កសិកររំឭកពីក្ដារបោកស្រូវ ខណៈគ្រឿងយន្តកសិកម្មកំពុងវាយលុក

2018-11-12 02:40:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាប់តាំងពីនានវត្តមានម៉ាស៊ីនបោកស្រូវកាន់តែច្រើនពីមួយឆ្នាំទៅមួយឆ្នាំ កសិករមិនតិចទេបានងាកមកប្រើម៉ាស៊ីនជាជាងបោកស្រូវដោយក្តារដូចកាលជាងមួយទសវត្សរ៍មុន។

(លោក សុខ ឈួន កំពុងរៀបចំក្ដារសម្រាប់បោកស្រូវ)

លោក សុខ ឈួន កសិករ រស់នៅស្រុកគិរីវង្ស ខេត្តតាកែវ កំពុងរៀបចំលានសម្រាប់បោកស្រូវក្រាល និងព័ទ្ធជុំវិញដោយស្បៃអញ្ចង(ខ្លះហៅថាស្បៃឈឹប) បានរៀបរាប់ថាកាលជាងមួយទសវត្សរ៍មុននៅតាមវាលស្រែសម្បូរអ្នកធ្វើលានបោកស្រូវណាស់។

លានបោកស្រូវធ្វើឡើងសម្រាប់ដាក់ស្រូវដែលទើបច្រូតចេញពីស្រែ និងត្រៀមបោកដោយប្រើក្ដារសម្រាប់យកគ្រាប់ទុកដាក់។

កសិករខាងលើអះអាងថាក្រោយពីមានវត្តមានរបស់ម៉ាស៊ីនបោកស្រូវកាន់តែ ច្រើន កសិករក៏ងាកមកប្រើសេវាម៉ាស៊ីនបោកស្រូវនេះជំនួសកម្លាំងមនុស្ស និងសម្ភារៈបែបបុរាណនេះវិញ។ សម្រាប់កសិករវ័យ៦៥ឆ្នាំនេះ វិញ លោកក៏បានប្រើសេវាម៉ាស៊ីនបោកស្រូវនេះដែរ តែថាសម្រាប់ស្រែឆ្ងាយៗដែលម៉ាស៊ីនចូលមិនដល់លោកនៅបន្តធ្វើលាន និងប្រើក្ដារសម្រាប់បោកស្រូវដដែល។

លោកបន្តថា៖ « កាលមុនបោកស្រូវប្រវាស់ដៃគ្នានៅពេលយប់ខែភ្លឺកសិករម្ចាស់ស្រែភាគច្រើនតែងតែធ្វើបបរត្នោតឲ្យហូបនៅពេលបោកស្រូវរួច...ដោយអ្នកខ្លះទៀតបង្អាប់ម្ចាស់ស្រែថាបបរស្ករដាក់ប្រហុករួចសើចសប្បាយក្អាកក្អាយពេញលានស្រូវ...ឲ្យតែដល់ខែច្រូតគឺខែនេះហើយតាមវាលស្រែនីមួយៗ...កសិករនាំគ្នាធ្វើលានបោកស្រូវប្រណាំងគ្នា...លានខ្លះតូចខ្លះធំទៅតាមទំហំដីស្រែ»។

លោកបន្តថាពេលនិយាយពីលានស្រូវលោកនឹកឃើញដល់ទសវត្សឆ្នាំ១៩៨០លោកថាកាលសម័យនោះគ្មានប្រើម៉ាស៊ីនទេគឺប្រើតែកម្លាំងមនុស្សជញ្ជូនកណ្តាប់ដាក់លានឲ្យគេបោកស្រូវគឺថាបើលានតូចប្រើក្តារបោក២ឬ៣ តែបើលានធំវីញប្រើក្តាររហូតដល់៥ឬ៦។

លោកបន្តថា៖ «អ្នកបោកដឹងតែបោកហើយអ្នកជញ្ជូនកណ្តាប់ដឹងតែជញ្ជូនកណ្តាប់...ហើយអ្នកបោសជៅ(សម្រាមពេលបោកស្រូវ)ដឹងតែហត់ជាងគេបន្តិចហើយព្រោះក្តាបោកច្រើនសម្រាមច្រើនដែរ...សប្បាយម្យ៉ាងដែរហើយពេលខ្លះទៀតខ្ញុំដេកក្នុងពំនូកចំប៉ើងចាំស្រូវមួយយប់ទល់ភ្លឺក៏មានដែរ»៕

អត្ថបទដោយ៖ ជិន វេន