៤ ចំណុចសំខាន់ដែលធ្វើឲ្យបាល់ទះខ្មែរមិនទាន់ឈានទៅរកភាពជោគជ័យ

2018-11-16 04:31:59
ចំនួនមតិ 0 | ចំនួនចែករំលែក 0

ចន្លោះមិនឃើញ

វិស័យបាល់ទះជាកីឡាពេញនិយមបំផុតនៅកម្ពុជា ដែលត្រូវបានគេមើលឃើញថា ប្រជាជនជាច្រើនចូលចិត្តកីឡានេះ នៅតាមភូមិឃុំនានាក្នុងពេលបច្ចុប្បន្ន។ ប៉ុន្តែបើងាកទៅមើលការប្រកួតលើឆាកអន្តរជាតិវិញនៅមានកម្រិតនៅឡើយ មិនទាន់មានស្នាដៃណាមួយក្នុងព្រឹត្តិការណ៍ធំៗដូចជាស៊ីហ្គេមជាដើម។

កាលពីពេលកន្លងទៅមានគ្រូៗកម្រិតខ្ពស់មួយចំនួនរបស់កម្ពុជា ដែលកំពុងបង្ហាត់ក្នុងក្លឹបបាល់ទះអាជីពកម្ពុជា បានលើកឡើងពីហេតុផល ផ្សេងៗគ្នាជុំវិញការមិនទៅមុខរបស់វិស័យកីឡានេះ។ ថ្ងៃនេះ Sabay សូមលើកយក ៤ ចំណុចពិសេសៗ ដែលអាចជាដើមចមឲ្យឲ្យកីឡាដ៏ពេញនិយមមួយនេះមិនទាន់ជោគជ័យ៖

ក្រុមបាល់ទះជម្រើសជាតិកម្ពុជា

១-ថ្នាក់ដឹកនាំ៖ ថ្នាក់ដឹកនាំជាចំណែកយ៉ាងសំខាន់បំផុតក្នុងការជំរុញវិស័យកីឡានេះឲ្យទៅមុខ។ ទោះជាយ៉ាងណា ប្រមុខដឹកនាំគួរតែមានការបង្កើតលីគអាជីពឲ្យខាងតែបាន ពីព្រោះចំណុចនេះជារឿងសំខាន់បំផុតក្នុងការបង្កើតការប្រកួតឲ្យកីឡាករមានសកម្មភាពជាប់លាប់។

២-អ្នកលេងបាល់ល្អៗមួយចំនួនមិនចង់ចូលជម្រើសជាតិ៖ មែនទែនទៅមានអ្នកលេងបាល់ទះខ្លាំងកម្ពុជាមួយចំនួននៅតែគិតថា ការចូលរួមជម្រើសជាតិធ្វើឲ្យរូបគេបាត់បង់ការដើរលេងស៊ីលុយនៅតាមតារាងនានា។ ជាងនេះទៅទៀតអ្នកខ្លះគិតថា វិស័យកីឡានៅតែមានភាពពុករលួយ ដោយប្រមូលតែគ្នាឯងឬខ្សែ ចូលជម្រើសជាតិជាដើម។ ចំណុចទាំងអស់នេះអ្នកដែលមានសមត្ថភាពពិតប្រាកដគួរតែគិតឡើងវិញ ពីព្រោះរាជរដ្ឋាភិបាលកំពុងតែអភិវឌ្ឍន៍វិស័យកីឡា និងប្រមូលកៀរគរកីឡាករល្អៗមកចូលជម្រើសជាតិ ដើម្បីបានចេញទៅប្រកួតតំណាងឲ្យជាតិ។

សកម្មភាព ម៉ាប់ ឆ្វេង លេងស៊ីលុយ

៣-សកម្មភាពរបស់ជម្រើសជាតិ៖ បើនិយាយពីចំណុចនេះគឺរឹតតែខ្សត់ខ្សោយមែនទែន ពីព្រោះបាល់ទះជម្រើសជាតិត្រូវបានគេដឹងថា ស្ទើរតែគ្មានការប្រកួតសោះក្នុងមួយឆ្នាំៗ ដែលនេះធ្វើឲ្យការប្រមូលផ្ដុំរបស់ជម្រើសជាតិហាក់គ្មានប្រយោជន៍។ ចំណុចនេះគ្រូបង្វឹកបាល់ទះអាជីពមួយចំនួនសុទ្ធតែបាននិយាយដូចគ្នាថា កីឡាករបាល់ទះកម្ពុជាខ្វះបទពិសោធលើឆាកអន្តរជាតិមែនទែន ដោយសារកង្វះការប្រកួត។

៤-ក្លឹបបាល់ទះ៖ បច្ចុប្បន្នក្លឹបបាល់ទះស្រុកខ្មែរ ត្រូវបានគេដឹងថា មានតែ៤ក្លឹបប៉ុណ្ណោះ គឺ វិសាខា, ក្រសួងមហាផ្ទៃ កងពលធំអន្តរាគមន៍លេខ៣ និងក្លឹបបាល់ទះអង្គរក្ស។ ប៉ុន្តែមួយរយៈចុងក្រោយត្រូវបានគេដឹងថា ក្លឹបបញ្ជាការដ្ឋានអង្គរក្ស ហាក់មិនមានសកម្មភាពសឹងតែត្រូវបានដកខ្លួនទៀត។ បញ្ហាក្លឹបបាល់ទះមានតិចនេះហើយ ទើបការបង្កើតលីគអាជីពហាក់មិនអាចដំណើរការបាន។ នេះបើប្រៀបធៀបជាមួយក្លឹបបាល់ទះអាជីពនៅថៃ (មាន១០ក្លឹបលេងនៅលីគទី១) និងវៀតណាម (មាន១២ក្លឹបលេងនៅលីគទី១)៕

អត្ថបទ៖ ស្រី សុវណ្ណដារ៉ា