Aaron Yan ក្រុម Fahrenheit សុំទោសអ្នកគាំទ្រ ក្រោយទទួលស្គាល់ថា លោកស្រឡាញ់ភេទដូចគ្នា

2018-11-08 02:27:56
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ ព័ត៌មានស្រឡាញ់ភេទដូចគ្នារបស់សមាជិកក្រុម Fahrenheit តារាចម្រៀង Aaron Yan កំពុងតែក្លាយជាប្រធានបទដ៏ក្ដៅគគុកពាសពេញបណ្ដាញសារព័ត៌មានតៃវ៉ាន់។ ព័ត៌មាននេះដែរ ត្រូវបានបែកធ្លាយ ក្រោយអតីតមិត្តប្រុសរបស់លោកម្នាក់ បានបង្ហោះរូបភាពផ្អែមល្ហែមរបស់ពួកគេ ហើយចោទប្រកាន់តារាចម្រៀងរូបនេះថា មានទំនាក់ទំនងស្នេហាជាមួយប្រុសដល់ទៅ ៣ នាក់ក្នុងពេលតែមួយ។

ក្រោយដំណឹងមួយនេះបានបែកធ្លាយចេញភ្លាម តារាចម្រៀង Aaron Yan បានបដិសេធការចោទប្រកាន់របស់អតីតមិត្តប្រុសលោករូបនោះ រួចក៏បានបង្ហោះសារយ៉ាងវែងអន្លាយ ដើម្បីបកស្រាយ រួមនឹងសុំទោសអ្នកគាំទ្រសម្រាប់រឿងរ៉ាវរបស់លោកកន្លងមក។ ក្នុងសារដ៏វែងនោះ តារាចម្រៀងរូបនេះបានសរសេរថា៖

“ខ្ញុំសុំទោស ដែលខ្ញុំមិនអាចគ្រប់គ្រងជីវិតផ្ទាល់ខ្លួនឯងឲ្យបានល្អ ដែលធ្វើឲ្យរឿងអាស្រូវរបស់ខ្ញុំត្រូវបានបែកធ្លាយបែបនេះ។ ខ្ញុំតែងតែធ្វើល្អដាក់មនុស្សគ្រប់គ្នាជាមួយបំណងល្អចេញពីចិត្តរបស់ខ្ញុំ ប៉ុន្តែ ខ្ញុំគ្រាន់តែជាមនុស្សធម្មតា គ្មានភាពល្អឥតខ្ចោះ ហើយក៏ចេះមានអារម្មណ៍ធម្មតាដូចមនុស្សទូទៅដែរ។ សម្រាប់ទំនាក់ទំនងរវាងមនុស្សក្នុងលោកនេះ ជាញឹកញាប់តែងតែមានរឿងមិនសប្បាយចិត្តអាចកើតឡើងហើយ ពេលខ្លះក៏មិនអាចគ្រប់គ្រងបានដែរ គឺត្រូវការពេលជាច្រើនដើម្បីជួសជុលវាឡើងវិញ។ ខ្ញុំជាមនុស្សម្នាក់ដែលមិនចូលចិត្ត ឲ្យមានការសង្ស័យចំពោះទំនាក់ទំនងស្នេហាដែលទើបតែចាប់ផ្ដើមនោះទេ ជាធម្មតាខ្ញុំក៏មិនត្រូវការ ការពិចារណាវែកញែកអីវែងឆ្ងាយដែរ"។

តារាចម្រៀងរូបនេះបានបន្តទៀតថា៖ "ខ្ញុំពិតជាធ្លាប់បានស្រឡាញ់គាត់ខ្លាំងពិតមែន ប៉ុន្តែនៅពេលដែលពួកយើងបានបែកគ្នា ដោយមិនបានរៀបចំអ្វីឲ្យបានដាច់ស្រេច រឿងរ៉ាវក៏បានកើតមានឡើងបែបនេះ ខ្ញុំក៏មានការភ្ញាក់ផ្អើលដូចគ្នា។ ឲ្យខ្ញុំសុំទោស ខ្ញុំនឹងព្យាយាមកែប្រែស្ថានការណ៍ឡើងវិញ ដើម្បីឲ្យក្លាយជាមនុស្សល្អ សុំទោសសម្រាប់គ្រប់យ៉ាងដែលធ្វើឲ្យមនុស្សមួយចំនួនមានការឈឺចាប់។ ខ្ញុំពិតជាសុំទោសមែនទែន ចំពោះអ្នកគាំទ្រ មិត្តភក្តិ សាច់ញាតិ ក្រុមគ្រួសារខ្ញុំទាំងអស់ ដែលតែងតែលើកទឹកចិត្តខ្ញុំ។ អរគុណចំពោះអ្នកទាំងអស់គ្នាដែលតែងតែជួយខ្ញុំកន្លងមក ខ្ញុំនឹងចងចាំទុកក្នុងបេះដូងរបស់ខ្ញុំ។ នេះក៏ជាមេរៀនមួយសម្រាប់ខ្ញុំ។ ជាចុងក្រោយ សុំទោសអ្នកទាំងអស់គ្នា ដែលបានចំណាយពេលវេលាដ៏មានតម្លៃសម្រាប់ការបារម្ភពីជីវិតរបស់ខ្ញុំ ដោយរឿងរ៉ាវទាំងនេះ គឺគ្មានប្រយោជន៍អ្វីសម្រាប់អ្នកទាំងអស់គ្នាគួរបារម្ភទាល់តែសោះ"៕

ប្រភព៖ Kenh14 ប្រែសម្រួល៖ អន សុភក្ត្រា