គ្រូបង្វឹក Real ៣រូប ដែលដឹកនាំក្លឹបបានលើសពីមួយឆ្នាំ ក្នុងរយៈពេល ១០ឆ្នាំចុងក្រោយនេះ

2018-10-30 10:59:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹប Real Madrid ជាក្លឹបដ៏ជោគជ័យមួយក្នុងទ្វីបអឺរ៉ុបដោយបានឈ្នះពាន UCL ១៣ដង និងពានLa Liga ៣៣ដង ព្រមទាំងពានក្នុងស្រុក និងក្រៅស្រុកជាច្រើនទៀត។

យ៉ាងណាក៏ដោយ នៅក្នុងរយៈពេល ១០ឆ្នាំចុងក្រោយនេះ Real ក៏ដូរគ្រូបង្វឹកមិនតិចដែរ ដោយដូររហូតដល់ទៅ ៦នាក់ មុននឹងការតែងតាំងលោក Santiago Solari ជំនួស Julen Lopetegui ដែលដឹកនាំបានតែជាង ៥ខែប៉ុណ្ណោះក្នុងឆ្នាំ២០១៨នេះ។ មានតែគ្រូបង្វឹក ៣រូបនេះទេដែលដឹកនាំលើសពីមួយឆ្នាំ៖

១. Jose Mourinho (៣១ ឧសភា ២០១០- ០១ មិថុនា ២០១៣)៖ អំឡុងពេលជាង ៣ឆ្នាំរបស់ Mourinho បានជួយឲ្យក្លឹប ឈ្នះពាន ៣គឺ La Liga ១ដង Copa del Rey ១ដង និង Supercopa de Espana ១ដង។ លោកក៏បានដឹកនាំក្លឹបបាន១០០ពិន្ទុក្នុង La Liga ដែលជាកំណត់ត្រាមួយ ហើយព្រមទាំងដឹកនាំកូនក្រុមរបស់លោកឲ្យឡើងទៅដល់វគ្គពាក់កណ្ដាលផ្ដាច់ព្រាត់ក្នុង UCL ទាំង៣រដូវកាលទៀតផង។

២. Carlo Ancelotti (២៥ មិថុនា ២០១៣- ២៥ ឧសភា ២០១៥)៖ ក្នុងរយៈពេលជាង ២ឆ្នាំរបស់លោក Ancelotti បានជួយឲ្យក្លឹបឈ្នះពានចំនួន ៤គឺ UCL ១ដង UEFA Super Cup ១ដង FIFA Club World Cup ១ដង និង Copa del Rey ១ដង។ អ្វីដែលគួរឲ្យកត់សម្គាល់ក្នុងរជ្ជកាលរបស់គាត់គឺជួយឲ្យក្លឹប ឈ្នះពាន UCL លើកទី ១០ ក្រោយខកខានអស់ជាង ១២ឆ្នាំ។

៣. Zinedine Zidane ( ០៤ មករា ២០១៦ – ៣១ ឧសភា ២០១៨)៖ អតីតកីឡាករ និងគ្រូបង្វឹក Real រូបនេះត្រូវបានមជ្ឈដ្ឋានបាល់ទាត់ចាត់ទុកថាជាគ្រូបង្វឹកដែលជោគជ័យជាងគេរបស់ក្លឹបក្នុងរយៈពេល ១០ឆ្នាំចុងក្រោយនេះ ដោយបានដឹកនាំក្លឹបឲ្យឈ្នះពានចំនួន ៧ក្នុងរយៈពេលជាង ៣រដូវកាល (ពាក់កណ្ដាល២០១៥/១៦, ២០១៦/១៧, ២០១៧/១៨)។ Zidane បានជួយឲ្យ Real ឈ្នះពាន UCL ៣ឆ្នាំជាប់គ្នា ដោយមិនមានអ្នកណាអាចធ្វើបានឡើយ៕