មកដឹងច្បាស់ប្រវត្តិកម្ពុជានៅ AFF Championship តាំងពីឆ្នាំដំបូង

2018-11-05 02:23:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពានរង្វាន់បាល់ទាត់ថ្នាក់តំបន់ដែលបច្ចុប្បន្នមានឈ្មោះថា AFF Suzuki Cup ត្រូវបានបង្កើតឡើងដំបូងនៅឆ្នាំ ១៩៩៦ ដែលកាលនោះមានឈ្មោះដំបូង Tiger Cup ហើយបន្ទាប់មកឈ្មោះ ASEAN Football Championship និងចុងក្រោយឈ្មោះ Suzuki Cup។

ក្រុមកម្ពុជាកាលពីឆ្នាំ២០១២

ដំបូងឡើយ ប្រទេសចំនួន៦ បានក្លាយជាសមាជិកស្ថាបនិកនៃសហព័ន្ធបាល់ទាត់អាស៊ាន (AFF) គឺប្រ៊ុយណេ ឥណ្ឌូណេស៊ី ម៉ាឡេស៊ី ហ្វីលីពីន សិង្ហបុរី និងថៃ បានចូលរួមក្នុងកម្មវិធីនេះ ខណៈប្រទេស៤ទៀត ដែលមិនទាន់ចូលជាសមាជិក AFF មានដូចជា កម្ពុជា ឡាវ មីយ៉ាន់ម៉ា និងវៀតណាម ពេលនោះក៏ត្រូវបានអញ្ជើញឲ្យចូលរួមផងដែរ។

ចាប់តាំងពីបង្កើតពានរង្វាន់នេះមក ក្រុមបាល់ទាត់ក្រុមធំជម្រើសជាតិកម្ពុជាបានចូលរួមប្រកួតចំនួន១១ដងហើយគិតទាំងឆ្នាំ២០១៨នេះ ប៉ុន្តែធ្លាប់អវត្តមានម្ដងក្នុងឆ្នាំ២០០៧។

ពានរង្វាន់ AFF Suzuki Cup ឆ្នាំ២០១៨

ឆ្នាំ១៩៩៦

ការចូលរួមប្រកួតលើកដំបូងនេះកម្ពុជារង់បរាជ័យធ្ងន់នៅលើទឹកដីសិង្ហបុរី។ បន្ទាប់ពីឆ្លងកាត់៤ប្រកួតមិនស្គាល់ពិន្ទុសោះ។ ប្រកួតលើកទីមួយកម្ពុជាចាញ់វៀតណាម៣-១ លើកទី២ចាញ់មីយ៉ាន់ម៉ា ៥-០ លើកទី៣ ចាញ់ឥណ្ឌូណេស៊ី ៣-០ និងចុងក្រោយចាញ់ឡាវ១-០។ លើកទីមួយនេះ ប្រទេសថៃជាជើងឯក។

ឆ្នាំ១៩៩៨

ព្រឹត្តិការណ៍លើទីពីរត្រូវបានរៀបចំឡើងនៅប្រទេសវៀតណាម និងត្រូវប្រកួតជម្រុះដោយកម្ពុជាស្ថិតនៅក្នុងពូល B មានសិង្ហបុរី និង ហ្វីលីពីន។ ការចូលរួមលើកនេះ កម្ពុជាស្គាល់១ពិន្ទុស្ថិតនៅលេខរៀងទីពីរក្នុងពូល បន្ទាប់ពីស្មើហ្វីលីពីន ១-១ និងចាញ់សិង្ហបុរី ៣-០ ហើយសិង្ហបុរីជាអ្នកឡើងទៅជុំផ្តាច់ព្រ័ត្រ។ ប្រទេសសិង្ហបុរីជាអ្នកលើកពាននៅលើទឹកដីវៀតណាម។

ឆ្នាំ២០០០

ឆ្នាំ២០០០នោះពុំមានការប្រកួតជម្រុះទេដោយក្រុមទាំងអស់ចំនួន៩ត្រូវបានបែងចែកជាពីរពូល។ កម្ពុជាស្ថិតនៅពូល B ដោយមានវៀតណាម ម៉ាឡេស៊ី សិង្ហបុរី និងឡាវ។ ឆ្លងកាត់ការប្រកួត៤លើកកម្ពុជាទទួលបាន៣ពិន្ទុស្ថិតនៅលេខរៀងទី៤ក្នុងតារាង បន្ទាប់ពីឈ្នះឡាវ៣-០ ប៉ុន្តែចាញ់សិង្ហបុរី១-០ ចាញ់វៀតណាម៦-០ និងចាញ់ម៉ាឡេស៊ី៣-២។ ឆ្នាំនេះប្រទេសថៃជាអ្នកលើកពាននៅលើទឹកដីរបស់ខ្លួន។

