Jay Chan ល្បីខ្លាំងតាមរយៈបទ Cover “Celica អស់សាំង" ត្រៀមបញ្ចេញបទនិពន្ធថ្មីខ្លួនឯង

2018-11-02 09:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងសញ្ជាតិខ្មែរសព្វថ្ងៃជាអាណិកជនរស់នៅសហរដ្ឋអាមេរិក លោក Jay Chan ទើបតែល្បីខ្លាំងតាមរយៈបទ Cover ចំណងជើងថា "Celica អស់សាំង" ដែលមកដល់ពេលនេះមានអ្នកចូលមើលដល់ទៅជាង២លានដងឯណោះ នៅក្នុងបណ្ដាញសង្គមវីដេអូ YouTube។

ថ្លែងមកកាន់ Sabay លោក Jay Chan បានបញ្ជាក់ថាខ្លួនបានផ្លាស់ទីលំនៅពីព្រះរាជាណាចក្រកម្ពុជា មកសហរដ្ឋអាមេរិកតាំងពីឆ្នាំ ១៩៨៥ មកម្ល៉េះពេលលោកទើបតែមានអាយុ៤ឆ្នាំ ដោយបានរស់នៅទីក្រុង Modesto រដ្ឋ California។ សព្វថ្ងៃលោកមានទីលំនៅនៅទីក្រុង Stockton រដ្ឋ California។

ពេលសាកសួរជុំវិញ សកម្មភាពសិល្បៈរបស់លោក Jay បញ្ជាក់ថាខ្លួនចូលចិត្តច្រៀងតាំងពីអាយុ ១២ឆ្នាំមកម្ល៉េះ ដោយលោកចូលចិត្តបទចម្រៀងបែបខ្មែរ ជាជាងចម្រៀងបទបែបបរទេស។ លោកចូលចិត្តចម្រៀងរបស់លោកតា សិន ស៊ីសាមុត ជាងគេ។ មូលហេតុមួយទៀតនោះគឺ ដោយសារតែម្ដាយរបស់លោកធ្លាប់ជាអ្នកចម្រៀងតាមកម្មវិធីផ្សេងៗ តាំងពីលោកមានវ័យក្មេងផងដែរ។

លោក Jay Chan និង Badassvon

មុននឹងផ្ទុះតាមរយៈបទ "Celica អស់សាំង" ដែលជាសំនៀងដើមរបស់លោក គង់ ឌីណា បញ្ចេញតាំងពីទសវត្សទី៩០ លោកក៏បានច្រៀង Cover បទពីរោះជាច្រើនដូចជា "ចម្លើយចុងក្រោយ", “ឯណាទៅឋានសួគ៌" និង "ទេពធីតាឋានកណ្ដាល" ជាដើម។

សព្វថ្ងៃនេះលោកកំពុងតែព្យាយាមបញ្ចេញចម្រៀង Cover បន្ថែមទៀតយ៉ាងហោចណាស់ឲ្យបាន១បទក្នុងមួយខែ ដោយមានការថតថ្មីនិងកែសម្រួលភ្លេងឲ្យកាន់តែទាន់សម័យ។ ប៉ុន្តែលោកក៏មានគម្រោងផលិតបទចម្រៀងនិពន្ធថ្មីខ្លួនឯងផងដែរ ព្រមទាំងអាចមកថត MV នៅប្រទេសកំណើតកម្ពុជាផងដែរនៅពេលអនាគត។

ចំណុចសំខាន់បំផុតដែលជំរុញលោកឲ្យផលិតចម្រៀងតាមបែបខ្មែរនេះ គឺដោយសារតែលោកចង់ឲ្យប្រជាជនខ្មែរ ដែលកំពុងរស់នៅទឹកដីមហាអំណាចកុំឲ្យភ្លេចវប្បធម៌ជាតិកំណើតរបស់ខ្លួន។ ថ្មីៗនេះលោកទើបតែបានបញ្ចេញបទចម្រៀងថ្មីមួយបទគឺ "Cambodian Gentleman”៕