និស្សិតខ្មែរ៤រូប ឈ្នះការប្រកួតផលិតវីដេអូល្អបំផុត នៅកូរ៉េខាងត្បូង

2018-11-12 04:56:04
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ និស្សិតមួយក្រុមដែលមានសមាជិកចំនួន៤រូប មកពីសាកលវិទ្យាល័យហ្សាម៉ាន់ ទើបតែត្រលប់មកពីកម្មវិធីប្រកួតគម្រោងអាជីវកម្មរៀបចំដោយសាលាពាណិជ្ជកម្មអន្តរជាតិ Solbridge នៅប្រទេសកូរ៉េខាងត្បូង។ កម្មវិធីនេះ បានប្រព្រឹត្តិឡើងចន្លោះពីថ្ងៃទី១៨ ដល់២៨ ខែតុលា ឆ្នាំ២០១៨។ និស្សិត២១ក្រុម មកពី២៤ប្រទេសផ្សេងគ្នាជុំវិញពិភពលោកបានចូលរួមការប្រកួតផែនការអាជីវកម្មនេះ។

និស្សិតហ្សាម៉ាន់ក្នុងការប្រកួតផែនការអាជីវកម្ម

កញ្ញា ច័ន្ទ រតនាភា និស្សិតឆ្នាំទី៤ ជំនាញគ្រប់គ្រងពាណិជ្ជកម្ម និងជាសមាជិកក្រុមប្រកួតមកពីហ្សាម៉ាន់បានថ្លែងឱ្យដឹងថា ការប្រកួតនេះមានបីដំណាក់កាលរួមមាន ការត្រៀមខ្លួនរបស់ក្រុមនីមួយៗ វគ្គជម្រុះ និងការប្រកួតផ្ដាច់ព្រាត់ ដែលក្រុមឆ្នើមចំនួន៨ ក្នុងចំណោម២១ ត្រូវបានតម្រូវឱ្យធ្វើបទបង្ហាញពីផែនការអាជីវកម្មរបស់ក្រុមខ្លួន។ ការធ្វើបទបង្ហាញពីផែនការអាជីវកម្មនេះ ក៏អាស្រ័យលើប្រធានបទផ្សេងៗ ដែលក្រុមនីមួយៗទទួលបានពីគណៈកម្មការផងដែរ។ ចំពោះក្រុមរបស់ខ្លួនវិញ រតនាភាថ្លែងថាខ្លួនទទួលបានប្រធានបទទាក់ទងនឹង “ការវិភាគទិន្នន័យ និងយុទ្ធសាស្ត្រក្នុងការប្រើប្រាស់ប្រាជ្ញាសិប្បនិម្មិត” (Big Data and Artificial Intelligence Strategies)។

កញ្ញាតាំង ស៊ើយូ និស្សិតជំនាញគ្រប់គ្រងពាណិជ្ជកម្ម និងជាមិត្តរួមក្រុមរបស់រតនាភាដែរ លើកឡើងថាក្រុមរបស់ខ្លួនបានជ្រើសយកគំនិតអាជីវកម្មដោយផ្តោតទៅលើទូរទស្សន៍ ដែលភ្ជាប់ជាមួយម៉ាស៊ីនត្រជាក់។ ផលិតផលនេះ ប្រើប្រាស់ប្រាជ្ញាសិប្បនិម្មិត តួយ៉ាងទូរទស្សន៍នឹងបិទដោយស្វ័យប្រវត្តិបើសិនជាគ្មានអ្នកមើល ខណៈដែលមុខងារម៉ាស៊ីនត្រជាក់ អាចប្រែប្រួលសីតុណ្ហភាពដោយស្វ័យប្រវត្តិ តាមរយៈសីតុណ្ហភាពក្នុងបរិយាកាសខាងក្រៅ និងវត្តមានរបស់មនុស្សនៅក្នុងបន្ទប់។ ក្រុមរបស់កញ្ញានឹកឃើញផលិតផលប្រភេទនេះ ដើម្បីតម្រូវទីផ្សារក្នុងប្រទេសអូស្ត្រាលី ខណៈដែលអចលនទ្រព្យនៅអូស្ត្រាលីមានតម្លៃខ្ពស់ ដែលតម្រូវឱ្យប្រជាជនប្រើប្រាស់សម្ភារៈក្នុងផ្ទះដែលសន្សំសំចៃកន្លែង។

ស៊ើយូ ឆ្លៀតពេលទំនេរពីការប្រកួត ដើម្បីធ្វើដំណើរទស្សនកិច្ចក្នុងប្រទេសកូរ៉េ

កញ្ញា សុទ្ធ សម្ផស្សរតនា សមាជិកក្នុងក្រុមមួយរូបទៀតថ្លែងថា ត្បិតតែក្រុមរបស់ខ្លួនមិនបានឈ្នះការប្រកួតក៏ពិតមែន ក្រុមរបស់សាកលវិទ្យាល័យហ្សាម៉ាន់ក៏បានឈ្នះជាក្រុមដែលផលិតវីដេអូល្អបំផុតផងដែរ ដែលការប្រកួតវីដេអូនេះត្រូវបានរៀបចំឡើងទន្ទឹមគ្នានឹងការប្រកួតផែនការអាជីវកម្ម។ សម្ផស្សរតនាបន្តទៀតថា ក្រុមរបស់ខ្លួនឈ្នះ ក៏ដោយសារតែវីដេអូដែលក្រុមខ្លួនបានបង្ហោះនៅលើបណ្ដាញសង្គមហ្វេសប៊ុកទាក់ទងនឹងផែនការអាជីវកម្ម ទទួលបានចំនួនចែករំលែកច្រើនជាងគេបំផុត រហូតដល់១២០០។ កញ្ញាទូច ច័ន្ទនិមល និស្សិតជំនាញធនាគារ និងហិរញ្ញវត្ថុ និងជាសមាជិកក្នុងក្រុមហ្សាម៉ាន់ដែរលើកឡើងថា អ្នករៀបចំកម្មវិធីក៏បានរៀបចំដំណើរទស្សនកិច្ច សម្រាប់អ្នកចូលរួមប្រកួតផងដែរ ដោយអ្នកទាំងនោះបានទៅធ្វើទស្សនកិច្ចសិក្សានៅក្រុមហ៊ុនKT&G និងក្រុមហ៊ុនSamsung។ ក្រុមរបស់ខ្លួនក៏បានធ្វើដំណើរទៅទីក្រុងសេអ៊ូល ទស្សនាសារមន្ទីរជាតិវិទ្យាសាស្ត្ររបស់កូរ៉េខាងត្បូង និងបរមរាជវាំងរបស់កូរ៉េខាងត្បូងផងដែរ។

និស្សិតទាំង៤រូបទទួលបានលិខិតសរសើរ តាមរយៈការឈ្នះការប្រកួតផលិតវីដេអូល្អបំផុត

ប័ណ្ណសរសើរ សម្រាប់ពានរង្វាន់វីដេអូល្អបំផុត

និមលកំលុងពេលទៅប្រកួតផែនការអាជីវកម្មក្នុងប្រទេសកូរ៉េ

ទាក់ទងនឹងកម្មវិធីនេះ ស៊ើយូបានស្វែងយល់ពីវប្បធម៌របស់ប្រទេសផ្សេងៗ និងបានរាប់អានមិត្តភក្ដិថ្មី ដែលមានគំនិតប្រហាក់ប្រហែលគ្នា។ ចំណែកឯសម្ផស្សរតនាវិញ យល់ថាខ្លួនបានទទួលនូវដំបូន្មានថ្មីៗ ពីគណៈកម្មការដែលសុទ្ធតែជាអ្នកជំនាញផ្នែកអាជីវកម្ម និងបច្ចេកវិទ្យាមកពីក្រុមហ៊ុនធំៗ ដូចជាLGជាដើម។ គួរបញ្ជាក់ដែរថា និស្សិតទាំងបួនរូបត្រូវបានជ្រើសរើសដោយសាកលវិទ្យាល័យហ្សាម៉ាន់ ឱ្យទៅប្រកួត។ និស្សិតទាំងបួនរូបយល់ថាខ្លួនត្រូវបានជ្រើសរើសដោយសារតែតែមានលំដាប់ពិន្ទុខ្ពស់ និងធ្លាប់ធ្វើការងារជាក្រុមជាមួយគ្នាពីមុនមក។ ចំណែកឯថ្លៃហូបចុក និងស្នាក់នៅវិញ ជាបន្ទុករបស់សាលាពាណិជ្ជកម្មអន្តរជាតិ Solbridge ដោយសារតែសាលាពាណិជ្ជកម្មមួយនេះ ជាដៃគូសហការរបស់សាកលវិទ្យាល័យហ្សាម៉ាន់។

អត្ថបទ៖ ថា ម៉ាលីដា

ពាក្យទាក់ទង