គ្រូកម្ពុជា បកស្រាយរឿងលេងមិនទៅមុខ ហើយថាលទ្ធផលយប់នេះល្អជាងមុន
- 2018-11-08 14:00:19
- ចំនួនមតិ 0 | ចំនួនចែករំលែក 0
គ្រូកម្ពុជា បកស្រាយរឿងលេងមិនទៅមុខ ហើយថាលទ្ធផលយប់នេះល្អជាងមុន
ចន្លោះមិនឃើញ
ចាញ់ម៉ាឡេស៊ី ០-១ អម្បាញ់មិញនេះ លោក Felix គ្រូបង្វឹកក្រុមបាល់ទាត់ជម្រើសជាតិកម្ពុជា បានបញ្ជាក់ថាជាលទ្ធផលល្អជាងលើកមុនដែលកម្ពុជាចាញ់ដល់ទៅ ១-៣។
ក្រុមកម្ពុជាបានបរាជ័យក្រោមថ្វីជើងរបស់ក្រុមម៉ាឡេស៊ីក្នុងលទ្ធផល ០-១ នៃការប្រកួតបើកឆាកពានរង្វាន់ AFF Suzuki Cup 2018 ។ ទម្រង់លេងនៃការប្រកួតនេះដែរ បានធ្វើឱ្យអ្នកគាំទ្រដាក់ចម្ងល់ថាកម្ពុជាហាក់ដូចជាមិនមានបាល់លេងទៅមុខទីខាងម៉ាឡេស៊ីច្រើន ដូចកាលប្រកួតមុនៗនោះទេ។ ជាក់ស្ដែង បែរជាលេងពីក្រោមមក នៅតំបន់បម្រើច្រើនទៅវិញ។
ចំពោះរឿងនេះ លោក Felix បានបកស្រាយថាបាល់ទាត់គឺដូច្នេះ។ ក្រុមមួយមិនអាចលេងសម្រុករហូតឡើយ ជូនកាលពួកគេត្រូវលេងនៅតំបន់បម្រើនេះសិន ដើម្បីស្វែងរកឱកាសទៅមុខបន្ដទៀត។ ស្របពេលដែលម៉ាឡេស៊ី មិនមែនជាក្រុមមានប្រព័ន្ធការពារខ្សោយឡើយ។ ដូច្នេះវាពិបាកសម្រាប់ក្រុមកម្ពុជាក្នុងការលេងនៅតំបន់គ្រោះថ្នាក់របស់ម៉ាឡេស៊ី។
"ខ្ញុំមានមោទនភាព នៅពេលឃើញកូនក្រុមលេងល្អប្រសើរ សហការគ្នាបានល្អ បើទោះជាលទ្ធផលចាញ់ ដែលយើងមិនចង់បានមែន។ ប៉ុន្តែប្រកួតនេះ យើងបានធ្វើវាល្អប្រសើរ យើងសង្ឃឹមនឹងធ្វើបានល្អបន្ថែមទៀតនៅប្រកួតបន្ទាប់។ យើងរីករាយក្នុងការប្រកួតនេះ ដែលយើងអាចលេងបានយ៉ាងល្អរហូតដល់៩០នាទីពេញ"។ សម្ដីលោក Felix។
ប្រកួតបន្ទាប់ទៀត កម្ពុជានឹងត្រូវតតាំងជាមួយក្រុមមីយ៉ាន់ម៉ា នៅថ្ងៃទី១២ មុនប៉ះជាមួយក្រុមឡាវនៅថ្ងៃទី២០ និងបន្ដជួបក្រុមវៀតណាមនៅថ្ងៃទី២៤ទៀត ដែលជាការប្រកួតបញ្ចប់ពូល A តែម្ដង។
សម្រាប់ការប្រកួតដ៏សំខាន់ដែលមានមនុស្សចូលទស្សនាជាង៣ម៉ឺននាក់នេះ ក្រុមហ៊ុន PiPay បានរួមចំណែកជួយដល់អ្នកគាំទ្រតាមរយៈការទិញសំបុត្រទទួលបានការបញ្ចុះតម្លៃរហូតដល់៥០%។ ជាពិសេសជំរុញដល់ការទិញសំបុត្រតាមអនឡាញ ដើម្បីពលរដ្ឋកម្ពុជាងាយស្រួលចូលរួមលើកទឹកចិត្តដល់ក្រុមជម្រើសជាតិកម្ពុជា៕