រស់នៅក្រៅប្រទេសយូរឆ្នាំ តារាខ្មែរម្នាក់មិនភ្លេចផលិតតន្ត្រីទាក់ទងស្រុកកំណើត

2018-11-07 04:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះបីជាផ្លាស់ទីលំនៅទៅនៅប្រទេសអូស្ត្រាលីតាំងពីវ័យ១១ឆ្នាំ លោក ឱ សាទីយ៉ា នៅតែមិនភ្លេចពីតន្ត្រីខ្មែរដែលជាប្រទេសកំណើតនិងនៅតែផលិតចម្រៀងជាហូរហែរហូតមកដល់ពេលបច្ចុប្បន្ន។

លោក ឱ សាទីយ៉ា

ថ្លែងមកកាន់ Sabay លោក សាទីយ៉ា បានប្រាប់ថាលោកចាប់ផ្ដើមច្រៀងតាំងពីអាយុ៦ឆ្នាំមកម្ល៉េះ ដែលពេលនោះ តារារូបនេះមានទីលំនៅនៅខេត្តបាត់ដំបង។ រហូតដល់វ័យ១១ឆ្នាំ ក្រុមគ្រួសារលោកក៏ផ្លាស់ទីលំនៅទៅរស់នៅប្រទេសអូស្ត្រាលី។ តាំងពីចាប់ផ្ដើមរស់នៅប្រទេសនេះ សាទីយ៉ា ស្ទើរតែភ្លេចភាសាកំណើតទៅហើយ ដោយភាគច្រើនប្រើតែភាសាអង់គ្លេសក្នុងការប្រាស្រ័យទាក់ទង។

ដោយសារតែស្រលាញ់តន្ដ្រីជាតិ តារាមកពីខេត្តបាត់ដំបងរូបនេះ នៅតែព្យាយាមរៀនអាននិងសរសេរភាសាខ្មែរ ជាពិសេសគឺស្ដាប់ចម្រៀងរបស់លោកតា ស៊ិន ស៊ីសាមុត។ ដូច្នេះហើយទើបតន្ដ្រីរបស់លោកទទួលឥទ្ធិពលយ៉ាងខ្លាំងពីតន្ដ្រីរបស់អធិរាជសំឡេងមាស ព្រមទាំងកំពូលតារាចម្រៀង Michael Jackson។ សាទីយ៉ា បញ្ជាក់ថាស្ទីលចម្រៀងរបស់លោកគឺលក្ខណៈបែបខ្មែរ ប៉ុន្តែលាយបញ្ចូលចង្វាក់ Pop និង RnB ជាមួយគ្នាធ្វើឲ្យតន្ដ្រីលោកមានលក្ខណៈពីរោះប្លែក។

សាទីយ៉ា ទើបតែចាប់ផ្ដើមផលិតចម្រៀង Original ក្នុងរយៈពេល២ឆ្នាំ កន្លេងទៅនេះដោយបានបញ្ចេញបទ "I Never Said Goodbye” ជាបទដំបូង ចូលរួមសម្ដែងដោយ ប្រាសាទ ដាវីន និងបទទី២ "Forever” ចូលរួមបកស្រាយដោយ ឌី សូនីតា។ ថ្មីៗនេះលោកទើបតែបញ្ចេញបទចម្រៀង Cover មួយបទចង្វាក់សារ៉ាវាន់ប៉ុន្តែជាមួយការកែច្នៃបទភ្លេងថ្មី គឺបទ "ក្លិនក្រអូប" ដែលជាបទចម្រៀងពីលំនាំដើមច្រៀងដោយលោកតា ស៊ិន ស៊ីសាមុត។

ឈុតឆាកនៅក្នុង MV "ក្លិនក្រអូប"

ជុំវិញការផលិតតន្ត្រី តារាអាណិកជនរូបនេះបញ្ជាក់ថា តារាៗខ្មែរទាំងអស់មិនថាជានៅប្រទេសណានោះទេ សុទ្ធតែស្រលាញ់សិល្បៈតន្ត្រីខ្មែរ និងទាមទារឲ្យមានការគាំទ្រឲ្យបានច្រើន ជាពិសេសពីសំណាក់សារព័ត៌មានក្នុងស្រុក ព្រមទាំងពីទូរទស្សន៍និងវិទ្យុជាដើម ដើម្បីជាកម្លាំងចិត្តក្នុងការបន្តផលិតតន្ដ្រីមានគុណភាពតទៅមុខទៀត។

ទស្សនាវីដេអូចម្រៀងបទ "ក្លិនក្រអូបខាងក្រោម"៖