ក្រសួងចេញមុខពន្យល់ច្បាស់ៗពីនីតិវិធី លើស្ថានីយឬដេប៉ូលក់សាំងមិនគ្រប់លីត្រ
- 2018-11-16 02:00:04
- ចំនួនមតិ 0 | ចំនួនចែករំលែក 0
ក្រសួងចេញមុខពន្យល់ច្បាស់ៗពីនីតិវិធី លើស្ថានីយឬដេប៉ូលក់សាំងមិនគ្រប់លីត្រ
ចន្លោះមិនឃើញ
ក្រសួងកពាណិជ្ជកម្មឲ្យដឹងថាមន្ត្រីជំនាញប្រេងឥន្ធនៈនៃអគ្គនាយកដ្ឋានកាំកុងត្រូលបានអនុវត្តនូវវិធានការចំនួនពីរទៅលើស្ថានីយ ឬដេប៉ូលក់ប្រងឥន្ធនៈដើម្បីផ្តល់យុត្តិធម៌ដល់អ្នកទិញ និងអ្នកលក់។
កន្លងមកធ្លាប់មានជាចម្ងល់ពីមហាជនមួយចំនួនទាក់ទងនឹងវិធានការទៅលើស្ថានីយ ឬដេប៉ូប្រេងឥន្ធនៈដែលលក់មិនគ្រប់លីត្រ ឬមិនមានគុណភាពត្រឹមត្រូវ ថាតើគួរមានវិធានការផ្លូវតុលាការឬយ៉ាងណា។
កាលពីល្ងាចពីម្សិលមិញក្រសួងពាណិជ្ជកម្មបានចេញសេចក្តីប្រកាសព័ត៌មានមួយ ដោយបានសរសេរថាចំពោះវិធានការទីមួយសម្រាប់ស្ថានីយឬដេប៉ូលក់ប្រេសឥន្ធនៈដែលរកឃើញលើកដំបូងថាលក់មិនគ្រប់លីត្រ ឬគុណភាពសារធាតុអុកតានលម្អៀងមិនត្រឹមត្រូវតាមស្តង់ដារ នោះម្ចាស់ស្ថានីយ ឬដេប៉ូ នឹងតម្រូវឲ្យធ្វើកិច្ចសន្យាកែតម្រូវភាពមិនប្រក្រតីឡើងវិញ។ ក្រៅពីនេះក៏មានផ្សព្វផ្សាយឈ្មោះស្ថានីយ ឬដេប៉ូទាំងនោះនៅតាមបណ្តាញសារព័ត៌មានផងដែរ។
ប្រភពដដែលបន្តថាសម្រាប់ស្ថានីយ ឬដេប៉ូដដែលមានភាពមិនប្រក្រតីជាលើកទីពីរ អគ្គនាយកដ្ឋានកាំកុងត្រូលនឹងស្នើទៅកាន់ក្រសួងពាណិជ្ជកម្មព្យួរអាជ្ញាបណ្ណអាជីវកម្មបណ្ដោះអាសន្ន និងកសាងសំណុំរឿងបញ្ជូនទៅកាន់តុលាការដើម្បីចាត់ការតាមនីតិវិធីច្បាប់។ បើតាមក្រសួងពាណិជ្ជកម្មការចុះត្រួតពិនិត្យនេះធ្វើឡើងដោយមិនឲ្យម្ចាស់ស្ថានីយឬដេប៉ូដឹងមុនឡើយ។
ក្រសួងពាណិជ្ជកម្មសរសេរបន្តថា៖ «ក្នុងតួនាទីរបស់អគ្គនាយកដ្ឋានកាំកុងត្រូល...បានបំពេញភារកិច្ចក្នុងកិច្ចការពារអ្នកប្រើប្រាស់ ដោយតម្កល់ផលប្រយោជន៍ជាតិ និងផលប្រយោជន៍ប្រជាពលរដ្ឋជាធំ ជាពិសេសពាក់ព័ន្ធនឹងសុវត្ថិភាពចំណីអាហារ និងការក្លែងបន្លំទំនិញគ្រប់រូបភាព»។
បើតាមសេចក្តីប្រកាសព័ត៌មាន ថ្មីៗនេះមន្ត្រីជំនាញបានធ្វើការជាមួយព្រះរាជអាជ្ញា ដើម្បីងាយស្រួលចាត់វិធានការផ្លូវច្បាប់ភ្លាមៗនៅពេលរកឃើញភាពមិនប្រក្រតីណាមួយ។ ទន្ទឹមនឹងនេះក្រសួងក៏បានប្រើប្រាក់ការពិសោធន៍ ដោយថាដើម្បីឲ្យបានភស្តុតាង លទ្ធផលច្បាស់លាស់ និងមានសុក្រិតភាព សម្រាប់ផ្តល់យុត្តិធម៌ដល់ទាំងអ្នកទិញ និងអ្នកលក់៕