អគារថ្មី នៃមន្ទីរពេទ្យព្រះកុសុមៈតម្លៃជាង ៧៨លានដុល្លារ នឹងអាចឱ្យឧទ្ធម្ភាគចក្រចុះចតបាន
- 2018-10-30 08:07:16
- ចំនួនមតិ 0 | ចំនួនចែករំលែក 0
អគារថ្មី នៃមន្ទីរពេទ្យព្រះកុសុមៈតម្លៃជាង ៧៨លានដុល្លារ នឹងអាចឱ្យឧទ្ធម្ភាគចក្រចុះចតបាន
ចន្លោះមិនឃើញ
អគារថ្មីនៃមន្ទីរពេទ្យមិត្តភាពកម្ពុជា-ចិន ព្រះកុសុមៈ ដែលគ្រោងសាងសង់អស់ថវិកា ៥៥០ លានយ័ន ឬប្រហាក់ប្រហែលជាង ៧៨ លានដុល្លារនឹងអាចឱ្យឧទ្ធម្ភាគចក្រចុះចតបាន។ មន្ទីរពេទ្យនេះ មានទំហំ ២៨ ៩០០ម៉ែត្រការ៉េ លើផ្ទៃដីសរុប ១៣,៧៤០ម៉ែត្រការ៉េ និងត្រូវសាងសង់រយៈពេល ៤០ខែ ដោយមានបំពាក់នូវ ឧបករណ៍វេជ្ជសាស្ត្រ និងសម្ភារបរិក្ខារផ្សេងៗព្រមទាំងការបណ្ដុះបណ្ដាល។
ថ្លែងនៅក្នុងពិធីបើកការដ្ឋានសាងសង់អគារមន្ទីរពេទ្យកាលពីថ្ងៃទី៣០ ខែតុលានេះ ឯកឧត្ដម ម៉ម ប៊ុនហេង រដ្ឋមន្រ្តីក្រសួងសុខាភិបាលបានថ្លែងថា អគារត្រូវសាងសង់មានកម្ពស់ ៥៣ម៉ែត្រ មាន១១ជាន់ អាយុកាលនៃការប្រើប្រាស់៥០ឆ្នាំ សម្របតាមអាកាសធាតុរដូវប្រាំង និងរដូវវស្សា ប្រព័ន្ធផ្គត់ផ្គង់ទឹក អគ្គិសនី និងប្រព័ន្ធបង្ហូរលូទឹកស្អុយ អនុវត្តតាមស្តង់ដារប្រទេសចិនស្របតាមស្ថានភាពជាក់ស្ដែង, បន្ទប់សរុប ១៣២បន្ទប់, បង្គន់អនាម័យ ២១៩បន្ទប់។ អ្វីដែលកាន់តែពិសេស អគារមន្ទីរពេទ្យនេះក៏ត្រូវសាងសង់កន្លែងចុះចតរបស់ឧទ្ធម្ភាគចក្រ (Helicopter)ទម្ងន់មធ្យមពី ៣ ទៅ៥តោននៅលើដំបូលអគារ ស្របតាមការស្នើសុំបន្ថែមពីភាគីកម្ពុជា ហើយអគារនេះត្រូវចែកចេញជាផ្នែកសម្រាប់មុខងារមួយចំនួនដូចជា ផ្នែកពិគ្រោះជំងឺក្រៅ ផ្នែកសង្គ្រោះបន្ទាន់ ផ្នែកបច្ចេកវិទ្យាវេជ្ជសាស្ត្រ ផ្នែកជំងឺទូទៅ ផ្នែកជំងឺវះកាត់ព្រមទាំងសេវា ជំនួយផ្សេងៗទៀត។
តំណាងសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសបើកការដ្ឋានកាលពីព្រឹកមិញ ឯកឧត្ដម យឹម ឆៃលី ឧបនាយករដ្ឋមន្ត្រី បានថ្លែងថា ការបញ្ចុះបឋមសិលាការសាងសង់ អគារមន្ទីរពេទ្យមិត្តភាពកម្ពុជា-ចិន ព្រះកុសុមៈ នាថ្ងៃនេះ គឺស្របពេលដែលរាជរដ្ឋាភិបាលនៃប្រទេសកម្ពុជា-ចិន បានអបអរសាទរ ការប្រារព្វខួបអនុស្សាវរីយ៍ទី ៦០ឆ្នាំ នៃទំនាក់ទំនងការទូតរវាងប្រទេសទាំងពីរ ដែលត្រូវបានបន្តពង្រឹង និងពង្រីកកាន់តែជិតស្និតពីមួយថ្ងៃទៅមួយថ្ងៃលើគ្រប់វិស័យ។
ឯកឧត្ដម បន្តថា ក្រៅពីមន្ទីរពេទ្យ មិត្តភាពកម្ពុជា-ចិន ព្រះកុសុមៈ នេះ រដ្ឋាភិបាលចិនក៏បានសម្រេចកសាងមន្ទីរពេទ្យថ្មីទំនើបមួយទៀតនៅខេត្តត្បូងឃ្មុំ ដែលនឹងចាប់ផ្តើមក្នុងពេលឆាប់ៗខាងមុខនេះ ហើយក្រៅពីមន្ទីរពេទ្យទាំង២នេះ មិត្តចិនក៏បានយកចិត្តទុកដាក់ផ្តល់រថយន្តពេទ្យចល័តចំនួន ៤០ គ្រឿង ដើម្បីជួយព្យាបាលជំងឺជូនប្រជាជនកម្ពុជាផងដែរ។
មន្ទីរពេទ្យកុសុមៈ ជាមន្ទីរពេទ្យជាតិសាធារណៈមួយនៅក្នុងរាជធានីភ្នំពេញ ដែលបានកសាងឡើងនាឆ្នាំ ១៩៥៣ និងបានសាងសង់រួចជាស្ថាពរ ព្រមទាំងចាប់ផ្ដើមដំណើរការនាឆ្នាំ ១៩៥៦ ក្រោមព្រះរាជឧបត្ថម្ភដោយ សម្ដេចព្រះមហាក្សត្រីយ៉ានីព្រះកុសុមៈ ជាព្រះមាតារបស់ព្រះ បរមរតនកោដ្ឋ សម្រាប់ព្យាបាលជំងឺព្រះសង្ឃ និងបានដំណើរការដល់ថ្ងៃទី ១៧ ខែមេសា ឆ្នាំ១៩៧៥ មានឈ្មោះដើមថា «មន្ទីរសង្ឃពេទ្យកុសុមៈ» និងបានអាក់ខានដំណើរការក្នុងរបបប៉ុលពត។
មន្ទីរពេទ្យនេះ បានចាប់ផ្ដើមដំណើរការឡើងវិញ នៅថ្ងៃទី១៦ ខែមិថុនា ឆ្នាំ១៩៧៩ ដោយក្រសួងសុខាភិបាល បានកែសម្រួលពីមន្ទីរពេទ្យ សម្រាប់ព្យាបាលព្រះសង្ឃ មកជាមន្ទីរពេទ្យពហុព្យាបាលប្រជាជន និងព្រះសង្ឃ ជាពិសេសជំងឺដែលត្រូវការវះកាត់ដោយក្រសួងតម្រូវឲ្យមន្ទីរពេទ្យរៀបចំជា ២០០គ្រែចែកចេញជាផ្នែក។
បច្ចុប្បន្នមន្ទីរពេទ្យលោកសង្ឃ មានគ្រែព្យាបាលចំនួន៣៥០ និងមានបុគ្គលិកសរុបទាំងអស់ ចំនួន ៥៦៣នាក់ ក្នុងនោះស្ដ្រី ចំនួន២៣១នាក់ បុគ្គលិកជាប់កិច្ចសន្យាចំនួន ៤០នាក់ និងកម្មករ ចំនួន ៧៤នាក់៕
រូបថត៖ ផ្ដល់ឲ្យ