ជីវិតតស៊ូរបស់ ស៊ឹម ប៊ុនស៊្រន់ ប្រចាំ ONE មុននឹងបានល្បីឈ្មោះ

2018-11-11 08:06:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់ជើងឯក Khmer Warrior Challenge រដូវកាលទី៣ ស៊ឹម ប៊ុនស្រ៊ន់ បានបញ្ចេញសមត្ថភាព និងភាពរីកចម្រើនពីរដូវកាលមួយទៅរដូវកាលមួយទៀតក្នុងការបំបាក់គូប្រកួតនីមួយៗ។ បន្ទាប់ពីបានហ្វឹកហាត់ត្រឹមតែ១ខែប៉ុណ្ណោះរូបគេត្រូវបានគេឲ្យឡើងប្រដាល់សេរី។ ថ្វីបើគាត់បានទទួលជ័យជម្នះលើការប្រកួតលើកទីដំបូង ប៉ុន្តែក្រោយមកត្រូវចាញ់ការប្រកួតបន្តបន្ទាប់រហូត៧ប្រកួតជាប់គ្នា។

កីឡាករ ស៊ឹម ប៊ុនស៊្រន់

មនុស្សភាគច្រើនប្រាកដជាអស់ជំនឿចិត្តលែងចង់បន្តនៅពេលខ្លួនទទួលបរាជ័យជាប់ៗគ្នាបែបនេះ ហើយផ្តោតលើអ្វីផ្សេងទៀតវិញ ប៉ុន្តែសម្រាប់ ប៊ុនស្រន់ វិញតស៊ូព្យាយាមបន្តទៀតមិនដូចអ្នកដ៏ទៃឡើយ។

អ្នកប្រដាល់វ័យ២៥ ឆ្នាំរូបនេះប្រាប់ពីប្រវត្តិរបស់ខ្លួនថា ៖ «ពេលខ្ញុំចាញ់ប្រកួតជាច្រើនដងពេក ឪពុកម្តាយបងប្អូន និងសាច់ញាតិ ប្រាប់ឱ្យខ្ញុំឈប់ពីអាជីពជាអ្នកប្រដាល់ទៅ។ ប៉ុន្តែខ្ញុំតាំងចិត្តថា ខ្ញុំមកទីនេះដោយចិត្តខ្លួនឯង មិនមែនដោយសារតែនរណាម្នាក់ជំរុញឲ្យខ្ញុំមកទេ។ គោលដៅរបស់ខ្ញុំគឺមកប្រកួតឲ្យខ្លាំង ដើម្បីបង្ហាញពិភពលោកពីសមត្ថភាពខ្ញុំថាខ្លាំងប៉ុនណា»។

ការប្តេជ្ញាចិត្តរបស់ ប៊ុនស្រ៊ន់ បានបើកផ្លូវជីវិតប្រដាល់ឲ្យមានឱកាសជាច្រើនហូរហែ។ បច្ចុប្បន្ន គាត់ហ្វឹកហាត់ជាមួយក្រុមកីឡាករខ្លាំងៗរបស់កម្ពុជានៅក្លឹប Cambodia Top Team ហើយក៏មានអាជីវកម្មខាងក្រៅមួយទៀតខាងផ្នែកកសិកម្មផងដែរ។

ស៊ឹម ប៊ុនស៊្រន់ និង CEO របស់ ONE

អ្នកខេត្តកំពង់ចាមរូបនេះកើតក្នុងគ្រួសារអ្នកស្រែចម្ការ ដូច្នេះគាត់ចាប់ផ្តើមស្រឡាញ់មុខរបរធ្វើចំការខ្លាំង ដូចគ្នានឹងអាជីពជាអ្នកប្រដាល់។ គាត់បាននិយាយទាំងអស់សំណើចថា ៖ «គ្រួសារខ្ញុំជាអ្នកធ្វើចម្ការ ហើយកាលពីក្មេងខ្ញុំត្រូវនៅចម្ការរហូត។ អ្នកស្រុកខ្ញុំគេដាំប្រភេទដំណាំតូចៗ ដែលខ្ញុំស្អប់ខ្លាំងណាស់។ ខ្ញុំស្បថថា ខ្ញុំធ្វើអីក៏ដោយឲ្យតែជៀសឆ្ងាយពីធ្វើចម្ការ។ តែឥឡូវវិញ ខ្ញុំមិនអាចបែងចែករវាងអាជីពទាំងពីរទេ។ ខ្ញុំស្រឡាញ់ការងារកសិកម្មខ្លាំងដូចខ្ញុំស្រឡាញ់វិស័យកីឡាអញ្ចឹង»។

ជាធម្មតា ប៊ុនស្រ៊ន់ ហ្វឹកហាត់នៅក្លឹប៥ដងក្នុងមួយអាទិត្យ ជាមួយមិត្តអ្នកប្រដាល់ប្រចាំ ONE Championship ដូចជា រិន សារ័ត្ន ស សី និង មាស ម៉ើ ជាដើម។

ឥឡូវ ស៊ឹម ប៊ុនស៊្រន់ មិនទាន់មានគេចាប់គូប្រកួតឲ្យនោះទេ ប៉ុន្តែគាត់ក៏នៅបន្តហ្វឹកហាត់ ក៏ដូចជាបំប៉នសុខភាពសម្រាប់ត្រៀមខ្លួនជាស្រេច បើសិន ONE Championship រៀបចំចាប់គូឲ្យប្រកួតនាពេលខាងមុខ។

ប៊ុនស្រ៊ន់ មានកិត្ដិយសដែលអាចតំណាងឱ្យប្រទេសកំណើតនៅក្នុងស្ថាប័នក្បាច់គុនធំជាងគេនៅអាស៊ី ហើយដែលខ្លួនមានឱកាសបង្ហាញពីការតស៊ូ និងភាពក្លាហានរបស់កម្ពុជា។ គាត់និយាយទាំងញញឹមថា ៖ «ពេលយើងចាប់ផ្តើមឡើងនៅលើឆាកអន្តរជាតិម្តងៗ យើងមានមោទនភាពណាស់ក្នុងនាមជាខ្មែរម្នាក់»៕