ម្ចាស់ដេប៉ូប្រេងឥន្ធនៈមួយកន្លែងត្រូវបញ្ជូនទៅតុលាការ ក្រោយរកឃើញភាពមិនប្រក្រតីជាលើកទី២

2018-11-16 06:48:40
ចំនួនមតិ 0 | ចំនួនចែករំលែក 0

ចន្លោះមិនឃើញ

មន្ត្រីជំនាញនៃអគ្គនាយកដ្ឋានកាំកុងត្រូលបានសម្រេចបញ្ជូនសំណុំរឿងម្ចាស់ដេប៉ូប្រេងឥន្ធនៈនៅក្រុងតាខ្មៅ ខេត្តកណ្តាលម្នាក់ទៅតុលាការបន្ទាប់ពីមន្ត្រីជំនាញបានរកឃើញភាពមិនប្រក្រតីជាលើកទីពីរនៅដេប៉ូមួយនេះ។

(មន្ត្រីជំនាញកំពុងពិនិត្យកម្រិតល្អៀង និងគុណភាពប្រេងឥន្ធនៈនៅដេប៉ូមួយកន្លែង/រូបភាព៖ អគ្គនាយកដ្ឋានកាំកុងត្រូល)

នៅលើទំព័រហ្វេសប៊ុកផ្លូវការរបស់ខ្លួននារសៀលនេះ អគ្គនាយកដ្ឋានកាំកុងត្រូវបានសរសេរថាកាលពីថ្ងៃទី១៥ ខែវិច្ឆិកា ឆ្នាំ២០១៨ មន្ត្រីជំនាញរួមជាមួយព្រះរាជអាជ្ញារងខេត្តកណ្តាលផងបានចុះទៅពិនិត្យជាលើកទីពីរនៅដេប៉ូប្រេងឥន្ធនៈនានានៅខេត្តកណ្តាល។ តាមរយៈការពិនិត្យមានដេប៉ូមួយឈ្មោះ រស្មី ពិសី នៅក្នុងក្រុងតាខ្មៅ ខេត្តកណ្តាល ត្រូវបានមន្ត្រីជំនាញរកឃើញថាបានបង្ករភាពមិនប្រក្រតីជាលើកទី២។

ប្រភពដដែលបន្តថា៖ «យោងតាមលទ្ធផលត្រួតពិនិត្យឃើញភាពមិនប្រក្រតីជាលើកទី២ ដោយម្ចាស់ដេប៉ូ ពុំអនុវត្តតាមការណែនាំរបស់មន្រ្តីជំនាញ ដែលតម្រូវឱ្យម្ចាស់ដេប៉ូធ្វើកិច្ចសន្យាកែតម្រូវភាពមិនប្រក្រតី ដែលបានរកឃើញកាលលើកទី១ ទើបមន្រ្តីជំនាញបានកសាងសំណុំរឿងបញ្ជូនទៅតុលាការដើម្បីអនុវត្ត និងផ្តន្ទាទោសតាមនីតិវិធីច្បាប់»។

គួរបញ្ជាក់ថាការចុះពិនិត្យរបស់មន្ត្រិជំនាញតាមស្ថានីយ ឬដេប៉ូគឺពិននិត្យទៅលើកម្រិតល្អៀងនៃការលក់ចេញ និងកម្រិតគុណភាពអុកតាននៅក្នុងប្រេងឥន្ធនៈ៕

អត្ថបទ៖ ទូច សុខា