ម្ដងនេះ ស៊ឹម សុវណ្ណារ៉ុង ព្រលយរឿង ចូលធ្វើជាតារាចម្រៀងផលិតកម្ម

2018-11-15 03:31:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ស៊ឹម សុវណ្ណារ៉ុង ដែលល្បីឈ្មោះតាមរយៈការធ្វើបទចម្រៀងខ្លួនឯងច្រៀងខ្លួននោះ នៅពេលនេះបានដាច់ចិត្តព្រលយរឿងចូលធ្វើជាតារាចម្រៀងក្នុងផលិតកម្ម ថាលោកចង់ក្លាយជាតារាចម្រៀងផលិតកម្មណាមួយនាពេលខាងមុខ។

“បាទ...បង ខ្ញុំនឹងយល់ព្រម បើមានការព្រមព្រៀងគ្នាច្បាស់លាស់..."។ ស៊ឹម សុវណ្ណារ៉ុង ថ្លែងបែបនេះ ក្រោយពីបានចំណាយពេលធ្វើជាតារាចម្រៀងក្រៅផលិតកម្មអស់រយៈ ពេលប្រមាណជាង ១ឆ្នាំ ពោលគឺជាងតារាចម្រៀងឯករាជ្យ។ យ៉ាងណា ក៏ធ្វើបែបនេះ គឺមានការចំណាយច្រើន លើការផលិតបទចម្រៀងមួយៗ។ ដូច្នេះហើយ សុវណ្ណារ៉ុង បញ្ជាក់ថា ចង់មានផលិតកម្មរឹងមាំមួយធ្វើជាទ្រនំ។

និយាយដល់ចំណុចនេះ តារាចម្រៀងមកពីខេត្តបាត់ដំបង បញ្ជាក់ថា កាលពីអតីតធ្លាប់មានផលិតកម្មក្នុងស្រុកមួយ បានទាក់ទងដែរ ប៉ុន្តែពេលនោះ លោកនៅជាតារាចម្រៀងកុងត្រាជាមួយផលិតកម្ម "ឥន្ទ្រីមាស" ទើបលោកមិនអាចរំលោភកិច្ចសន្យាជាមួយផលិតកម្មបាន។ យ៉ាងណា បច្ចុប្បន្ន តារាចម្រៀងរូបនេះ បានចាកចេញពីផលិតកម្មខាងលើហើយ ក្រោយពីរួមរស់ជាមួយគ្នាមួយរយៈធំ។

“បាទ...ឥឡូវខ្ញុំបានចេញពីផលិតកម្មហើយ មកធ្វើជាតារាចម្រៀងឯករាជ្យ តែអត់មានបញ្ហាអីទេ គឺខ្ញុំផុតកុងត្រា អីចឹងក៏សម្រេចចេញទៅ ហើយរាល់ថ្ងៃកំពុងប្រឹងធ្វើបទចម្រៀងខ្លួនឯងបង...!”។ ដោយសារតែបែបនេះ ទើបលោកព្រលយថា លោកស្វាគមន៍ សម្រាប់ចាប់អារម្មណ៍ពីផលិតកម្មក្នុងស្រុកនានា ពោលប្រសិនបើអាចព្រមព្រៀងគ្នាលើការចរចាការងារ ដែលអាចទទួលយកបានទាំងសងខាង លោករីករាយនឹងក្លាយជាតារាចម្រៀងក្នុងផលិតកម្មណាមួយវិញ។

ស៊ឹម សុវណ្ណារ៉ុង ត្រូវបានគេស្គាល់ខ្លាំង ក្រោយពីចេញបទ Original Song ផ្ទាល់ខ្លួននៅឆ្នាំ ២០១៧ មានចំណងជើងថា "កុំទ្រាំស្នេហ៍អ្នកក្រដូចបង" ដែលនិពន្ធដោយលោកផ្ទាល់ និងធ្វើបទភ្លេងថ្មីដោយ ឌីជេ ខាណា ជាពលករនៅថៃដូចគ្នា សម្រួលតន្ត្រីដោយលោក អ៊ិច សំណាង ។

មកដល់សព្វថ្ងៃ សុវណ្ណារ៉ុង បានក្លាយជាតារាចម្រៀងក្នុងចិត្តយុវវ័យមួយរូប ក្នុងនោះលោកបានបញ្ចេញបទចម្រៀងថ្មីជាច្រើនរួចមកហើយ មានដូចជាបទ "អូនលេងសើច តែបងឈឺចាប់" "ប្រពន្ធក្មេង" និងបទ "ស្ទាវក្រដូចបង" "បងគ្មានម៉ូតូថ្មី ស្រីបែកចិត្ត" ជាដើម៕

អត្ថបទ៖ ទារិកា