គួច ដានី៖ នាំមុខ ១-០ ខ្ញុំគិតថាយើងនឹងឈ្នះទៅហើយ ប៉ុន្តែចូលតង់ទី២...
- 2018-11-13 02:10:07
- ចំនួនមតិ 0 | ចំនួនចែករំលែក 0
គួច ដានី៖ នាំមុខ ១-០ ខ្ញុំគិតថាយើងនឹងឈ្នះទៅហើយ ប៉ុន្តែចូលតង់ទី២...
ចន្លោះមិនឃើញ
ក្រុមបាល់ទាត់ជម្រើសជាតិកម្ពុជា បានបរាជ័យក្រោមថ្វីជើងរបស់ម្ចាស់ផ្ទះមីយ៉ាន់ម៉ា ក្នុងលទ្ធផល ៤-១ ក្នុងពានរង្វាន់ AFF Suzuki Cup 2018 ។
ការប្រកួតនេះដែរ នៅតង់ទី១កម្ពុជា ពិតជាធ្វើបានល្អមែនទែន ដោយរកគ្រាប់បាល់នាំមុខម្ចាស់ផ្ទះមីយ៉ាន់ម៉ា បាន១គ្រាប់មុន ពីសំណាក់ខ្សែប្រយុទ្ធ ចាន់ វឌ្ឍនាកា ។ យ៉ាងណាមិញ ការប្រកួតចូលដល់តង់ទី២វិញ កម្ពុជាហាក់ប្លែកពីតង់ទី១ ស្របពេលម្ចាស់ផ្ទះវិញ សម្រុកយកតែមែនទែន រហូតស្វែងរកគ្រាប់បាល់តាមស្មើបាន និងថែមដល់៣គ្រាប់ទៀត យកឈ្នះក្នុងលទ្ធផល ៤-១ វិញ។
លទ្ធផលនេះដែរ គួច ដានី ខ្សែបម្រើកម្ពុជាយល់ឃើញថា៖ “យើងមានឱកាសច្រើនដែរ ប៉ុន្តែយើងធ្វើមិនបានសម្រេច។ តែខាងមីយ៉ាន់ម៉ា វិញពួកគេចាប់យកឱកាសបានល្អ និងច្បាស់ជាងយើង។ ច្បាស់ណាស់ ក្រោយពីយើងរកបាន១គ្រាប់នៅតង់ទី១ ខ្ញុំគិតថាយើងនឹងឈ្នះការប្រកួតនេះទៅហើយ ប៉ុន្តែក្រោយមានបាល់ប៉េណាល់ទី យើងបានបាត់បង់ការប្រមូលអារម្មណ៍ ធ្វើឱ្យមីយ៉ាន់ម៉ា រកគ្រាប់បាល់បានជាបន្ដបន្ទាប់។ យើងសង្ឃឹមថា២ប្រកួតទៀត យើងនឹងធ្វើបានល្អ ជាពិសេសប៉ះជាមួយឡាវ ដែលលេងនៅទឹកដីរបស់យើង”។
ឆ្លងកាត់២ប្រកួតនៅ Suzuki Cup 2018 កម្ពុជាមិនទាន់រកបានពិន្ទុទេ ដោយចាញ់ទាំងពីរ២ប្រកួតតែម្ដង។ ប្រកួតទី១ កម្ពុជាចាញ់ក្រុមម៉ាឡេស៊ី ក្នុងលទ្ធផល ០-១ និងប្រកួតទី២ កម្ពុជាចាញ់ក្រុមមីយ៉ាន់ម៉ា ៤-១។ ២ប្រកួតទៀតដែលនៅសល់ កម្ពុជានឹងត្រូវតតាំងជាមួយក្រុមឡាវ នៅទឹកដីកម្ពុជា និងប៉ះវៀតណាមនៅទឹកដីវៀតណាម៕