រំជួលចិត្ត! មុន្នីរ័ត្ន ប្រាប់ដំណើររឿងពិត រហូតសំបុត្រ និងកាដូ ធ្លាក់ដល់ដៃរដ្ឋមន្ត្រីវ័យក្មេងម៉ាឡេស៊ី

2018-11-15 07:58:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រាក់ មុន្នីរ័ត្ន គឺជានារីខ្មែរដំបូង ដែលបានផ្ញើសំបុត្រមួយច្បាប់ ព្រមជាមួយកាដូជាកូនតុក្កតាគួរឲ្យស្រលាញ់មួយ ផ្ញើទៅកាន់រដ្ឋមន្ត្រីវ័យក្មេងរូបសង្ហាម៉ាឡេស៊ី ដោយជោគជ័យ។

មុន្នីរ័ត្ន ដែលជាអ្នកតាមដានគ្រប់សកម្មភាពរបស់រដ្ឋមន្ត្រី ក្រសួងយុវជន និងកីឡា ទើបតែឡើងកាន់តំណែងថ្មីៗនេះ បានរៀបរាប់ទាំងអារម្មណ៍រំភើបមកកាន់ Sabay ថា ក្រោយពេលលោក Syed Saddiq Abdul Rahman បានឆ្លើយតបយ៉ាងក្បោះក្បាយមកកាន់នាង គឺធ្វើឲ្យនាងរំភើបខ្លាំង ដែលពិបាកនិយាយឲ្យត្រូវថានាងរំភើបកម្រិតណានោះទេ។ មុន្នីរ័ត្នបន្តថា នាងសម្រេចចិត្តផ្ញើសំបុត្រ និងកាដូនេះទៅទាំងមិនបានរំពឹងទុកថា លោកនឹងឆ្លើយតបឡើយ ព្រោះដឹងស្រាប់ហើយថា លោកមានតួនាទីជាអ្វី ហើយភារកិច្ចលោករវល់ប៉ុណ្ណានោះ។

សំបុត្រមួយច្បាប់ មុន្នីរ័ត្ន បានផ្ញើទៅលោក

តែអ្វីដែលនាងមិនរំពឹងទុក គឺស្រាប់តែក្លាយជាការពិត ដោយរដ្ឋមន្ត្រីរូបសង្ហារូបនេះ ឆ្លើយតបយ៉ាងពីរោះពិសា គួរឲ្យគោរពបំផុត។ ត្រង់នេះ គឺកាន់តែធ្វើឲ្យ មុនីរ័ត្ន ស្រលាញ់លោកកាន់តែខ្លាំងឡើង ត្រង់ថាលោកមិនប្រកាន់ខ្លួនថាជារដ្ឋមន្ត្រី តួនាទីខ្ពស់ អ្វីនោះទេ ដោយបានទទួលកាដូនាង ថែមទាំងអានខ្លឹមសារ នៃសំបុត្ររបស់នាងទៀតផង ទាំងនាងជាមនុស្សសាមញ្ញ ចំណែកលោកមានឋានៈខ្ពង់ខ្ពស់ ក្នុងជួររដ្ឋាភិបាលម៉ាឡេស៊ី។