ឆ្នាំ២០០២

ឆ្នាំ២០០២ ប្រទេសសិង្ហបុរី និងឥណ្ឌូណេស៊ីធ្វើជាសហម្ចាស់ផ្ទះ ជម្រើសជាតិកម្ពុជាស្គាល់៣ពិន្ទុដូចកាលឆ្នាំ២០០០។ កម្ពុជាស្ថិតនៅក្នុងពូល A ដោយមាន៥ប្រទេសគឺ វៀតណាម ឥណ្ឌូណេស៊ី មីយ៉ាន់ម៉ា និងហ្វីលីពីន។ ការប្រកួតទាំង៤លើក កម្ពុជាចាញ់វៀតណាម ៩-២, ចាញ់ឥណ្ឌូណេស៊ី ៤-២, ចាញ់មីយ៉ាន់ម៉ា៥-០ ប៉ុន្តែចុងក្រោយឈ្នះហ្វីលីពីន១-០ ដើម្បីបាន៣ពិន្ទុវិលត្រឡប់មកផ្ទះវិញ។ ឆ្នាំនោះប្រទេសថៃជាជើងឯក។

ក្រុមគោព្រៃកម្ពុជា

ឆ្នាំ២០០៤

ឆ្នាំនោះប្រទេសកម្ពុជាមិនស្គាល់ពិន្ទុឡើងដោយស្ថិតនៅបាតតារាងក្នុងពូល B ដែលមានប្រទេសវៀតណាម ឥណ្ឌូណេស៊ី សិង្ហបុរី និងឡាវ។ ឆ្លងកាត់៤ប្រកួត កម្ពុជាចាញ់ទាំង៤គឺចាញ់វៀតណាម៩-១, ចាញ់ឡាវ ២-១, ចាញ់ឥណ្ឌូណេស៊ី ៨-០ និងចាញ់សិង្ហបុរី ៣-០។ ព្រឹត្តិការណ៍ដែលប្រទេសម៉ាឡេស៊ី និងវៀតណាមធ្វើសហម្ចាស់ផ្ទះនេះ ប្រទេសសិង្ហបុរីជាជើងឯក។

ឆ្នាំ២០០៧

Tiger Cup ត្រូវបានប្ដូរឈ្មោះជា ASEAN Football Championship នៅឆ្នាំ២០០៧ ហើយក៏មិនបានរៀបចំការប្រកួតនៅឆ្នាំ២០០៦តាមលក្ខន្តិកៈដែលត្រូវរៀបចំការប្រកួតពីរឆ្នាំម្ដង ប៉ុន្តែលើកទៅឆ្នាំ២០០៧នៅប្រទេសថៃ ខណៈកម្ពុជាមិនបានចូលរួមប្រកួតទេ។ ឆ្នាំនេះប្រទេសសិង្ហបុរីជាជើងឯក។

ឆ្នាំ២០០៨

មួយឆ្នាំក្រោយមកទើបប្រទេសកម្ពុជាបានចូលរួមការប្រកួតនៅប្រទេសមីយ៉ាន់ម៉ា។ ស្ថិតនៅក្នុងពូល A ដែលមានប្រទេសសិង្ហបុរី ឥណ្ឌូណេស៊ី និងមីយ៉ាន់ម៉ា ក្រុមបាល់ទាត់ជម្រើសជាតិកម្ពុជាស្ថិតនៅបាតតារាង ក្រោយចាញ់ទាំង៣ប្រកួតគឺចាញ់សិង្ហបុរី ៥-០, ចាញ់ ឥណ្ឌូណេស៊ី, ៤-០ និងចាញ់មីយ៉ាន់ម៉ា៣-២។ ឆ្នាំនេះ ប្រទេសវៀតណាមជាជើងឯកដែលឥណ្ឌូណេស៊ី និងថៃជាសហម្ចាស់ផ្ទះ។

ឆ្នាំ២០១០

ឆ្នាំ២០១០ ពាននេះត្រូវបានប្តូរឈ្មោះជា Suzuki Cup ហើយក៏រៀបចំឲ្យមានការប្រកួតជម្រុះដើម្បីស្វែងរកពីរក្រុមឡើងទៅជុំផ្ដាច់ព្រ័ត្រ។ វគ្គជម្រុះឆ្នាំ២០១០នេះធ្វើនៅប្រទេសឡាវ ក្រុមបាល់ទាត់កម្ពុជាធ្វើបានល្អគួរសមដោយទទួលបាន៥ពិន្ទុក្រោយស្មើ២ប្រកួត និងឈ្នះ១ប្រកួតក្នុងនោះស្មើឡាវ០-០, ស្មើហ្វីលីពីន ០-០ និងឈ្នះទីម័រខាងកើតកើត៤-២។ ប៉ុន្តែក្រុមពីរឡើងទៅជុំផ្ដាច់ព្រ័ត្រគឺឡាវ និងហ្វីលីពីន ខណៈក្រុមទីម័រខាងកើតស្ថិតនៅបាតតារាងក្នុងពូល B ហើយជុំផ្ដាច់ព្រ័ត្រ ប្រទេសម៉ាឡេស៊ីជាជើងឯក។

