មិនហៅថាអស្ចារ្យទើបចម្លែក! ទូក ង «កម្ពោជិកបុត្តាខេមរាតរី» បង្កប់ក្បាច់ច្រើនស្មានមិនដល់

2018-11-12 07:47:50
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅព្រឹកថ្ងៃទី១២ខែ វិច្ឆិកា ឆ្នាំ២០១៨នេះ ទូក ង វែងបំផុតរបស់កម្ពុជាបានបំបែកកំណត់ត្រាជាទូក ដែលវែងជាងគេបំផុតនៅលើលោក មានប្រវែងសរុបរហូតដល់ ៨៧,៣០ម៉ែត្រ ដែលប្រវែងនេះ វែងជាងកំណត់ត្រារបស់ប្រទេសចិន Guinness world record ធ្លាប់បានកត់ត្រាចូលមានប្រវែង ៧៧,៨០ម៉ែត្រ។

អ្វីដែលអស្ចារ្យគួរឲ្យចាប់អារម្មណ៍បំផុតទូកងដ៏វែងនេះ បានបង្កប់នូវក្បាច់ជាច្រើននៅលើទូកតែមួយតាំងពីក្បាលទូក រហូតដល់កន្ទុយទូក។ ក្បាច់ដែលដកស្រង់យកមកប្រើប្រាស់ នៅលើទូកងវែងបំផុតទី១លើលោកនេះ បានដកស្រង់យកក្បាច់ភ្ញីទេស មកបំពាក់ក្បូរក្បាច់លម្អ ដែលបូកបញ្ចូលជាមួយទម្រង់ផ្សេងៗទៀតដូចជា៖

ក្បាច់ភ្ញីទេស នៅក្នុងទម្រង់ក្បាលនាគ
ផ្កាច់ភ្ញីទេស នៅក្នុងទម្រង់កន្ទុយហង្ស
ក្បាច់ភ្ញីទេស នៅក្នុងទម្រង់ផ្កាចន្ទន៍
ក្បាច់ភ្ញីវ័ល្លិ៍
ក្បាច់ស្លឹកទេសនៅក្នុងទម្រង់ហៀន
ក្បាច់ពងត្រី។ល។

នៅក្នុងពិធីបំបែកកំណត់ត្រាទូកងវែងជាងគេ លើលោកនេះបានប្រារព្ធឡើង នៅកំពង់ដ អ្នក លឿង ខេត្តព្រៃវែង។ការវាស់វែង និងវាយតម្លៃត្រូវបានធ្វើដោយលោក Pantel P. Jasmatbhai តំណាងមកពី Guinness world record។ ពិធីប្រកាសនេះ បានរៀបចំយ៉ាងអធឹកអធមបំផុត ដោយមានក្បួនដង្ហែយ៉ាងគគ្រឹកគគ្រេងលើផ្ទៃជលសា ក្រោមក្រសែភ្នែករបស់គណៈអធិបតី ជាច្រើនរូបដែលសុទ្ធជាថ្នាក់ដឹកនាំសំខាន់ៗ នៃព្រះរាជាណាចក្រកម្ពុជា។ ទូកដ៏អស្ចារ្យក្រៃលែងនេះ មានប្រវែងបណ្ដោយសរុប ៨៧,៣០ម៉ែត្រ ទទឹង ១,៩៤ម៉ែត្រ ជម្រៅទូក ០,៨០ម៉ែត្រ និងអាចផ្ទុកចំណុះទូករហូតដល់ ១៧៩នាក់។

គួរជម្រាបថា ទូកងវែងជាងគេនេះ នឹងត្រូវយកមកដាក់បង្ហាញឲ្យមហាជន បានទស្សនានៅក្នុងព្រះរាជពិធីបុណ្យអុំទូក ដែលនឹងប្រព្រឹត្តទៅនៅថ្ងៃទី២១-២៣ ខែវិច្ឆិកា ឆ្នាំ២០១៨ បន្ទាប់មកនឹងយកទៅដាក់តាំង នៅមុខវាលព្រះមេនរុ រយៈពេលយ៉ាងយូរ១០ថ្ងៃ ទើបយកត្រឡប់ទៅខេត្តព្រៃវែងវិញ៕

អត្ថបទ៖ ថោ ចាន់រិទ្ធិ