លោក កំពុងកាន់តុក្កតា របស់នាង និងសំបុត្រក្នុងដៃ

ចំណែកឯមូលហេតុនាំឲ្យសម្រេចចារអក្ខរា នេះទៅកាន់លោក Syed Saddiq Abdul Rahman ព្រោះនាងពេញចិត្តខ្លាំងបំផុត នូវអ្វីដែលលោកមាន ក្នុងនាមជាយុវជនម្នាក់ ដែលមានវ័យ២០ជាងសោះ បានខិតខំតស៊ូរហូតបានជោគជ័យ ខណៈដែលយុវជនខ្លះក្នុងវ័យស្របាលលោក កំពុងតែរីករាយ សប្បាយនឹងជីវិតជាយុវវ័យនៅឡើយ។ យុវតីរូបនេះបន្តថា ម្យ៉ាងវិញទៀតលោកបានបំពេញតួនាទីជារដ្ឋមន្ត្រីនេះបានយ៉ាងល្អ ដូចអ្វីដែលលោកបានឃោសនាពេលបោះឆ្នោត គឺលោកពិតជាធ្វើបានដូចអ្វីដែលបាននិយាយមែន។ លោកបានធ្វើជាគំរូដ៏ល្អដល់យុវជន តែងតែមានសារជំរុញ លើកទឹកចិត្ត ដល់យុវជនដទៃទៀត។ ជាក់ស្ដែងដូចជារូបនាង មានកម្លាំងចិត្ត និងទឹកចិត្តក៏ដោយសារ មានរដ្ឋមន្ត្រីវ័យក្មេងនេះជាគំរូ។

យុវតី មុន្នីរ័ត្ន

តើហេតុអ្វីទើបសំបុត្រ មុន្នីរ័្នត អាចធ្លាក់ដល់ដៃរដ្ឋមន្ត្រីរូបនេះបាន? បុគ្គលិកក្រុមហ៊ុនឯកជនរូបនេះ ប្រាប់ថា កាលពីថ្ងៃទី១៦ ខែតុលា ឆ្នាំ២០១៨ នាងបានធ្វើដំណើរកម្សាន្តទៅកាន់ប្រទេសម៉ាឡេស៊ី និងបានស្នាក់នៅសណ្ឋាគារមួយ។ អាចថាជារឿងចៃដន្យដែរ នៅសណ្ឋាគារនោះ មានសេវាផ្ញើរបស់ទៅកាន់រដ្ឋមន្ត្រី ក្រោយមកនាងបានសម្រេចចិត្តដកស្លាបប៉ាកកា ចារអក្ខរាមួយ ផ្ញើទៅលោក Syed Saddiq Abdul Rahman ព្រមជាមួយកាដូមួយដែលនាងបានទិញពីផ្សារទូលទំពូង ជាតុក្កតា Hero កែច្នៃ ចេញពីរបស់ចាស់ៗទុកលក់ឲ្យភ្ញៀវទេសចរ តម្លៃជាង២០ដុល្លារ។

ក្រោយផ្ញើទៅនាង មិនដែលនឹកស្រមៃថា លោករដ្ឋមន្ត្រីដ៏សែនសង្ហាមិនចាញ់តារាខាងលើ បើកមើលឡើយ រហូតដល់ថ្ងៃទី ១៥ ខែវិច្ឆិកា ឆ្នាំ២០១៨នេះ លោកបានបើកមើល និងឆ្លើយតបមកនាងវិញ។ គិតចាប់ពីថ្ងៃផ្ញើ និងថ្ងៃដែលលោកឆ្លើយមានរយៈពេលជិត១ខែ។

សូមបញ្ជាក់ថា កាលពីថ្ងៃចន្ទ ទី២ ខែកក្កដា ឆ្នាំ២០១៨ លោក Syed Saddiq Abdul Rahman បានស្បថចូលកាន់តំណែងជារដ្ឋមន្ត្រីក្រសួងយុវជន និងកីឡាថ្មីរបស់ម៉ាឡេស៊ី។ បុរសវ័យ ២៥ឆ្នាំរូបនេះ បានក្លាយជារដ្ឋមន្ត្រីក្មេងជាងគេបំផុតក្នុងប្រទេស ម៉ាឡេស៊ី ដែលបានស្បថចូលកាន់តំណែងជាមួយ អនុរដ្ឋមន្ត្រី ២៣រូបទៀតនៅចំពោះព្រះភ័ក្ត្រព្រះមហាក្សត្រ Sultan Muhammad V ៕

ចុចអានអត្ថបទពាក់ព័ន្ធ៖

អត្ថបទ៖ វឌ្ឍនៈ