Charlie Puth ផ្ដល់ដំបូន្មាន១ទៅកាន់តារាកម្ពុជាក្នុងស្រុក ដើម្បីឲ្យវិស័យតន្ត្រីខ្មែររីកចម្រើន

2018-10-28 23:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅក្នុងកិច្ច សម្ភាសន៍តាមទូរស័ព្ទលក្ខណៈ Exclusive មកកាន់ក្រុមហ៊ុន Smart Axiata និងអ្នកយកព័ត៌មានក្នុងស្រុកកាលពីថ្ងៃសុក្រសប្ដាហ៍មុននេះ តារាចម្រៀង Charlie Puth ដែលនឹងមកសម្ដែងនៅទីក្រុងភ្នំពេញថ្ងៃទី២ខែវិច្ឆិកា មានពាក្យពេចន៍ជាដំបូន្មានខ្លះៗទៅកាន់សិល្បៈកម្ពុជាក្នុងស្រុក ដើម្បីធ្វើឲ្យវិស័យនេះកាន់តែរីកចម្រើន។

ពាក់ព័ន្ធនឹងវិស័យតន្ត្រីនៅកម្ពុជា គឺសង្កេតឃើញថាវាពិតជានៅក្មេងខ្ចីនៅឡើយ ដូច្នេះបើចង់ឲ្យវិស័យនេះរីកចម្រើន សិល្បៈករទាំងអស់ត្រូវតែមានចំណុចមួយសំខាន់បំផុតនៅក្នុងខ្លួន។ ម្ចាស់បទ "See You Again” បាននិយាយដូច្នេះថា "បើសិនជាអ្នកចង់ធ្វើជាតារាចម្រៀងដ៏ល្អម្នាក់ អ្នកត្រូវតែមានស្ទីលចម្រៀងនិងច្រៀងជាខ្លួនឯងចាំបាច់បំផុត គឺមិនត្រូវយកគំរូតាមបទចម្រៀងផ្សេងៗ ដែលស្ដាប់នៅតាមវិទ្យុឡើយ។"

ភាពម្ចាស់ការដោយខ្លួនឯង និងមានស្ទីលលក្ខណៈជាខ្លួនឯងគឺជាវត្ថុសំខាន់មួយដែលតារាគ្រប់រូបគួរតែមាន។ Charlie បញ្ជាក់ថា "អ្នកគួរតែដើរតាមផ្លូវដោយខ្លួនឯង ជាជាងប្រជ្រៀតជាមួយអ្នកដទៃដោយធ្វើរឿងដដែលៗស្រដៀងពួកគេ។"

សព្វថ្ងៃ Charlie គឺជាអ្នកសរសេរនិងផលិតបទចម្រៀងជាច្រើន ហើយខ្លួននៅតែបន្តនិពន្ធចម្រៀងរហូត។ តារារូបនេះបញ្ជាក់ថា ការធ្វើដំណើរទៅកាន់ទីកន្លែងថ្មីៗច្រើន អាចនាំមកនូវគំនិតថ្មីៗ សម្រាប់ការនិពន្ធចម្រៀង។ បច្ចុប្បន្នលោកកំពុងតែពេញចិត្តបទចម្រៀងមួយបទរបស់លោកគឺ "LA Girls” នៅក្នុងអាល់ប៊ុមថ្មី "Voicenotes” ព្រោះវាបរិយាយពីជីវិតលោកជាច្រើន ពេលធ្វើដំណើរមកកាន់ទីក្រុងនេះជាលើកដំបូង៕