ស្ថាប័នអន្តរជាតិ៥ ផ្តល់ថវិកាជិត៣០លានដុល្លារ សម្រាប់វិស័យអប់រំនៅកម្ពុជា
- 2018-11-14 07:19:59
- ចំនួនមតិ 0 | ចំនួនចែករំលែក 0
ស្ថាប័នអន្តរជាតិ៥ ផ្តល់ថវិកាជិត៣០លានដុល្លារ សម្រាប់វិស័យអប់រំនៅកម្ពុជា
ចន្លោះមិនឃើញ
មូលនិធិភាពជាដៃគូសម្រាប់អភិវឌ្ឍន៍សមត្ថភាពវិស័យអប់រំហៅកាត់ថា CDPF គ្រោងចំណាយថវិកាជិត៣០លានដុល្លារសម្រាប់អនុវត្តគម្រោងដំណាក់កាលទីបីរយៈពេលបួនឆ្នាំបន្តទៀត ដើម្បីអភិវឌ្ឍន៍សមត្ថភាព និងផែនការយុទ្ធសាស្រ្តវិស័យអប់រំនៅកម្ពុជា។
សេចក្តីប្រកាសព័ត៌មានរួមមួយចេញផ្សាយនៅថ្ងៃនេះសរសេរថា CDPF គឺជាភាពជាដៃគូរវាងសហភាពអឺរ៉ុប ទីភ្នាក់ងារសហប្រតិបត្តិការអភិវឌ្ឍន៍អន្តរជាតិស៊ុយអែត(SIDA) USAID Unicef និងភាពជាដៃគូសកលសម្រាប់ការអប់រំ (GPE)។
ប្រភពដដែលបន្តថាសម្រាប់រយៈពេលបួនឆ្នាំពីឆ្នាំ២០១៨ ដល់ឆ្នាំ២០២១នេះ ស្ថាប័នអន្តរជាតិទាំងនេះនឹងផ្តល់ថវិកាចំនួន២៧លានដុល្លារសម្រាប់អនុវត្តគម្រោងក្នុងដំណាក់កាលទីបីបន្តទៀត។
ប្រភពដដែលឥ្យដឹងទៀតថាក្នុងដំណាក់កាលទីបីនេះមូនិធិ អភិវឌ្ឍលើការពង្រឹងសមត្ថភាពក្រសួងអប់រំក្នុងការរៀបចំផែនការ ពិនិត្យតាមដាន គ្រប់គ្រងហិរញ្ញវត្ថុសាធារណៈ និងគ្រប់គ្រប់គ្រងកំណែទម្រង់វិស័យអប់រំឲ្យកាន់តែប្រសើរ។
ក្រៅពីនេះក៏មានការបង្កើនសមត្ថភាពមន្ត្រីនៅថ្នាក់ខេត្ត និងស្រុកក្នុងការរៀបចំផែនការគ្រប់គ្រង និងធានាការអនុវត្តគោលនយោបាយប្រកបដោយប្រសិទ្ធភាព និងផ្តល់សេវាអប់រំកាន់តែប្រសើរ។
សម្រាប់ចំណុចចុងក្រោយគម្រោងនេះនឹងពង្រឹងសមត្ថភាព និងគណនេយ្យភាពនៅកម្រិតសាលា ដូចជាសមត្ថភាពគ្រូបង្រៀន នាយកសាលា ក្នុងការរៀបចំផែនការ បែងចែកថវិកា និងការគ្រប់គ្រង ដើម្បីបង្កើនការចូលរួម និងលើកកម្ពស់ការសិក្សា។ នេះបើតាមសេចក្តីប្រកាសព័ត៌មានដដែល។
ឯកអគ្គរដ្ឋទូតសហភាពអឺរ៉ុបប្រចាំកម្ពុជាលោក George Edgar ត្រូវបានដកស្រង់សម្តីនៅក្នុងសេចក្តីប្រកាសព័ត៌មានថា CDPFផ្តល់លទ្ធភាពឲ្យមានការរៀបចំយុទ្ធសាស្រ្ត និងការសម្របសម្រួលល្អ ស៊ីសង្វាក់គ្នា ដើម្បីផ្តោតលើការអភិវឌ្ឍសមត្ថភាពដល់មន្ត្រីគ្រប់ជាន់ថ្នាក់របស់ក្រសួងអប់រំ រាប់បញ្ចូលទាំងសាលារៀនផង។
សម្រាប់លោកស្រី Natascha Paddison ប្រធានស្តីទីរបស់Unicef ប្រចាំកម្ពុជាលើកឡើងក្នុងសេចក្តីប្រកាសព័ត៌មានដែរថា៖ «កម្មវីធី CDPFមានសារៈសំខាន់ព្រោះវាបានជំរុញឲ្យមានការចូលរួមគ្រប់តួអង្គពាក់ព័ន្ធទាំងអស់នៃសង្គមកម្ពុជាក្នុងកំណែទម្រង់អប់រំចាប់ពីមន្ត្រីរដ្ឋាភិបាលរហូតដល់នាយកសាលា គ្រូបង្រៀន និងមាតាបិតាសិស្ស...យើងសង្ឃឹមថាកម្មវិធីនេះនឹងផ្តល់ផ្តល់ភាពអង់អាចដល់ប្រជាពលរដ្ឋកម្ពុជាវិនិយោគលើវិស័យអប់រំ សម្រាប់កូនៗអាចទទួលបានក្នុងរយៈពេលវែង»។
គួរបញ្ជាក់ថាគម្រោងនេះចាប់ផ្តើមដំបូងនៅឆ្នាំ២០១១ដែលមានពីរដំណាក់កាលចន្លោះពីឆ្នាំ២០១១ ដល់ឆ្នាំ២០១៧ និងបានចំណាយថវិកាអស់ប្រមាណជា៣០លានដុល្លារ៕