ឆ្នាំ២០១២

ឆ្នាំ២០១២ ពានរង្វាន់នេះទទួលរៀបចំធ្វើសហម្ចាស់ផ្ទះដោយប្រទេសថៃ និងម៉ាឡេស៊ី។ កម្ពុជាទទួលរង់បរាជ័យធ្ងន់ណាស់ដោយ៤ប្រកួតក្នុងវគ្គចម្រុះ កម្ពុជាមិនស្គាល់១ពិន្ទុសោះ។ លទ្ធផលទាំង៤ប្រកួតនោះគឺចាញ់ទីម័រខាងកើត៥-១, ចាញ់ឡាវ ១-០, ចាញ់ប្រ៊ុយណេ ៣-២ និងបន្តចាញ់មីយ៉ាន់ម៉ា៣-០។ ប្រទេសមីយ៉ាន់ម៉ា និងឡាវជាអ្នកឡើងទៅជុំផ្តាច់ព្រ័ត្រដែលប្រទេសសិង្ហបុរីជាជើងឯក។

ឆ្នាំ២០១៤

ឆ្នាំ២០១៤នេះការប្រកួតវគ្គជម្រុះត្រូវធ្វើនៅទីក្រុងវៀងចន្ទន៍ប្រទេសឡាវពីថ្ងៃអាទិត្យ ទី១២ ខែតុលានេះហើយ។ ៥ប្រទេសគឺកម្ពុជា ទីម័រខាងកើត ប្រ៊ុយណេ ឡាវ និងមីយ៉ាន់ម៉ាប្រជែងគ្នាស្វែងរកកៅអី២ឡើងជុំផ្ដាច់ព្រ័ត្រនៅប្រទេសវៀតណាម និងសិង្ហបុរីជាសហម្ចាស់ផ្ទះ។ វគ្គជម្រុះនេះកម្ពុជាស្ថិតនៅលេខ៣មាន៦ពិន្ទុពីការចាញ់ឡាវ៣-២, ចាញ់មីយ៉ាន់ម៉ា ១-០ និងឈ្នះទីម័រខាងកើត ៣-២, ឈ្នះប៊្រុយណេ ១-០។ ពេលនោះម្ចាស់ផ្ទះឡាវ និងមីយ៉ាន់ម៉ា ឡើងជុំផ្តាច់ព្រ័ត្រ ហើយថៃជាជើងឯក។

ក្រុមកម្ពុជាកាលពីឆ្នាំ២០១៦

ឆ្នាំ២០១៦

ឆ្នាំ២០១៦ កម្ពុជាធ្វើម្ចាស់ផ្ទះវគ្គជម្រុះដែលមានប្រទេសឡាវ ប៊្រុយណេ និងទីម័រខាងកើត។ ក្នុងនាមជាម្ចាស់ផ្ទះ កម្ពុជាធ្វើបានល្អឥតខ្ចោះដោយឈ្នះទាំង៣ប្រកួតមាន៩ពិន្ទុពេញគឺឈ្នះឡាវ ២-១, ឈ្នះប៊្រុយណេ ៣-០ និងឈ្នះទីម័រខាងកើត ៣-២។ កម្ពុជាបានឡើងទៅជុំផ្តាច់ព្រ័ត្រដែលមីយ៉ាន់ម៉ា និងហ្វីលីពីនធ្វើជាសហម្ចាស់ផ្ទះ។ ឆ្នាំនេះថៃឈ្នះជើងឯកទៀត។

ឆ្នាំ២០១៨

ឆ្នាំ២០១៨នេះមានតែ២ប្រទេសប៉ុណ្ណោះប្រកួតជម្រុះគឺទីម័រខាងកើត និងប៊្រុយណេ។ បន្ទាប់ពីប្រកួតចប់ទាំងពីរជើង ទីម័រខាងកើតឈ្នះប៊្រុយណេដោយលទ្ធផល ៣-២ បានឡើងទៅជុំផ្តាច់ព្រ័ត្រដែលមានប្រទេសកម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម។