ផ្អើល ចន ច័ន្ទលក្ខិណា រៀបចំពិធីសម្ពោធរឿងដូចទទួលគណៈរដ្ឋមន្ត្រីយប់មិញ

2018-11-15 04:50:08
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្ពោធរឿង"បន្តោងឆ្នាំងដី" របស់ខ្លួនលើកដំបូងអ្នកនាង ចន ច័ន្ទលក្ខិណា ប្រធានសមាគមសិល្បករខ្មែរបានរៀបចំពិធីយ៉ាងឱឡារិកមិនខុសពីទទួលគណៈរដ្ឋមន្ត្រីឡើយ។ ដោយមានការរៀបចំក្រុមតន្ត្រីឈរអមសង្ខាងផ្លូវនៃកម្រាលព្រំក្រហមក្នុងសម្លៀកបំពាក់ឯកសណ្ឋានមានផ្លុំត្រែ និងវាយស្គរកាលពីយប់មិញនៅរោងភាពយន្ត Legend បឹងកក់។

ថ្លែងក្នុងពិធីសម្ពោធរឿងអ្នកនាង ចន ច័ន្ទលក្ខិណា ឲ្យដឹងថា មូលហេតុរៀបចំពិធីធំដុំដូច្នេះដោយសារតែនេះគឺជារឿងដំបូងក្នុងផលិតកម្មរបស់នាងគឺក្នុងគោលបំណងទទួលភ្ញៀវកិត្តិយស និងតារាសម្ដែងប្រុសស្រីច្រើនមួយចំនួនបានខិតតស៊ូថតរឿង "បន្តោងឆ្នាំងដី" តាំងពីដើមរហូតដល់ចប់ដើម្បីលើកស្ទួយឲ្យវិស័យភាពយន្តខ្មែរឲ្យមានទីផ្សារឡើងវិញ។

សម្រាប់រឿង"បន្តោងឆ្នាំងដី" នេះដែរទោះបីជាចំណេញ ឬខាតប្រធានសមាគមសិល្បករខ្មែររូបនេះមិនគិតឡើយ។ តែនាង បែរជាចាត់ទុកថានេះគឺជាបទពិសោធន៍ថ្មីមួយទៀតដើម្បីឈានទៅផលិតរឿងបន្តបន្ទាប់ទៀត។ ណាមួយខ្លួនក៏សប្បាយចិត្តនៅពេលឃើញសិល្បករ និងសិល្បការិនីខ្មែរមានការងារធ្វើតាមរយៈការថតរឿង។

រឿង"បន្តោងឆ្នាំងដី" ជាភាពយន្តបែបអប្បិយជំនឿបង្កប់ទៅដោយអត្ថន័យអប់រំលាយឡំជាមួយឈុតឆាកកំប្លែងជាច្រើន។ ចូលរួមសម្ដែងដោយ នាយ កុយ ពែកមី ហេង ចន្ថា វីជេអាឡាស្កូ ងួន សុបិន បែន ចំរ៉ុង កីឡាករបាល់ទាត់ កីឡាករប្រដាល់ ព្រមទាំងតារាសម្ដែងស្រីប្រុសល្បីឈ្មោះជាច្រើនរូបទៀត។ ដោយត្រៀមនឹងដាក់បញ្ចាំងគ្រប់រោងភាពយន្តទំនើបៗក្នុងរាជធានីភ្នំពេញ និងតាមបណ្ដាខេត្តមួយចំនួន ចាប់ពីថ្ងៃទី ១៥ ខែវិច្ឆិកា ២០១៨ នេះហើយ៕

អត្ថបទ៖ ឆុង ស៊ីណាន