ជប៉ុន ផលិតស្រោមមុខមនុស្ស អាចកុម្ម៉ង់ឲ្យដូចមុខមនុស្សពិតៗបាន
- 2018-11-16 08:33:29
- ចំនួនមតិ 0 | ចំនួនចែករំលែក 0
ជប៉ុន ផលិតស្រោមមុខមនុស្ស អាចកុម្ម៉ង់ឲ្យដូចមុខមនុស្សពិតៗបាន
ចន្លោះមិនឃើញ
ស្រោមមុខ ដែលមានលក្ខណៈដូចមុខមនុស្សពិតៗ ផលិតឡើងដោយក្រុមហ៊ុនតូចមួយ នៅជនបទនៃប្រទេសជប៉ុន កំពុងត្រូវប៉ាន់ខ្លាំងពីឧស្សាហកម្មបច្ចេកវិទ្យា និង កម្សាន្ត ទាំងក្នុង និងក្រៅស្រុក រហូតដល់ប្រទេសអារ៉ាប៊ីសាអ៊ូឌីតទៀតផង។
ស្រោមមុខផលិតឡើងពីជ័រ និងប្លាស្ទិក ដោយបុគ្គលិកចំនួន ៥នាក់ ដែលមានតម្លៃ ៣សែនយ៉េន ឬ ២ ៦៥០ដុល្លារនេះ កំពុងប៉ុនប៉ងធ្វើឲ្យស្នាមជ្រីវជ្រួញ និងស្នាមលើស្បែកមុខ កាន់តែដូចពិតៗជាងនេះទៀត។
ស្ថាបនិកក្រុមហ៊ុន លោក Osamu Kitagawa បានចាប់ផ្ដើមគំនិតនេះឡើង ខណៈកំពុងធ្វើការនៅក្រុមហ៊ុនផលិតម៉ាស៊ីនបោះពុម្ពមួយ។ ប៉ុន្តែលោកត្រូវចំណាយពេល ២ឆ្នាំ ដើម្បីធ្វើការពិសោធន៍មុនពេលរកវិធីប្រើទិន្នន័យផ្ទៃមុខ 3D ពីរូបថតដែលមានគុណភាពខ្ពស់ ដើម្បីបង្កើតស្រោមមុខ និងចាប់ផ្ដើមលក់វានៅក្នុងឆ្នាំ២០១១។
ក្រុមហ៊ុនដែលស្ថិតនៅខេត្ត Shiga របស់លោក Kitagawa ទទួលបានការបញ្ជាទិញប្រហែល ១០០ស្រោមមុខជារៀងរាល់ឆ្នាំពីឧស្សាហកម្មផ្នែកកម្សាន្ត, យានយន្ត, បច្ចេកវិទ្យា និងក្រុមហ៊ុនសន្តិសុខ ដែលភាគច្រើនស្ថិតក្នុងប្រទេសជប៉ុន។ ជាក់ស្ដែង ក្រុមហ៊ុនរថយន្តជប៉ុនមួយបានបញ្ជាទិញស្រោមមុខមនុស្សកំពុងដេកលក់ (បិទភ្នែក) ដើម្បីចង់ដឹងថា បច្ចេកវិទ្យាសម្គាល់ផ្ទៃមុខមនុស្សរបស់ពួកគេ អាចចាប់អ្នកបើកបរដេកលក់ពេលកំពុងបើកបរបានឬក៏អត់។
លោក Kitagawa វ័យ៦០ឆ្នាំ បានបញ្ជាក់ថា លោកធ្វើការជាមួយអតិថិជនដោយប្រុងប្រយ័ត្នដើម្បីធានាថា ផលិតផលរបស់លោកនឹងមិនត្រូវបានប្រើប្រាស់សម្រាប់គោលបំណងខុសច្បាប់ និងបង្កឲ្យមានគ្រោះថ្នាក់ដល់សន្តិសុខនោះទេ។ លោកបានបន្ថែមទៀតថា គោលដៅរបស់លោកគឺបង្កើតស្រោមមុខឲ្យដូចមុខមនុស្សពិតប្រាកដ ១០០ភាគរយ ហើយលោកសង្ឃឹមថានឹងប្រើប្រាស់វត្ថុធាតុទន់ជាងនេះនាពេលអនាគត ដូចជា ស៊ីលីកូន ជាដើម៕
ចុចអាន៖