ងាកចេញពីព័ត៌មានផ្សេងៗរបស់ Aff Taksaorn និងមកដឹងប្រវត្តិនាងវិញ តើយ៉ាងណាខ្លះ?

2018-11-13 06:00:08
ចំនួនមតិ 0 | ចំនួនចែករំលែក 0

ចន្លោះមិនឃើញ

មួយរយៈចុងក្រោយ ព័ត៌មានទាក់ទងនឹងទំនាក់ទំនងស្នេហារវាងតារាស្រី Matt Peranee និងបុរសពោះម៉ាយ Songkarn Taechanarong បង្កឲ្យមជ្ឈដ្ឋានជាច្រើនមានការភ្ញាក់ផ្អើលជាខ្លាំង។

បើទោះបីជារឿងរបស់បុគ្គលទាំង ២នេះមែន ប៉ុន្តែមហាជននាំគ្នាអាណិតអាសូរដល់តារាសម្ដែង Aff Taksaorn ដែលជាអតីតភរិយារបស់ Songkarn។ មូលហេតុក៏ដោយសារ មនុស្សជាច្រើនសង្ស័យថា ការសម្រេចលែងលះរបស់ Aff និងអតីតស្វាមី ក៏ជាប់ពាក់ព័ន្ធនឹង Matt ដែរ។ នាងជានារីស្លូតបូត និងតែងផ្ដល់ក្ដីស្រឡាញ់ឲ្យមនុស្សជុំវិញខ្លួន ប៉ុន្តែខ្លួនឯងបែរជាជួបស្នេហាមិនសមប្រកបពីជីវិតគ្រួសារទៅវិញ។

ដោយសារព័ត៌មានចេញផ្សាយពីនាងកាន់តែច្រើន ជាហេតុធ្វើឲ្យអ្នកគាំទ្រចង់ដឹងកាន់តែច្បាស់ពីប្រវត្តិខ្លះៗរបស់តារាស្រីរូបនេះ។ ដូចនេះ Sabay ក៏បានរៀបរៀង និងដកស្រង់ចំណុចសំខាន់ផ្សេងៗដែលអ្នកគួរដឹងដូចតទៅ។

Aff មានឈ្មោះពេញ Taksaorn Paksukcharern កើតនៅថ្ងៃទី ២៧ ខែតុលា ឆ្នាំ ១៩៨០។ នាងបានបញ្ចប់ការសិក្សាថ្នាក់បរិញ្ញាប័ត្រផ្នែកទំនាក់ទំនង ពីសាកលវិទ្យាល័យ Chulalongkorn។

Aff ចូលសិល្បៈតាំងពីឆ្នាំ ២០០១ ហើយបច្ចុប្បន្ន ក្រៅពីជាតារាម៉ូដែល នាងក៏ជាតារាសម្ដែងដែលតែងលេចមុខក្នុងរឿងជាហូរហែតាំងពីឆ្នាំ ២០០៣។ នាងបានឈ្នះពានជាច្រើន ក្នុងនោះមានតាំងពី ពានជាតារាសម្ដែងស្រីឆ្នើម តារាជាទីពេញចិត្តរបស់មហាជន និងពានជាច្រើនទៀត។

និយាយពីជីវិតស្នេហាវិញ ក្នុងឆ្នាំ ២០១២ តារាស្រីកម្ពស់ ១៦២សង់ទីម៉ែត្រនេះ បានរៀបការជាមួយមន្ត្រីប៉ូលីសម្នាក់ឈ្មោះ Songkarn Taechanarong។ ចំណងអាពាហ៍ពិពាហ៍អ្នកទាំង ២ គឺកូនស្រីគួរឲ្យស្រឡាញ់មានឈ្មោះ Peemai កើតនៅថ្ងៃទី ០១ ខែមករា ឆ្នាំ២០១៥។ ប៉ុន្តែដោយសារអស់និស្ស័យនឹងគ្នា ជីវិតគ្រួសាររបស់ Aff និងស្វាមីក៏ត្រូវដល់ទីបញ្ចប់។ ពួកគេបានលែងលះគ្នានៅថ្ងៃទី ២៥ ខែកញ្ញា ឆ្នាំ ២០១៨។ សម្រាប់កូនស្រីវិញ អ្នកទាំង ២ចែកគ្នាមើលថែរក្សាបីបាច់ ក្នុងនាមជាម្ដាយឪពុកដដែល៕