 0 | ចំនួនចែករំលែក 0
សុខ ធី តវ៉ារឿងចាញ់ បើមិនបានលទ្ធផល អាចចាកចេញពីកម្មវិធី
ចន្លោះមិនឃើញ
អ្នកប្រដាល់វ័យក្មេងរបស់កម្ពុជា សុខ ធី ត្រូវបានចៅក្រមកាត់ក្តីឲ្យចាញ់កីឡាករថៃ ធ្នូសឹកឡេក ដោយពិន្ទុក្នុងការប្រកួតលើកទី២ សន្សំពិន្ទុ ពានរង្វាន់នៅសង្វៀន CNC ដែលទើបចប់ទៅកាលពីម៉ោងប្រហែលជា១ថ្ងៃអាទិត្យ ទី២៨ ខែតុលា នេះ។
សុខ ធី ហៅកាកាបាននិយាយក្រោយចប់ការប្រកួតថា រូបគេមិនអស់នឹងលទ្ធផលដែលឲ្យចាញ់ ធ្នូសឹកឡេក ឡើយ។ គ្រូបង្វឹករបស់គេបានធ្វើការតវ៉ាហើយ ប៉ុន្តែប្រសិនបើការតវ៉ាមិនបានលទ្ធផលល្អ គឺនៅតែឲ្យរូបគេចាញ់នោះ រូបគេប្រហែលពិចារណាដកខ្លួនចេញពីការប្រកួតពានរង្វាន់នេះ។
រូបគេបានបន្តថា ប្រដាល់ស្រុកខ្មែរនឹងមិនរីកចម្រើនដើរទៅមុខទេ ប្រសិនបើដាក់ពិន្ទុរបៀបនេះ ពីព្រោះធ្វើឲ្យកីឡាករបាក់ទឹកចិត្តលែងមានការតស៊ូ ប្រឹងប្រែងដើម្បីកីឡាប្រដាល់ទៀតហើយ។
វីដេអូសំដីរបស់ សុខ ធី
សម្រាប់ការប្រកួតដ៏សំខាន់នេះ កីឡាករថៃ ធ្នូសឹកឡេក បានចាប់ផ្តើមតាំងពីទឹកទី១ ខណៈ សុខ ធី បានព្យាយាមវាយចេញមួយៗ និងស្ទាបស្ទង់តាមបច្ចេកទេស។ ចូលទឹកទី២ សុខ ធី ចាប់ផ្តើមវ៉ៃដោយមិនថយក្រោយឡើយ។ ចំណុចក៏ចាប់អារម្មណ៍បំផុតនោះគឺ សុខ ធី បានវ៉ៃគាស់ចំថ្គាមបណ្តាលឲ្យ ធ្នូសឹកឡេក ដួលអុកគូថរហូតអាជ្ញាកណ្តាលរាប់ដល់៨ម្តង។
បន្ទាប់ពីត្រូវអាជ្ញាកណ្តាលរាប់ ធ្នូសឹកឡេក បានវាយសម្រុកខ្លាំងតាំងពីចុងទឹកទី២ដល់ទឹកទី៥ដែលអាវុធគួរឲ្យកត់សំគាល់របស់គេគឺឡើងជង្គង់ ទាត់ និងកែង ខណៈសុខ ធី ភាគច្រើនព្យាយាមទប់ការពារ និងវាយបកមួយៗតាមបច្ចេកទេស។ ជាលទ្ធផល ចៅក្រម២រូបឲ្យរូបគេឈ្នះ ខណៈចៅក្រម៣រូបទៀតឲ្យចាញ់។
ក្រោយចប់ការប្រកួតភ្លាម លោក សាន សៅយ៉ាន់ គ្រូបង្វឹករបស់ សុខ ធី បានដាក់ប្តឹងតវ៉ាលទ្ធផលដោយសារមិនពេញចិត្ត។ នេះជាការប្រកួតលើកទី២របស់កីឡាករកម្ពុជារូបនេះ បន្ទាប់ពីលើកទី១ទទួលបានជ័យជម្នះ៕